دامير بەكبوسىنوۆتىڭ ايتۋىنشا, مادەنيەت جانە سپورت مينيسترلىگىنىڭ قولداۋىمەن Qazaq kuresi اسسوتسياتسياسى قازاق كۇرەسىن دامىتۋعا جانە ونى مەكتەپ باعدارلاماسىنا ەنگىزۋ باعىتىندا كەشەندى جۇمىستار جۇرگىزىپ جاتىر. ونى ءپان رەتىندە وقىتۋ ەڭ العاش 2021 جىلى استانا قالاسىنداعى مەكتەپتەردە اپروباتسيادان وتكەن ەدى. وعان قوسا, نازارباەۆ زياتكەرلىك مەكتەپتەرىمەن بىرگە 2020-2021 وقۋ جىلىنا ارنالعان قازاق كۇرەسىن دامىتۋ جونىندەگى ءىس-شارالاردىڭ بىرلەسكەن جوسپارى ازىرلەنىپ, ىسكە اسىرىلعان. پيلوتتىق جوبانىڭ تيىمدىلىگى ايقىندالىپ, جاقسى ناتيجە كورسەتكەندىكتەن بۇگىندە استانانىڭ 28 مەكتەبىندە قازاق كۇرەسى ءۆارياتيۆتى ءپان رەتىندە وقىتىلادى.
«ەلىمىزدە قازاق كۇرەسىمەن جۇيەلى تۇردە اينالىساتىنداردىڭ سانى 159 مىڭعا جەتتى, 4 427 قازاق كۇرەسى ۇيىرمەسى جۇمىس ىستەيدى. ۇلتتىق سپورت ءتۇرىن دامىتۋ باعىتىنداعى كەشەندى جۇمىستىڭ ناتيجەسىندە مادەنيەت جانە سپورت مينيسترلىگى بۇل كورسەتكىشتى ودان ءارى ارتتىرۋعا نيەتتى», دەدى Qazaq Kuresi اسسوتسياتسياسىنىڭ اتقارۋشى ديرەكتورى.
سونداي-اق قر مسم سپورت جانە دەنە شىنىقتىرۋ ىستەرى كوميتەتىنىڭ توراعاسى ەربول مىرزابوسىنوۆتىڭ ايتۋىنشا, قازاق كۇرەسى سپورتى اسىرەسە اۋدانداردا, اۋىلداردا قارقىندى دامىپ جاتىر, ويتكەنى بۇل شىعىنى از, كوپشىلىك ءۇشىن قولجەتىمدى سپورت ءتۇرى بولىپ سانالادى. بىراق قالا جاستارىن دا ۇلتتىق سپورت تۇرىنە باۋلۋ ماقساتىندا جۇمىستار جۇرگىزىلۋدە. قازاق كۇرەسى تەك سپورتتىڭ ءبىر ءتۇرى عانا ەمەس, جاستاردىڭ جىگىتتىك بولمىسىن قالىپتاستىراتىن تاربيە قۇرالى ەكەنىن ەسكەرسەك, ۇلتتىق سپورت ءتۇرىن مەكتەپ باعدارلاماسىنا ەنگىزۋدىڭ ماڭىزى جوعارى.
