«جىر جاۋھارى» دەپ اتالعان پوەتيكالىق دۋەلگە ءوڭىردىڭ ءار قيىرىنان كەلگەن 16 جاس اقىن قاتىستى. جەرەبە ارقىلى انىقتالعان سەگىز جۇپتان ەكىنشى كەزەڭگە سەگىز اقىن ىرىكتەلىپ شىقتى. ولاردىڭ ىشىندە جاڭا ەسىمدەر دە جوق ەمەس.
قايرات رىسقۇلبەكوۆ اتىنداعى ساياباقتىڭ ساياسىندا ورنالاسقان «عيبرات» مەيرامحاناسىندا وتكەن ءىس-شارادا جاس اقىندار ەركىن كوسىلدى. ءتىپتى كەيبىرىنىڭ ولەڭدەرىنەن بولاشاق سۋرەتكەر اقىنعا ءتان قولتاڭبا دا اڭعارىلىپ تۇردى.
توپقا تۇسكەن ون التىنىڭ ىشىندە وسالى جوق. سودان دا بولسا كەرەك, ءىس-شارانى ۇيىمداستىرعان جاستار ساياساتى ماسەلەلەرى باسقارماسى «بايگە بەرەم جىعىلعان بالۋانعا دا, ادالدىعى كورىنىپ تۇرار بولسا» دەپ جىرلاعان تولەگەن ايبەرگەنوۆتىڭ ولەڭىن نەگىزگە الىپ, جەڭىلگەن اقىنداردى دا قۇرالاقان قايتارعان جوق.
پوەتيكالىق دۋەل قورىتىندىسىندا
«و,قوڭىر كۇز, وزىڭە سىر اقتاردىم,
ۇنسىزدىكتى جالعاندا ۇناتقان كىم؟
ساعان ولەڭ وقىپ ەم تىڭدامادىڭ,
اسپانعا ولەڭ وقىپ ەم, جىلاپ قالدى»,
دەپ جىرلاعان قۇلاندىق ءالىمجان شوڭگەرباي جەڭىمپاز اتانسا, تارازدىق عاينيكەن مارالتايقىزى ەكىنشى, جۇماتاي كوكسۋباي مەن سىمبات سۇلتان ءۇشىنشى ورىنعا لايىق دەپ تانىلدى. تاعى بىرنەشە اقىن ارنايى اتالىم يەگەرى اتاندى. جۇلدەگەر اتانعان اقىنداردىڭ بارلىعىنا قوماقتى قارجىلاي سىيلىق تابىستالدى.
جامبىل وبلىسى
