فوتو: وكق ءباسپاسوز قىزمەتى
قازىرگى گەوساياسي احۋال مەن كوشى-قون ساياساتى تۇجىرىمداماسى اياسىنداعى شارالار ناتيجەسىندە سوڭعى 11 جىلدا العاش رەت كوشى-قون سالاسىندا وڭ ءۇردىس بايقالىپ وتىر. ەلىمىزگە نەگىزىنەن تمد, قىتاي, موڭعوليا جانە تاعى باسقا مەملەكەتتەردىڭ ازاماتتارى تۇراقتى تۇرۋعا كەلەدى. كوشىپ كەلگەندەردىڭ اراسىندا بيىلدان باستاپ ەڭبەككە قابىلەتتى ازاماتتاردىڭ سانى ارتا باستاعان, ولاردىڭ سانى 7 مىڭ 59 ادامدى قۇراپ وتىر.
«مىسالى, تۇراقتى تۇرۋعا كەلگەن 2500 ادامنىڭ ءبىلىمى جوعارى, ال 1655 ادامنىڭ ورتا كاسىپتىك ءبىلىمى بار, 2884 ادامنىڭ ءبىلىمى ورتا», دەپ ناقتىلادى كوشى-قون سالاسىنىڭ باسشىسى.
سونىمەن قاتار تەحنيكالىق, ەكونوميكالىق, مەديتسينالىق, پەداگوگيكالىق ءبىلىمى بار شەتەل ازاماتتارى قازاقستانعا كوپتەپ كەلىپ جاتىر.
«ىشكى كوشى-قون تۇراقتالدى. جىل باسىنان بەرى 160 مىڭنان استام ادام ەل ىشىندە قونىس اۋداردى. بۇل كورسەتكىش بىلتىرعىمەن سالىستىرعاندا 11%-عا تومەن», دەدى ا. ەرتاەۆ.
بۇل رەتتە سپيكەردىڭ ايتۋىنشا, ەلدەگى ءىرى قالالارعا كوش تىزگىنىن بۇرعان ازاماتتار كوپ, ولاردىڭ ۇلەس سالماعى - 40%. ەڭ ءىرى ءۇش قالا – استانا, الماتى, شىمكەنت قالالارىنا نەگىزىنەن وبلىس ورتالىقتارىنان, مونوقالالاردان جانە اۋىلداردان كوشىپ كەلۋشىلەر كوپ.
بۇدان باسقا, كوميتەت توراعاسى كوشى-قون ساياساتى تۇجىرىمداماسى اياسىندا ىسكە اسىرىلىپ جاتقان جۇمىستارعا توقتالدى.
ءبىرىنشى باعىت – ءبىلىم ميگراتسياسى. بيىل قازاقستاننىڭ جوو-لارى بازاسىندا شەتەلدىك جوو-لاردىڭ 6 فيليالى قۇرىلدى. قابىلدانعان شارالار ناتيجەسىندە بيىل شەتەلدىك ستۋدەنتتەردىڭ ۇلەسى بارلىق ستۋدەنتتەردىڭ 4,1%-ىنان 4,4%-ىنا دەيىن ارتقان.
ەكىنشى باعىت – بيزنەس يمميگراتسياسى اياسىندا ەلىمىزدىڭ ينۆەستيتسيالىق تارتىمدىلىعىن ارتتىرۋ. ا5 ساناتىنداعى ينۆەستورلار شەتەلدەن جۇمىس كۇشىن تارتۋ ءۇشىن رۇقسات المايتىن بولدى. جىل باسىنان بەرى 76 شەتەل ازاماتىنا وسىنداي ينۆەستور ۆيزاسى بەرىلگەن. ينۆەستور بيزنەسمەندەردىڭ ينۆەستيتسيالىق ۆيزا الۋىنا قاجەتتى تومەنگى شەكتى $300 مىڭعا دەيىن ازايتىلادى. سونىمەن قاتار, ا6 ۇزاق مەرزىمدى جاڭا ينۆەستورلىق ۆيزا ءتۇرى ەنگىزىلەدى. مۇنداي ۆيزا يەلەرىنە ەلىمىزدىڭ اۋماعىنا تۇراقتى تۇرۋ ءۇشىن ىقتيارحات الۋ قۇقىعى بەرىلەدى.
«شەتەلدە تابىستى بيزنەستەرى بار ەتنوستىق قازاقتار ءۇشىن «اتا جولى» كارتاسىن بەرۋ ءتارتىبى بەكىتىلدى. اتا جولى كارتاسىنىڭ باستى ەرەكشەلىگى – شەتەلدىك باۋىرلارىمىز وزگە مەملەكەتتىڭ ازاماتى بولعانىمەن, ءوز ازاماتتارىمىزبەن بىردەي قۇقىقتارعا يە بولادى», دەدى ا. ەرتاەۆ.
