فوتو: ۇكىمەتتىڭ ءباسپاسوز قىزمەتى
ءبىرىنشى كەزدەسۋ Jingdong Group (JD Group) كورپوراتسياسىنىڭ ۆيتسە-پرەزيدەنتى لارري ليمەن ءوتتى. وتكەن جىلى كومپانيا Global Fortune 500 الەمدىك رەيتينگىندە 46-ورىنعا يە بولدى. ينتەرنەت الاڭدا JD.com Amazon جانە Alibaba-مەن بىرگە الەمدەگى ەڭ تانىمال جانە ەڭ الپاۋىتتاردىڭ ءبىرى بولىپ تابىلادى. باسقا ەكى ءىرى ساتۋشىلاردان ايىرماشىلىعى, JD.com ءوزى تاۋارلاردى ساتىپ الۋشىلارعا جەتكىزەدى. حولدينگتە 560 مىڭ قىزمەتكەر جۇمىس ىستەيدى, ونىڭ جارتىسى جەتكىزۋ سالاسىندا.
سەرىك جۇمانعارين كەزدەسۋدە ەلەكتروندىق كوممەرتسيا الەمدىك ساۋدانىڭ بولاشاعى ەكەنىن اتاپ ءوتتى.
«بىزدە 40 جاسقا تولماعان ادامداردىڭ 85%-دان استامى بۇگىندە زاتتاردى ونلاين ساتىپ الاتىنى تۋرالى زەرتتەۋلەر بار. قازاقستاندا ەلەكتروندىق ساۋدانىڭ ۇلەسى بولشەك ىشكى ساۋدانىڭ شامامەن 13%-دى قۇرايدى, 20%-عا دەيىن ۇلعايتۋدى جوسپارلاپ وتىرمىز. JD.com بيزنەستى جۇرگىزۋدى جەڭىلدەتۋگە ىقپال ەتەدى, شاعىن جانە ورتا كاسىپورىنداردىڭ, تۇتىنۋشىلاردىڭ مۇمكىندىكتەرىن كەڭەيتەدى. بۇل ءبىز ءۇشىن وتە قىزىقتى, شاعىن جانە ورتا بيزنەسكە تسيفرلىق ەكونوميكانىڭ ارتىقشىلىقتارىن پايدالانۋعا كومەكتەسۋ ءبىزدىڭ جۇمىسىمىزدىڭ قۇرامداس بولىكتەرىنىڭ ءبىرى», دەدى ۆيتسە-پرەمەر.
وسى جىلدىڭ مامىر ايىندا مەملەكەت باسشىسى قاسىم-جومارت توقاەۆتىڭ سيانعا مەملەكەتتىك ساپارى اياسىندا JD.com پلاتفورماسىندا قازاقستاننىڭ ۇلتتىق پاۆيلونى اشىلدى. پاۆيلون ىسكە قوسىلعان العاشقى ساعاتتا 10 مىڭنان استام تاپسىرىس كەلىپ ءتۇستى, ال وسى ۋاقىت ىشىندە ۇسىنىلعان ءونىمنىڭ 80%-ى ساتىلىپ كەتتى. پاۆيلونعا 106 مىڭنان استام قولدانۋشى قول قويدى.
ء«بىز ەلىمىزدىڭ ۇلتتىق پوشتا وپەراتورى «قازپوشتا» اق-ى ارقىلى ىنتىماقتاستىققا مۇددەلىمىز. جاقىن ارادا پوشتا جونەلتىلىمدەرىن جىبەرۋ قۇنىن تومەندەتۋدى جوسپارلاپ وتىرمىز. ءبىز جەتكىزۋ ينفراقۇرىلىمىن قامتاماسىز ەتۋگە دايىنبىز, بىراق جاھاندىق ينفراقۇرىلىممەن ينتەگراتسيالاۋ ءۇشىن ءسىزدىڭ اقپاراتتىق جۇيەلەرىڭىزبەن كومەكتەرىڭىز قاجەت. قازاقستاندا ەلەكتروندىق كوممەرتسيا بويىنشا زاڭناماعا تۇزەتۋلەر ەنگىزىلدى. قازىر ءبىز جاڭا جوبامەن جۇمىس ىستەپ جاتىرمىز, قازاقستاندا قوسىلعان قۇنى جوعارى تاۋارلاردى شوعىرلاندىرۋ جانە ديستريبۋتسيالاۋ بويىنشا تاسىمالداۋدىڭ مۋلتيمودالدى جۇيەسى بار حاب قۇرامىز. تاۋارلاردى تاڭداۋ ءپرينتسيپى بويىنشا: ياعني نەعۇرلىم از جانە قىمبات بولسا, سوعۇرلىم ءتيىمدى بولماق. وسى باعىتتا ىنتىماقتاسۋدى ۇسىنامىز», دەپ ۇسىندى س. جۇمانعارين.
