فوتو: ۇكىمەتتىڭ رەسمي سايتى
«اۋعانستان قازاقستان ءۇشىن ۇن وتكىزەتىن نەگىزگى نارىق بولىپ سانالادى, وعان ۇن ەكسپورتىنىڭ جالپى كولەمىنىڭ 70%-ى تيەسىلى. قازىرگى ۋاقىتتا ءبىز ەكسپورتتىق سەبەتتى ءارتاراپتاندىرۋ ءۇردىسىن كورىپ وتىرمىز. ءبىزدىڭ ەسەپتەر بويىنشا قازاقستاننىڭ اۋعانستانعا ازىق-ت ۇلىك, مۇناي-حيميا, حيميا, مەتاللۋرگيا, جەڭىل, ماشينا جاساۋ سالالارى بويىنشا $500 ملن سوماسىنا تاۋار جەتكىزەتىن ەكسپورتتىق الەۋەتى بار», دەپ حابارلادى فورۋمدا قر پرەمەر-ءمينيسترىنىڭ ورىنباسارى - ساۋدا جانە ينتەگراتسيا ءمينيسترى سەرىك جۇمانعارين.
ۆيتسە-پرەمەردىڭ ايتۋىنشا, بارلىق ورتالىق ازيا ەلدەرىنىڭ ىشىندە اۋعانستان قازاقستانمەن ءجيسى ساۋدالاسادى. ەكى ەل اراسىنداعى ءوزارا تاۋار اينالىمى شامامەن $1 ملرد-قا جەتتى, بولاشاقتا ساۋدا كولەمىن $3 ملرد-قا دەيىن ۇلعايتۋ جوسپارلانىپ وتىر. بيىل گەراتتا قازاقستاننىڭ ساۋدا ءۇيى اشىلدى, بۇل ەكى ەل اراسىنداعى ەكسپورتتىق-يمپورتتىق تاسىمالدى ۇلعايتۋعا جانە ارتاراپتاندىرۋعا مۇمكىندىك بەرەدى.
اۋعانستان حالقى شامامەن 40 ميلليون ادامنان تۇرادى. بۇل رەتتە ەلىمىز ساۋدا-ساتتىق سالاسىندا قىزىعۋشىلىق تانىتىپ وتىرعان پاكىستان مەن ءۇندىستاننىڭ, سونداي-اق تاياۋ شىعىستىڭ جاقىن ماڭداعى كەڭ نارىقتارىنا شىعا الادى. وسى تۇرعىدا قازاقستاننىڭ اۋعانستان ارقىلى وتەتىن ساۋدا باعىتتارىن ءارتاراپتاندىرۋ ساۋدا قاتىناستارىن دامىتۋعا جانە ەكى ەلدىڭ ەكونوميكاسىن نىعايتۋعا ىقپال ەتەتىن بولادى. ءبىرىنشى جارتىجىلدىقتا قازاقستان پاكىستاندىق كارتوپتىڭ يمپورتىن اۋعانستان اۋماعى ارقىلى وتەتىن جانە پاكىستاندى ورتالىق ازيا ەلدەرىمەن, ونىڭ ىشىندە ءبىزدىڭ ەلمەن بايلانىستىراتىن ەڭ قىسقا اۆتوموبيل جولى ارقىلى جۇزەگە اسىردى.
بۇگىندە قازاقستاندىق بيزنەس ءوڭىردىڭ بارلىق ەلىمەن ءوزارا ءىس-قيمىل جاسايدى. ساۋدانىڭ قاۋىپسىزدىگى مەن تارتىمدىلىعىن قامتاماسىز ەتۋ ءۇشىن تاراپتار ءوزارا ساۋدا-ساتتىق ءۇشىن وڭتايلى جاعداي جاساۋعا كەلىسۋدە.
«بۇگىندە تۇرىكمەنستان ءوز اۋماعى بويىنشا تاسىمالداردى دامىتۋعا مۇددەلى جانە ءوز اۋماعىندا جەڭىلدىكپەن ترانزيتتىك تاريف ۇسىنۋعا دايىن. بۇل باعىت, ەڭ الدىمەن, ۇن تارتاتىن ونىمدەرگە بالاما جونەلتۋ باعىتى بولا الادى. وسى ماقساتتار ءۇشىن شيكىزاتتىق ەمەس تاۋارلاردىڭ ەكسپورتىن ىلگەرىلەتۋدىڭ بىرىڭعاي وپەراتورى QazTrade وتاندىق تاۋارلاردى بولاشاق ستانتسياسىنا دەيىن جەتكىزۋدى ارزانداتۋدى قامتاماسىز ەتەدى. سونىمەن قاتار ءبىز وزبەكستانمەن ەكى ەل اۋماقتارىمەن ترانزيتتىك تەمىرجول تاسىمالدارىنا جەڭىلدىك شارتتارىن ۇسىنۋ بويىنشا ۋاعدالاستىقتاردى نىعايتتىق, وسىلايشا ءبىز اۋعانستانعا ۇن مەن استىقتى تەپە-تەڭ نەگىزدە جەتكىزەمىز», دەدى سەرىك جۇمانعارين.
ترانزيتتىك-كولىك جۇيەسىن كەڭەيتۋ ءۇشىن 2021 جىلى وزبەكستان, اۋعانستان جانە پاكىستان بيلىگى تەرمەز – مازاري – شاريف – كابۋل – پەشاۆار ترانسافگان تەمىرجولىن ۇزارتۋعا كەلىستى. بۇل مارشرۋتتى سالۋ تەك تاشكەنت, كابۋل جانە يسلاماباد ءۇشىن عانا ەمەس, سونداي-اق ازيا ايماعىنىڭ باسقا ەلدەرى, سونداي-اق تاياۋ شىعىس ءۇشىن دە ساۋدا جولدارىن اشادى.
«قازاقستان مازاري – شاريف – كابۋل – پەشاۆار تەمىرجول ترانسافگان كولىك ءدالىزىن سالۋ باستاماسىن جوعارى باعالايدى, بۇل ورتالىق ازيا مەملەكەتتەرىنىڭ وڭتۇستىك ازيا, تاياۋ شىعىس ەلدەرىمەن ۇزدىكسىز وڭىرارالىق ىنتىماقتاستىعىن قامتاماسىز ەتۋگە مۇمكىندىك بەرەدى. بۇل باعىت ساۋدا-ەكونوميكالىق قاتىناستار ديناميكاسىنا جاڭا سەرپىن بەرەدى», دەدى سەرىك جۇمانعارين.
قازاقستاندىق تاراپتىڭ پىكىرىنشە, اۋعانستانمەن ەنەرگەتيكا سالاسىنداعى ىنتىماقتاستىق ءۇشىن جاقسى پەرسپەكتيۆالار بار. اتاپ ايتقاندا, مۇناي مەن گازدى ءوندىرۋ جانە تاسىمالداۋ جونىندەگى جوبالاردى ىسكە اسىرۋ ەلدەرگە ءوز ەكونوميكاسىن نىعايتۋعا مۇمكىندىك بەرەدى.
قازاق-اۋعان بيزنەس-فورۋمىن وتكىزۋ اياسىندا B2B كەلىسسوزدەرى ءوتتى, وعان ەكى ەلدىڭ ىسكەر توپتارىنان 250 وكىل قاتىستى.
