«قاراعاندى وبلىسىنىڭ ارناۋلى الەۋمەتتىك قىزمەت كورسەتۋ ورتالىعىنان اۋرۋحاناعا تۇسكەن 14 بالانىڭ جەتەۋى ساۋىعىپ, اۋرۋحانادان شىعارىلدى. قازىرگى تاڭدا ولار سول ورتالىقتاعى دارىگەرلەردىڭ باقىلاۋىندا. التى بالا رەانيماتسيا بولىمشەسىندە جاتىر, ءتورت بالانىڭ جاعدايى وڭ ديناميكامەن اۋىر جاعدايدا قالىپ وتىر. ەكى بالانىڭ جاعدايى وتە اۋىر كۇيدە. جاعدايدىڭ اۋىرلىعى نەۆرولوگيالىق جانە ينتوكسيكاتسيالىق سيندرومىنا, تىنىس الۋ جەتكىلىكسىزدىگىنە بايلانىستى بولىپ وتىر», دەدى ا. عينيات.
سونداي-اق دەنساۋلىق ساقتاۋ ءمينيسترى وسى وقيعا بويىنشا رەسپۋبليكالىق جانە وبلىستىق دەڭگەيدەگى مامانداردىڭ كەڭەيتىلگەن كونسيليۋمدارى كۇن سايىن ۇيىمداستىرىلىپ جاتقانىن اتاپ ءوتتى.
«مينيسترلىك زارداپ شەككەن بالالاردىڭ جاعدايىنا مونيتورينگ جۇرگىزۋدى جانە مەديتسينالىق كومەك كورسەتۋدى جالعاستىرىپ جاتىر. دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق باقىلاۋ كوميتەتى ەپيدەمياعا قارسى جانە تەكسەرۋ ءىس-شارالارىن جالعاستىرىپ وتىر. الدىن الا ەپيدەميلوگيالىق تەكسەرۋ, زەرتحانالىق زەرتتەۋ ناتيجەلەرى اۋرۋدىڭ تارالۋ سيپاتى تاماقتان ۋلانۋدان بولماعانىن, سونداي-اق ينفەكتسيالىق اۋرۋلاردىڭ جوقتىعىن كورسەتتى. بۇل جاعدايدىڭ سەبەبىنە توقتالساق, دارىگەرلەر بالالار توكسيندى زاتتان قاتتى ۋلاندى دەپ پايىمدايدى. قازىر سوت-مەديتسينالىق ساراپتاما ءجۇرىپ جاتىر. بالالاردىڭ جاعدايى مينيسترلىكتىڭ ەرەكشە باقىلاۋىندا», دەدى مينيستر.
