2022 جىلعى شىلدەمەن سالىستىرعاندا كەڭسە تاۋارلارى – 64,4%, كۇرىش – 44,3%, قانتسىز قويۋلاندىرىلعان ءسۇت – 42,4%, كۇندىزگى ستاتسيونارلىق ەمدەۋ – 40,8%, ىدىس جۋعا ارنالعان قۇرالدار – 37,4%, كىر سابىن – 35,9%, قىرىققابات – 27,5%, توساپ, دجەم 25,9%-عا قىمباتتادى. كەرىسىنشە, جىلدىق ماندە قۇمشەكەر – 17,4%, قاراقۇمىق جارماسى – 10,5%, كۇنباعىس مايى – 4,7%, قىزىلشا – 6,1%, ءسابىز – 3,4%, كارتوپ 1,3%-عا ارزانداعان.
ينفلياتسيا دەڭگەيىن سيپاتتايتىن تۇتىنۋ باعالارى يندەكسىنىڭ كورسەتكىشى اي سايىن ەسەپتەلەدى. قىزمەتتەر مەن تاۋارلاردىڭ تاريفتەرى مەن باعالارى – بارلىعى 508 پوزيتسيا بويىنشا باقىلانادى. باعالاردى تىركەۋ بارلىق وبلىس ورتالىعىندا, استانادا جانە قالالار مەن اۋدان ورتالىقتارىنىڭ بەلگىلى ءبىر شەڭبەرىندە ءارتۇرلى مەنشىك نىسانىنداعى ساۋدا جانە قىزمەت كورسەتۋ سالاسى كاسىپورىندارىنىڭ ىرىكتەمەلى جەلىسى بويىنشا جۇرگىزىلەدى.
جالپى العاندا, تاماقتانۋ ونىمدەرى مەن الكوگولسىز سۋسىندار, تۇرعىن ءۇي قىزمەتتەرى, كيىم جانە اياقكيىم, ءارتۇرلى تاۋار مەن قىزمەت جىلدىق ينفلياتسياعا ەرەكشە ۇلەس قوسقان.
ساراپشىلاردىڭ ايتۋىنشا, سەرۆيستىك قىزمەتتەر ەسەبىنەن ايلىق ينفلياتسيا ءوسىمىن ەسەپكە الماعاندا, تۇتىنۋشىلىق ينفلياتسيانىڭ ءارى قاراي دا باياۋلاۋى بايقالادى. وتكەن ايدان بەرى جانار-جاعارماي جانە تۇرعىن ءۇي-كوممۋنالدىق شارۋاشىلىق باعالارى قىمباتتاي باستادى. بۇل دا ءوز كەزەگىندە باعا ءوسىمىنىڭ باياۋلاۋىن تەجەيدى.
