فوتو: س.مايلىباەۆ. ءماجىلىستىڭ ءباسپاسوز قىزمەتى.
كونفەرەنتسيانىڭ ماقساتى – «حالىق ۇنىنە قۇلاق اساتىن مەملەكەت» تۇجىرىمداماسى اياسىندا كونستيتۋتسيالىق زاڭنامانى نىعايتۋ. وعان ءماجىلىس جانە سەنات دەپۋتاتتارى, كونستيتۋتسيالىق كەڭەستىڭ بۇرىنعى مۇشەلەرى, كونستيتۋتسيالىق سوت جانىنداعى عىلىمي-كونسۋلتاتيۆتىك كەڭەس مۇشەلەرى, جوعارعى سوت, باس پروكۋراتۋرا مەن وزگە دە مەملەكەتتىك ورگاندار وكىلدەرى, وتاندىق جانە شەتەلدىك كونستيتۋتسيوناليست-عالىمدار قاتىستى.
«كونستيتۋتسيا – وزگەرمەيتىن ءماتىن ەمەس, بۇل – جاڭا قازاقستاندى قۇرۋدىڭ ستراتەگيالىق پايىمى مەن ميسسياسى. جاڭا قازاقستان – ءورشىل قۇقىقتىق رەفورمالار مەن مەملەكەتتىلىكتى جاڭعىرتۋ ءداۋىرى. ەلدىڭ قۇقىقتىق جۇيەسى قۇقىقتىق ءتارتىپتى نىعايتۋ, ازاماتتاردىڭ قۇقىقتارىن قورعاۋ جانە زاڭدىلىقتى ساقتاۋ باعىتىندا بەلسەندى دامىپ كەلەدى. وسى شارانىڭ بارلىعى تۇراقتى جانە گۇلدەنگەن قوعام قۇرۋعا ىقپال ەتەدى», دەدى ءىس-شارانى اشقان پارلامەنتاريزم ينستيتۋتىنىڭ ديرەكتورى, زاڭ عىلىمدارىنىڭ دوكتورى قاناتبەك سافينوۆ.
كونفەرەنتسياعا قاتىسۋشىلار كونستيتۋتسيالىق زاڭنامانىڭ ءتۇرلى اسپەكتىسىن, ەلدىڭ قۇقىقتىق جانە ساياسي جۇيەسىن قالىپتاستىرۋداعى ەكونوميكالىق دامۋعا ىقپالىن جانە ازاماتتاردىڭ الەۋمەتتىك قۇقىقتارى مەن بوستاندىقتارىن قامتاماسىز ەتۋدەگى اتا زاڭنىڭ ءرولىن تالقىلادى.
سونداي-اق ساراپشىلار كونستيتۋتسيالىق رەفورمانى جۇزەگە اسىرۋ پروتسەسىندە قازاقستاننىڭ الدىندا تۇرعان كۇردەلى ماسەلەلەر مەن سىن-قاتەرلەردى, كونستيتۋتسيالىق قۇرىلىستى نىعايتۋ جولىنداعى قادامدارى تۋرالى ايتتى.
«قازىر ەلىمىز جاڭارتىلعان كونستيتۋتسيا اياسىندا حالىقتىڭ ەرىك-قالاۋى باستى ورىنعا قويىلعان ءادىل جانە جاڭا قازاقستاندا ءومىر ءسۇرىپ جاتىر. مەملەكەت پەن قوعام اراسىنداعى ءوزارا قۇرمەت پەن سەنىمگە نەگىزدەلگەن جاڭا ساياسي مادەنيەت قالىپتاسۋدا. ماڭىزدى شەشىمدەر ەندى ازاماتتاردىڭ قاتىسۋىمەن اشىق تۇردە قابىلدانادى. ەلىمىزدە جۇرگىزىلگەن كونستيتۋتسيالىق رەفورمالار قوعامدى دەموكراتيالاندىرۋ, حالىق بيلىگىنىڭ نەگىزدەرىن ودان ءارى نىعايتۋ, پارلامەنتتىڭ ءرولىن كۇشەيتۋ, ۇكىمەتتىڭ دەربەستىگىن ارتتىرۋ جونىندەگى نەگىزگى قوعام سۇرانىستارىن ەسكەردى», دەدى ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ ءتورايىمى سنەجاننا يماشەۆا.
سونداي-اق دەپۋتات بۇگىنگى كونفەرەنتسيا ەلىمىزدە جۇرگىزىلگەن كونستيتۋتسيالىق رەفورمالاردى جان-جاقتى تالقىلاۋعا, كونستيتۋتسيالىق زاڭنامانى ودان ءارى جەتىلدىرۋ ماقساتىندا جاڭا يدەيالار مەن تاسىلدەردى تابۋعا مۇمكىندىك بەرەتىنىن ايتتى.
فورۋمدى ۇيىمداستىرۋشىلار مەن قوناقتار حالىق اراسىندا كونستيتۋتسيالىق رەفورمانىڭ ءمانى مەن ونىڭ ناتيجەلەرىن ءتۇسىندىرۋ بويىنشا جۇمىستى جانداندىرۋ قاجەتتىگىن اتاپ ءوتتى. جيىن قورىتىندىسى بويىنشا كونستيتۋتسيالىق زاڭنامانى ودان ءارى جەتىلدىرۋ بويىنشا ۇسىنىستار ازىرلەنەتىن بولادى.
