فوتو: اقوردا
ماڭعىستاۋ وبلىسىنىڭ اكىمى نۇرلان نوعاەۆ مەملەكەت باسشىسىنا ەسەپتى كەزەڭ ىشىندە وڭىردە جالپى سوماسى 5,3 ميلليارد تەڭگە بولاتىن 6 ينۆەستيتسيالىق جوبا ىسكە قوسىلعانىن ايتتى. جالپى, قاڭتار-شىلدە ايلارىندا ءوڭىردىڭ نەگىزگى كاپيتالىنا باعىتتالعان ينۆەستيتسيا كولەمى 523 ميلليارد تەڭگەنى قۇرادى.
سونىمەن قاتار مەملەكەت باسشىسىنا اۋىزسۋ تاپشىلىعىن شەشۋگە قاتىستى تاپسىرماسىنىڭ ورىندالۋ بارىسى تۋرالى مالىمەت بەرىلدى. بۇل ماسەلەنى كەزەڭ-كەزەڭىمەن شەشۋ ءۇشىن وبلىستا 2025 جىلعا دەيىن 6 جوبا جۇزەگە اسىرىلادى. ناتيجەسىندە تۇشىتىلعان سۋدىڭ كولەمىن 146 مىڭ تەكشە مەترگە دەيىن ارتتىرۋعا مۇمكىندىك تۋادى.
سونداي-اق پرەزيدەنتكە اقتاۋ قالاسىنىڭ تۇرعىن ءۇي-كوممۋنالدىق شارۋاشىلىعىن جەتىلدىرۋ جانە ينجەنەرلىك ينفراقۇرىلىمىن قالىپقا كەلتىرۋ, ماڭعىستاۋ اتوم ەنەرگەتيكالىق كومبيناتىنا (ماەك) كۇردەلى جوندەۋ جۇرگىزۋ ماسەلەلەرى جونىندە باياندالدى.
ماەك-كە جوندەۋ جۇمىستارىن جۇرگىزۋ ءۇشىن بيىل 9,4 ميلليارد تەڭگە قارجى بولىنگەن. ونىڭ ىشىندە 6,8 ميلليارد تەڭگە ماەك-ءتىڭ ينۆەستيتسيالىق باعدارلامالارى اياسىندا, ال 2,6 ميلليارد تەڭگە ماڭعىستاۋ وبلىسى اكىمدىگىنىڭ رەزەرۆىنەن ءبولىندى. بۇعان قوسا, پرەزيدەنتتىڭ تاپسىرماسى بويىنشا ۇكىمەت رەزەرۆىنەن قاجەتتى قوندىرعىلاردى ساتىپ الۋ ءۇشىن 4,9 ميلليارد تەڭگە قارجى قاراستىرىلدى.
كەزدەسۋ سوڭىندا مەملەكەت باسشىسى وبلىس اكىمىنە ماڭعىستاۋ ءوڭىرى ەنەرگەتيكالىق جۇيەسىنىڭ ۇزدىكسىز جۇمىس ىستەۋىن قامتاماسىز ەتۋدى جانە ءوڭىردىڭ الەۋمەتتىك-ەكونوميكالىق دامۋىنىڭ كەشەندى جوسپارى اياسىنداعى مىندەتتەردى ىسكە اسىرۋدى تاپسىردى.
