ز.سايدۋللاەۆ ءبىر جىلدان استام ۋاقىت بويى وسى ءنومىردى, ونىڭ كوستيۋمدەرىن, رەكۆيزيتتەرىن دايىنداعانىن ايتادى. قويىلىمدا نازىك جاندى ارۋدىڭ ەر-ازاماتتى ءبىر كولمەن دەمەپ كوتەرگەنىنەن وزگە دە قاۋىپتى, اسەرلى مەزەتتەردى كورگەن كورەرمەن دەمىن ىشىنە تارتىپ وتىردى. بۇل جۇرتقا ونىڭ باسقا ونەرگە ۇقسامايتىن, قاجىرلى ەڭبەكتى تالاپ ەتەتىن, ەرەكشە ونەر ءتۇرى ەكەنىن ۇعىندىردى.
ال كىلەڭ مىقتىلار جينالعان وسى تارتىستى دوداعا تسيرك ونەرىنىڭ «جىلىگىن شاعىپ, مايىن ىشكەن» تورەشىلەر قازىلىق جاسادى.
جالپى, اتالعان بايقاۋ تسيرك ونەرىن دامىتىپ, ناسيحاتتاۋعا جانە حالىقتىڭ اراسىندا وسى ونەر جايلى كەڭ تۇسىنىك قالىپتاستىرۋعا باعىتتالعان. ال التىن جۇلدە جالعىز تسيرك مەكەمەسىنىڭ ەمەس, بۇكىل شىمكەنتتىڭ مەرەيىن اسىرعان قۋانىش.
«14 جىلدان بەرى ۇيىمداستىرىلىپ كەلە جاتقان فەستيۆال قازاقستان تسيركى ءۇشىن اسىعا كۇتەتىن, ماڭىزدى وقيعالاردىڭ ءبىرى دەۋگە بولادى. ونەر دوداسى العاش رەت 2007 جىلى وتكىزىلگەن. سودان بەرى ءوزىن ەڭ بەدەلدى حالىقارالىق فەستيۆال رەتىندە دالەلدەدى. ونىڭ باستى ەرەكشەلىگى – ۇزدىك تسيرك نومىرلەرىندە. سوندىقتان وعان الەمنىڭ كوپتەگەن ەلىنەن كەلىپ قاتىسۋعا اسىعادى. جۇلدەگە جاس تا, اتاقتى تسيرك ارتىستەرى دە بىردەي تالاسادى. بيىلعى ماۋسىم ايىندا الماتى قالاسىندا Almaty Circus Festival حالىقارالىق فەستيۆالى ءوتتى. وعان الەمنىڭ 15 ەلىنەن ونەرپازدار جينالدى. بۇل سايىستا سەرگەي مۋستافين جەتەكشى ەتەتىن ونەرپازدار «پودكيدنايا دوسكا» ءنومىرىن قويدى. كورەرمەندى ەرەكشە تاڭعالدىرعان شىمكەنت-تسيرك مەكەمەسىنىڭ ارتىستەرى سول جارىستان ەلگە جۇلدەمەن ورالدى. شىمكەنت قالاسىنىڭ مادەنيەت, تىلدەردى دامىتۋ جانە ارحيۆتەر باسقارماسىنىڭ قولداۋىمەن ءبىزدىڭ ۇجىم بۇدان دا جوعارى بەلەستەردى باعىندىرۋدى الدىنا ماقسات قويىپ وتىر. جانە سول سەنىم ۇدەسىنەن شىعىپ كەلەدى», دەدى شىمكەنت-تسيرك مەكەمەسىنىڭ باسشىسى نۇرلان ءادىلحانوۆ.
سونىمەن بىرگە مەگاپوليس تسيركى ۇجىمىنىڭ جەتەكشىسى الداعى ۋاقىتتا الەمدى اۋزىنا قاراتقان مونتە كارلو تسيرك فەستيۆالىنە شاقىرتۋ السا, شىمكەنتتىك ونەرپازداردىڭ دا بۇل حالىقارالىق سايىستان جۇلدەلى ورالاتىنىنان ءۇمىتتى.
شىمكەنت
