فوتو: ۇكىمەتتىڭ ءباسپاسوز قىزمەتى
كەڭەسكە قاتىسۋشىلاردىڭ نازارىنا ماڭعىستاۋ اتوم ەنەرگەتيكالىق كومبيناتىنداعى (ماەك) جوندەۋ جۇمىستارىنىڭ بارىسى جانە جالپى ماڭعىستاۋ وبلىسىن ەلەكترمەن تۇراقتى تۇردە قامتاماسىز ەتۋ بويىنشا قابىلدانىپ جاتقان شارالار تۋرالى بايانداما ۇسىنىلدى.
ماسەلەن, جەدەل ءىس-شارالاردى جۇزەگە اسىرۋ شەڭبەرىندە جاڭا ەلەكتر جەلىلەرى نىساندارىن سالۋ ارقىلى باتىس ەنەرگەتيكالىق ايماعىن نىعايتۋ جونىندەگى جوبانى اياقتاۋ جوسپارلانىپ وتىر. بۇل تۇتىنۋشىلاردى ەنەرگيا قۋاتىنان شەكتەمەۋگە مۇمكىندىك بەرەدى, ويتكەنى ماەك ەنەرگوبلوكتارى اجىراتىلعاننىڭ وزىندە ەلەكتر ەنەرگياسىنىڭ تاپشىلىعى ورال-اتىراۋ-ماڭعىستاۋ ءترانزيتى ارقىلى وتەلەدى.
سونىمەن قاتار ماڭعىستاۋ وبلىسىندا ەلەكتر ەنەرگياسىن تۇتىنۋدىڭ بولجامدى ءوسىمىن ەسكەرە وتىرىپ, بىرقاتار ۇزاق مەرزىمدى شارالار ازىرلەندى. ولاردىڭ قاتارىندا 500 كۆ ەلەكتر بەرۋ جەلىسىن سالۋ ارقىلى باتىس ەنەرگەتيكالىق جۇيەسىن قازاقستاننىڭ بىرىڭعاي ەنەرگوجۇيەسىمەن بىرىكتىرۋ, سونداي-اق باتىس ايماقتا جاڭا گەنەراتسيالاۋ جوبالارىن ىسكە قوسۋ بار. ماسەلە بازالىق جانە مانەۆرلىك گەنەراتسيالاناتىن گاز ستانسالارى جانە جاڭارتىلاتىن ەنەرگيا كوزدەرىنە نەگىزدەلگەن گيبريدتى ستانسالار سالۋ تۋرالى بولىپ وتىر. سونىمەن قاتار وبلىستاعى جۇمىس ىستەپ تۇرعان ستانسالارعا دا جاڭعىرتۋ جۇمىستارى جۇرگىزىلەتىن بولادى.
پرەمەر-مينيستر ماڭعىستاۋ وبلىسىنا قاجەتتى ەنەرگەتيكا سالاسىنداعى جوبالاردى ىسكە اسىرۋدى جەدەلدەتۋدى جانە بۇرىن جوسپارلانعانداي 2027-2028 جىلدارعا ەمەس, نىسانالى مەرزىمدەر رەتىندە الداعى 2024-2026 جىلدارعا باعىتتاۋدى تالاپ ەتتى.
سونداي-اق ءاليحان سمايىلوۆ تۇتىنۋشىلاردىڭ ەلەكتر جارىعىن سوندىرمەۋ ءۇشىن ءوڭىردى ەلەكترمەن تۇراقتى تۇردە قامتاماسىز ەتۋ جۇمىستارىن جىل سوڭىنا دەيىن اياقتاۋ قاجەتتىگىن ايتتى.
