فوتو: ءماجىلىستىڭ ءباسپاسوز قىزمەتى. سۋرەتتى تۇسىرگەن س.مايلىباەۆ.
بيىل قازاقستان مەن ەۋروپالىق وداق ديپلوماتيالىق قارىم-قاتىناستىڭ 30 جىلدىعىن اتاپ وتۋدە. ايگۇل قۇسپان ءوز سوزىندە وسى ۋاقىت ىشىندە ەلىمىز ەۋروپالىق وداقتىڭ بارلىق ينستيتۋتتارىمەن, سونىڭ ىشىندە ەۋروپالىق پارلامەنتپەن تىعىز بايلانىس ورناتقانىن اتاپ ءوتتى.
«قازاقستان ەۋروپالىق وداقپەن ىنتىماقتاستىقتى دامىتۋعا ۇلكەن ءمان بەرەدى. ءبىزدىڭ ستراتەگيالىق سەرىكتەستىگىمىز نىعايىپ كەلەدى», دەدى كوميتەت باسشىسى.
دەۆيد ماكالليستەر ەۋروپارلامەنت دەلەگاتسياسىنىڭ قازاقستانعا ورتالىق ازيا بويىنشا بايانداما-رەزوليۋتسياسىن دايىنداۋ ءۇشىن كەلگەنىن ايتتى.
ء«بىز پرەزيدەنت توقاەۆ جۇرگىزگەن ساياسي جانە الەۋمەتتىك-ەكونوميكالىق رەفورمالاردى قۇپتايمىز. ولاردى ودان ءارى جۇزەگە اسىرۋ ماڭىزدى. ءبىزدىڭ ويىمىزشا, قازاقستان دۇرىس باعىتتا كەلە جاتىر. كونستيتۋتسيالىق رەفورمالار ءسىزدىڭ ەلدەگى پارلامەنتتىڭ ىقپالىن كۇشەيتتى», دەدى دەۆيد ماكالليستەر.
ەۋروپارلامەنت سونداي-اق ەۋروپالىق وداقتىڭ ورتالىق ازيا وڭىرىمەن ىنتىماقتاستىقتى تەرەڭدەتۋىنە جاردەمدەسۋگە نيەتتى. كەلىسسوزگە ءماجىلىس دەپۋتاتتارى ماگەررام ماگەرراموۆ, ايدوس سارىم, اناس باققوجاەۆ, مارات باشيموۆ, تاڭساۋلە سەرىكوۆ تە قاتىستى. ەۋروپارلامەنت دەلەگاتسياسىنىڭ قۇرامىندا گەرمانيا, گرەكيا, ليتۆا, رۋمىنيا, سلوۆەنيا جانە حورۆاتيا وكىلدەرى بولدى. كەزدەسۋ قورىتىندىسى بويىنشا تاراپتار پارتياارالىق جانە فراكتسياارالىق بايلانىستاردى كەڭەيتۋگە كەلىستى.
