فوتو: مادەنيەت جانە سپورت مينيسترلىگىنىڭ تەلەگرام ارناسى
سالتاناتتى ءراسىم باستالار الدىندا مادەنيەت جانە سپورت ءمينيسترى اسحات ورالوۆ قۇتتىقتاۋ ءسوز سويلەپ, وتاندىق سپورتتىڭ دامۋىنا قوسقان ۇلەسى جانە جارقىن جەڭىستەرى ءۇشىن سالا وكىلدەرىنە العىس ايتتى.
سالتاناتتى ءراسىم بارىسىندا اسحات ورالوۆ قازاقستاندىق سپورت ارداگەرلەرىنە «ەڭبەك ارداگەرى» مەدالىن تابىس ەتتى, ولاردىڭ اراسىندا بوكستان قر ەڭبەك سىڭىرگەن جاتتىقتىرۋشىسى مارات ەلەۋسىنوۆ, بوكستان قر ەڭبەك سىڭىرگەن جاتتىقتىرۋشىسى جانات ماناشەۆ, 1972 جىلعى وليمپيادانىڭ كۇمىس جۇلدەگەرى ۆيكتور ابويموۆ جانە باسقا دا تانىمال سپورتشىلار مەن جاتتىقتىرۋشىلار بار.
سونىمەن قاتار مينيستر سپورتشىلاردى, جاتتىقتىرۋشىلار مەن سپورت ۇيىمدارىنىڭ قىزمەتكەرلەرىن «Cپورت سالاسىنىڭ قۇرمەتتى قىزمەتكەرى» جانە «دەنە شىنىقتىرۋ مەن سپورتقا سىڭىرگەن ەڭبەگى ءۇشىن» توسبەلگىلەرىمەن, سونداي-اق مادەنيەت جانە سپورت مينيسترلىگىنىڭ قۇرمەت گراموتاسى جانە العىس حاتتارىمەن ماراپاتتادى. ايتۋلى كۇن قارساڭىندا بارلىعى 250 ادام قۇرمەتكە يە بولدى.
مادەنيەت جانە سپورت مينيسترلىگىنىڭ مالىمەتىنە سۇيەنسەك, بۇگىندە ءاربىر ءۇشىنشى قازاقستاندىق نەمەسە 7 ملن 587 مىڭ ادام سپورتپەن اينالىسادى. بۇل جالپى حالىق سانىنىڭ 38,5%-ى. ونىڭ ىشىندە 800-دەن استام دەنە شىنىقتىرۋ كلۋبتارىندا 258 مىڭنان استام بالالار مەن جاسوسپىرىمدەر سپورتپەن شۇعىلدانادى.
سوڭعى 3 جىلدا سپورتپەن جانە دەنە شىنىقتىرۋمەن اينالىساتىن ەرەكشە قاجەتتىلىكتەرى بار ادامداردىڭ سانى 25,3%-عا ءوسىپ, 51 325 ادامعا جەتكەن. ال, 584 مىڭعا جۋىق ادام ۇلتتىق سپورت تۇرلەرىمەن جۇيەلى تۇردە اينالىسادى ەكەن. رەسپۋبليكا بويىنشا بارلىعى 43 مىڭنان استام سپورتتىق عيمارات بولسا, ونىڭ 23 مىڭنان استامى – اۋىلدىق جەرلەردىڭ ۇلەسىندە.
بيىلعى جىلى 113 جاڭا سپورتتىق نىسان سالۋ, 20 سپورتتىق نىساندى رەكونسترۋكتسيالاۋ, 6 جۇمىس ىستەپ تۇرعان سپورت وبەكتىلەرىن جەتە جاراقتاندىرۋ بويىنشا جۇمىس باستالدى.
ەلىمىزدە جىل سايىن 1,2 ملن ادامدى, ونىڭ ىشىندە اۋىلدىق جەرلەردە 500 مىڭ ادامدى قامتيتىن, ءارتۇرلى دەڭگەيدەگى 25 مىڭنان اسا سپورتتىق-بۇقارالىق ءىس-شارا تۇراقتى تۇردە وتكىزىلىپ وتىر. اسىرەسە, سوڭعى جىلدارى جۇگىرۋ, مارافوندار, ۆەلوشەرۋلەر مەن ۆەلومارافوندار, سپورتتىق فەستيۆالدار, وتباسىلىق جارىستار, جاپپاي سىرعاناۋلار تانىمال بولا باستادى.
ايتا كەتەيىك, سپورت كۇنىنە وراي ەلىمىزدىڭ بارلىق وڭىرىندە جۇزدەن استام ءىس-شارا, ونىڭ ىشىندە ەرەسەكتەر, بالالار, جاسوسپىرىمدەر مەن ەرەكشە قاجەتتىلىكتەرى بار ادامدار اراسىنداعى سپورتتىق جارىستار, سپورتتىق قويىلىمدار, سالا ارداگەرلەرى مەن قىزمەتكەرلەرىن ماراپاتتاۋ راسىمدەرى, مارافوندار, كوڭىلدى ستارتتار جانە تاعى باسقا بۇقارالىق ءىس-شارالار وتەدى. بۇل جارىستاردا كەز - كەلگەن ادام سايىسقا قاتىسىپ, ءوزىنىڭ سپورتىق قابىلەتىن سىناپ كورە الادى.