قازاقستاندا پاۆيلون اشۋ جانە كاسىپورىنداردى Alibaba پلاتفورماسىنا شىعارۋ بويىنشا ءساتتى تاجىريبە بار. ەكسپورتتاۋشىلاردى قولداۋدىڭ بۇل قۇرالى ءوزىنىڭ تيىمدىلىگىن كورسەتتى — شامامەن $300 ملن-عا كەلىسىمشارت جاسالدى. الەمدىك الاڭدارمەن ىنتىماقتاستىق شيكىزاتتىق ەمەس ەكسپورتتى ىلگەرىلەتۋگە, قر-دان تاۋارلار جەتكىزۋ كولەمىن ۇلعايتۋعا, سونداي-اق وتاندىق كومپانيالار ءۇشىن قىزىعۋشىلىق تۋدىراتىن جاڭا مۇمكىندىكتەردى اشۋعا سەرپىن بەرەدى.
ءوز كەزەگىندە لارري لي قازاقستاندىق ۇن مەن كەپتىرىلگەن تۇيە ءسۇتى سۇرانىسقا يە ەكەنىن جانە JD.com سايتىندا بەلسەندى ساۋدالاناتىنىن اتاپ ءوتتى.
«ونلاين-ساتىپ الۋلار قازىر بۇرىنعى وفلاين فورماتتى الماستىرۋدا. ءسىز 40 جاسقا تولماعان ساتىپ الۋشىلار توبى ونلاين ساتىپ الۋدى قالايتىن زەرتتەۋلەر تۋرالى ايتتىڭىز. ءبىزدىڭ زەرتتەۋلەرىمىز بويىنشا, بۇرىن ونلاين ساتىپ الۋعا داعدىلانباعان 46 جاستان اسقان ادامدار COVID-19 پاندەمياسىنان كەيىن ادەتتەرىن وزگەرتتى. ءبىز ءوز بەدەلىمىزدى جانە ءونىم ساپاسىن وتە جوعارى باعالايمىز. كەيبىر تۇتىنۋشىلار ءبىزدىڭ باعامىز باسقا سايتتارعا قاراعاندا جوعارى دەيدى. بىراق قحر-داعى تۇتىنۋشىلاردىڭ كوپشىلىگى بۇگىندە ساپا ءۇشىن كوبىرەك اقشا جۇمساۋعا دايىن», دەدى لارري لي.
جيىنعا قاتىسقان «اتامەكەن» ۇكپ پرەزيديۋمىنىڭ توراعاسى رايىمبەك باتالوۆ JD.com سايتىندا ساۋدا جاساي الاتىن قازاقستاندىق جوبالار پۋلىن جىبەرۋدى, سونداي-اق قازاقستاندىق بيزنەسمەندەردى سايتتا ءونىمدى ساتۋ ەرەجەلەرىنە ۇيرەتۋ ءۇشىن بىرلەسكەن باعدارلاما جاساۋدى ۇسىندى. لارري لي ءوز تاراپىنان ۇلتتىق پاۆيلوندا ازىق-ت ۇلىك ونىمدەرىنىڭ جاقسى ساتىلىپ جاتقانىن اتاپ ءوتىپ, مۇنداي تاۋارلاردى جەتكىزۋدى قاراستىرۋ ءۇشىن ىنتىماقتاستىق ورناتۋدى ۇسىندى.
بۇگىندە JD.com ءوز جەتكىزىلىم قىزمەتى ارقىلى قازاقستانعا تاۋار جولدامايدى.
«قازاقستان – ۇلكەن اۋماق. سىزدە ىشكى كولىك پەن لوگيستيكا بولعان كەزدە كوبىرەك تاۋارلار ساتىلادى, بۇل ءبىزدى قىزىقتىرادى. ساۋدانى بىرگە ۇلعايتىپ, قىتاي نارىعىنا شىعاتىن ونىمدەردى جاقسارتۋ بويىنشا جۇمىس ىستەي الار ەدىك», دەپ ۇسىنىس جاسادى كەزدەسۋ سوڭىندا لارري لي.
كەزدەسۋ قورىتىندىسى بويىنشا تاراپتار «قازپوچتا» اق وكىلدەرىمەن لوگيستيكا مەن تاۋارلاردى جەتكىزۋ جۇيەسىن قۇرۋ بويىنشا كەلىسسوزدەردى جالعاستىرۋعا كەلىستى.
