فوتو: ماڭعىستاۋ وبلىسىنىڭ اكىمدىگى
ايماقتاعى ەلدى مەكەندەردى بىركەلكى جابدىقتاۋدى قامتاماسىز ەتۋ ءۇشىن ۋاقىتشا اجىراتۋلاردى ء«تيىمدى» ادىسپەن جۇرگىزۋ جوسپارلانعان. بۇل بەلگىلى ءبىر ايماققا سايكەس تۇتىنىلاتىن ەنەرگيا كولەمىن ازايتۋ ماقساتىندا, تۇتىنۋشىلار ءۇشىن ەلەكتر قۋاتى 3-تەن 5 ساعاتقا دەيىن تسيكلدىك تۇردە وشىرىلەتىنىن بىلدىرەدى. تۇرمىستىق ەنەرگيا تۇتىنۋشىلارىنا جوسپارلانعان ۇزىلىستەر جايلى الدىن-الا حابارلاناتىن بولادى.
«ماەك» جشس-دە ەلەكتر ەنەرگياسىنىڭ جالپى ءوندىرىس قۋاتتىلىعى 545 مۆت قۇرايدى. الايدا ەكى ەلەكتر ستانتسياسىنداعى ەنەرگەتيكالىق بلوگتاردىڭ ءماجبۇرلى توقتاۋىنا بايلانىستى ءوندىرىس قۋاتتىلىعى قازىرگى تاڭدا 245 مۆت-قا دەيىن قىسقارعان.
وسى ورايدا ايماق باسشىلىعى مەملەكەتتىك ورگاندار جانە كوممۋنالدىق قىزمەت وكىلدەرىمەن بىرگە ەڭ الدىمەن الەۋمەتتىك وبەكتىلەردى ەلەكتر ەنەرگياسىمەن قامتاماسىز ەتۋ بويىنشا جەدەل شتاب قۇرعان.
«وبلىس باسشىلىعىنىڭ توراعالىعىمەن قۇرىلعان جەدەل شتابقا ۋاكىلەتتى مەملەكەتتىك ورگاندار مەن كوممۋنالدىق قىزمەت وكىلدەرى كىردى. ولار ەلەكتر ەنەرگياسىن ءوشىرۋ ءبىرىنشى كەزەكتە ونەركاسىپتىك وبەكتىلەرگە اسەر ەتەتىنى تۋرالى شەشىم قابىلدادى. بۇل شەشىم تۇرمىستىق ەنەرگيا تۇتىنۋشىلارىنا ىڭعايسىزدىق تۋدىرماۋ ءۇشىن قابىلدانىپ وتىر. كەيبىر كەن ورىندارى گەنەراتورلارمەن جابدىقتالعان, ال باسقا نىسانداردا جاعداي قيىنىراق. سونىمەن قاتار اۋرۋحانالار, بالاباقشالار سياقتى الەۋمەتتىك نىساندار ەلەكتر قۋاتىمەن قامتاماسىز ەتىلەتىن بولادى. ءبىز تۇرعىنداردان ارانداتۋشىلىققا بوي الدىرماۋدى, تەك رەسمي دەرەككوزدەرگە سەنۋدى سۇرايمىز», دەدى «ماڭعىستاۋ وڭىرلىك ەلەكتر جەلىسى كومپانياسى» اق باسقارما توراعاسى قاسىمحان سىزدىقوۆ.
جەدەل شتاب وتىرىسىندا توتەنشە جاعداي رەجيمىن ەنگىزۋ تۋرالى ماسەلە قارالدى.
«تج ەنگىزۋ تۋرالى ماسەلە قارالۋدا. ازىرگە بۇل شارا ءتيىستى ناتيجە بەرمەيدى دەپ ەسەپتەيمىز, ويتكەنى تج رەجيمى تەك مەملەكەتتىك ساتىپ الۋعا قاتىستى شەكتەۋلەر ەنگىزۋگە مۇمكىندىك بەرەدى. بولعان جاعدايدا ءبىزدى جۇيەلىك وپەراتور - «KEGOC» اق قولداپ وتىر, ول بىزگە 80 مۆت-قا دەيىن الۋعا كومەكتەسەدى», دەپ ءتۇسىندىردى جۇماباي قاراعاەۆ.
قازىرگى ۋاقىتتا جەدەل شتاب وڭىردە ەلەكتر ەنەرگياسىن بەرۋدى جەدەل قالپىنا كەلتىرۋ بويىنشا جۇمىس ىستەپ جاتىر.
- «ماەك»-تەگى اپات جويىلعانعا دەيىن ءوڭىر تۇرعىندارىن وسى جاعدايعا تۇسىنىستىكپەن قاراۋعا, ەلەكتر ەنەرگياسىن ۇنەمدى تۇتىنۋعا شاقىرامىن. كوممۋنالدىق قىزمەت ماماندارى كۇندىز-ءتۇنى ەنەرگيا بلوكتارىنىڭ جۇمىسىن تەز قالپىنا كەلتىرۋ ءۇشىن جۇمىس اتقارۋدا. بۇگىن ءبىز ء«تيىمدى» ءوشىرۋدىڭ ەڭ جوعارى جۇكتەمەلەرىن سىناقتان وتكىزىپ جاتىرمىز, ەرتەڭنەن باستاپ تۇرعىندارعا بارىنشا ىڭعايلى بولۋ ءۇشىن, ەلدى مەكەندەردى اجىراتۋ كەستەسىن الدىن-الا ۇسىناتىن بولامىز, - دەپ قورىتىندىلادى جۇماباي قاراعاەۆ.
