تاياۋدا وبلىستىق ءبىلىم باسقارماسى ارنايى ءباسپاسوز تۋرىن ۇيىمداستىرىپ, اتا-انالاردى, جەرگىلىكتى قوعامدىق ۇيىمدار مەن جۋرناليستەردى جازعى دەمالىس لاگەرلەرىن ارالاپ, ونداعى بالالاردىڭ جاعدايىن ءبىلىپ قايتۋعا شاقىرعان. وسىلايشا, باسقارما باسشىسىنىڭ ورىنباسارى داناگۇل سۇيىندىكوۆا باستاعان توپ ايگىلى «سوسنوۆىي بور» شيپاجايىنىڭ ىرگەسىندەگى گەنەرال باكىروۆ اتىنداعى دەمالىس ورنىنا, التىنسارين اۋدانىنداعى بوزبەك اۋىلىنىڭ ماڭىنداعى ورمان ىشىنە ورنالاسقان «بولاشاق» بالالار ساۋىقتىرۋ لاگەرى مەن قوستاناي اۋدانىنداعى «التىنگۇل» بالالار ساۋىقتىرۋ لاگەرىندە بولىپ قايتتىق.
«التىنگۇل» لاگەرىندە 7 جاستان 15 جاسقا دەيىنگى ەرەكشە بالالار دەمالىپ جاتىر ەكەن. بالاقايلار كۇندەلىكتى پسيحولوگيالىق-پەداگوگيكالىق تۇزەتۋ جانە وڭالتۋ-دامىتۋ ەم-شارالارىن الىپ وتىر.
– قازىر لاگەردە ءۇشىنشى اۋىسىمداعى 32 بالا دەمالىپ جاتىر. دەمالىس ورنىنىڭ اۋماعى – 7 گەكتار. لاگەر تولىقتاي بەينەكامەرامەن جابدىقتالعان. ءبىر اۋىسىمدا 50 بالاعا دەيىن قابىلداي الامىز. ءار توپتا 12 بالادان بار. ولارعا ەكى تاربيەشى جانە ولاردىڭ كومەكشىلەرى قارايدى. بالالاردىڭ قاۋىپسىزدىگىن ءار اۋىسىمدا كەزەكشىلىك ەتۋ ارقىلى ەكى ۋچاسكەلىك مامان قامتاماسىز ەتەدى. لاگەردىڭ ءتورتىنشى اۋىسىمىندا ۇيدە وقيتىن بالالار كەلەدى دەپ جوسپارلاپ وتىرمىز. بالالار انالارىمەن بىرگە كەلىپ دەمالاتىن بولادى. اتا-انالار قالاعان ۋاقىتتارىندا كەلىپ, بالالارىنىڭ جاعدايىن بىلە الادى, – دەيدى دەمالىس كەشەنىنىڭ ديرەكتورى گۇلشات جۇماباەۆا.
وكسانا ستاسيۋك ەكىنشى جىل قاتارىنان «التىنگۇل» لاگەرىندە جۇمىس ىستەپ كەلەدى. ماماندىعى – ناۋبايشى: بالالاردىڭ كۇندەلىكتى جەيتىن ىستىق نانىن, ءتاتتى توقاشىن ءپىسىرىپ بەرەدى. بالعىندار كۇنىنە التى ۋاقىت تاماقتانادى. تاعامنىڭ دايىندالۋ ساپاسى مەن ازىق-ت ۇلىكتىڭ دۇرىس ساقتالۋىن ديەتولوگ دارىگەر قاداعالاپ وتىرادى. «بارلىعىن قولدان پىسىرەمىز. بالالارعا ءبارى ۇنايدى. العىستارىن ايتىپ كەتەدى. جالپى, بۇل سالادا جۇرگەنىمە 10 جىلدان استى», دەيدى و.ستاسيۋك.
التىنسارين اۋدانىنا قاراستى بوزبەك اۋىلىنىڭ ماڭىنداعى «بولاشاق» بالالار ساۋىقتىرۋ لاگەرىندە ءبىر اۋىسىم ىشىندە قوستاناي, اقتاۋ, اقتوبە, قاراعاندى, اقمولا وبلىستارى مەن استانادان كەلگەن 600-دەي بالا دەمالادى.
قازىر مۇندا وبلىستىق ءبىلىم باسقارماسىنىڭ باعدارلاماسى اياسىندا بالالار لاگەرلەرى اراسىنداعى وڭىرلىك سپارتاكيادا ءوتىپ جاتىر. سپورتتىق ءىس-شاراعا «چايكا», «ورلەنوك» بالالار-ساۋىقتىرۋ لاگەرلەرى, گەنەرال باكىروۆ اتىنداعى دەمالىس ورنى مەن «بولاشاق» بالالار ساۋىقتىرۋ لاگەرىنىڭ كىشكەنتاي تۇرعىندارى قاتىسىپ جاتىر. بالالار سپورتتىڭ توعىزقۇمالاق, فۋتبول, ۆولەيبول سىندى تۇرلەرىنەن سايىسقا تۇسەدى. اۋماعى اينالا قورشالعان لاگەردىڭ قاۋىپسىزدىگى 21 بەينەباقىلاۋ كامەراسى ارقىلى كۇزەتىلەدى. بەيساۋات جۇرگەن بەيتانىس ادامداردىڭ كىرىپ كەتپەۋىن كۇزەتشىلەر مەن ەكى پوليتسيا قىزمەتكەرى قالت جىبەرمەي قاداعالاپ وتىرادى. قازىر بۇل لاگەردە بەسىنشى اۋىسىمداعى 480 بالا دەمالىپ جاتىر. لاگەر باسشىسىنىڭ ايتۋىنا قاراعاندا, مۇندا جاز بويى ۇزىن سانى ءۇش مىڭ بالاعا دەيىن دەمالىپ كەتەدى. ماسەلەن, اقتوبەلىك ءجانيا ايبات ەسىمدى بالاقاي جازعى دەمالىس لاگەرىنە العاش رەت كەلىپ وتىر.
– 5-سىنىپتا وقيمىن. ماعان ءبارى قاتتى ۇنادى. وزىمە جاڭا دوستار تاپتىم. وتە كوڭىلدى. ءتۇرلى ويىن-ساۋىق ءىس-شاراسى ۇيىمداستىرىلادى. تاماقتارى دا وتە ءدامدى. شىلدە ايىنىڭ اياعىندا كەلگەنمىن. كوزدى اشىپ-جۇمعانشا, كەتەتىن كۇن دە تاياپ قالدى, – دەيدى ءجانيا.
ال دەرجاۆين قالاسىنىڭ تۇرعىنى ادەمى نازحان توبىل وڭىرىندەگى بالالار لاگەرىنە وسىمەن ءۇشىنشى رەت كەلىپ وتىر. «جاسىم – ون ەكىدە. تاربيەشىلەرىمىز بەن جەتەكشىلەرىمىزدىڭ ءبارى مەيىرىمدى, جاقسى ادامدار. كەشكە تامان ارنايى بي كەشى بولادى. ول جەردە دە قىزىقتى بايقاۋلار وتەدى. سپارتاكيادا اياسىندا ۆولەيبول جارىسىنا قاتىسىپ جاتىرمىن», دەيدى ەكى بەتى بال-بۇل جانعان ادەمى.
ساپار سوڭىندا قىزىق-قۋانىشى كول-كوسىر جايدارى جازدىڭ جارقىن كۇندەرىن تازا اۋا, تۇمسا تابيعات اياسىندا وتكىزىپ جاتقان بالالاردىڭ شات كۇلكىسىن قيماي-قيماي قوشتاستىق.
