ءۇش كۇنگە سوزىلعان ونەر دوداسىنا ماجارستان, تۇركيا, بوسنيا جانە گەرتسەگوۆينا, بولگاريا, سلوۆەنيا سىندى ەلدەردىڭ وكىلدەرىمەن قاتار ازيا مەملەكەتتەرىنىڭ دە ۇكىلى ۇمىتتەرى قاتىسىپ, ونەرىن ورتاعا سالدى. جالپى, 18-35 جاس ارالىعىنداعى 17 جاس ورىنداۋشى توپقا ءتۇسىپ, جەڭىستىڭ بيىك تۇعىرىنان كورىنۋگە ۇمتىلدى.
13 مەملەكەتتىڭ ءانشىسى سىنعا تۇسكەن, ىستىقكول جاعاسىندا وتكەن بايقاۋدىڭ العاشقى بولىمىندە جامبىلدىق جاس ءانشى ا.قالماعانبەتوۆا تولەگەن مۇحامەدجانوۆتىڭ «قۇس جولى» ءانىن شىرقاپ, ىستىقكول جاعالاۋىنا جينالعان جەرگىلىكتى ونەرسۇيەر قاۋىمنىڭ زور ىقىلاسىنا بولەنسە, بايقاۋدىڭ ەكىنشى كەزەڭىندە ەريك كارمەننىڭ ايگىلى «All by myself» ءانىن وتە جوعارى دەڭگەيدە ورىنداپ, قازىلار القاسىن تاڭعالدىردى.
بايقاۋ قورىتىندىسىندا اۋليەاتالىق ءانشىنىڭ كاسىبي ورىنداۋشىلىق شەبەرلىگىن جوعارى باعالاعان قازىلار القاسى اينا قالماعانبەتوۆانى باس جۇلدەگە لايىق دەپ تانىدى. قىسقاسى, ول ونەر دوداسىندا جەڭىمپاز اتانىپ, 5 مىڭ اقش دوللارىنىڭ سەرتيفيكاتىن يەلەندى.
«Makin Asia» مۋزىكا فەستيۆالى العاش رەت 2013 جىلى ۇيىمداستىرىلعان بولاتىن. اتالعان بايقاۋدا بۇگىندە اتاعى جەر ءجۇزىن شارلاعان ديماش قۇدايبەرگەن توپ جارعان. ءۇشىنشى رەت وتكىزىلگەن حالىقارالىق فەستيۆالدا ەكىنشى مارتە قازاق ءانشىسىنىڭ جەڭىسكە جەتۋى زور تابىس ەكەنى داۋسىز.
تاراز
