وبلىس اكىمىنىڭ ورىنباسارى باقىتجان باياحمەتوۆتىڭ ايتۋىنشا, قازىرگى ۋاقىتتا جىلۋ ەلەكتر ورتالىعىندا 11 مەردىگەر ۇيىم, 264 مامان جۇمىس ىستەپ جاتىر ەكەن. جوندەۋگە قاجەتتى ماتەريالدار مەن جابدىقتار تولىقتاي جەتكىزىلگەن. جۇمىستى جەدەلدەتۋ ءۇشىن قىزمەتكەرلەر ەكى اۋىسىمدا ەڭبەك ەتىپ جاتىر. كاسىپورىن قىزمەتكەرلەرىنىڭ ماۋسىم ايىنداعى ەڭبەكاقىسى جىلىتۋ ماۋسىمىنا دەيىن وتەلدى. ال وت جاعۋ ۋاقىتى باستالعانعا دەيىن 3 قازاندىقتى جوندەۋ جۇمىستارىن اياقتاۋ جوسپارلانعان. ءتورتىنشى قازاندىق قاراشا ايىندا اياقتالادى. سونداي-اق رەزەرۆتىك نۇسقا رەتىندە ريددەر قالاسىنداعى «كازتسينك» جشس قازاندىعىنا قوسۋ جۇمىستارى دا ويلاستىرىلعان.
بۇل ريددەر تۇرعىندارى ءۇشىن وتە وزەكتى ماسەلە. سوندىقتان قازاندىقتى قالپىنا كەلتىرۋ جۇمىستارى «Amanat» پارتياسىنىڭ وبلىستىق فيليالى باسشىلىعىنىڭ, رفپ جانە تفپ پارتيالىق باقىلاۋ كوميسسياسىنىڭ, دەپۋتاتتىق كورپۋستىڭ تۇراقتى باقىلاۋىندا. ايتا كەتسەك, ريددەر جەو-دا پارتيالىق باقىلاۋ بەكەتى اعىمداعى جىلدىڭ ءساۋىر ايىنان باستاپ اشىلعان.
البەتتە, جۇرگىزىلىپ جاتقان جۇمىستارعا جان-جاقتى باقىلاۋ, قاداعالاۋ قاجەت. وتكەن قىستا ريددەردەگى قانشاما پاتەر, قانشاما الەۋمەتتىك عيماراتتار جىلۋسىز قالدى؟! مەكتەپتەر مەن بالاباقشالاردىڭ جىلۋسىز قالىپ, قاشىقتىقتان وقىتۋعا كوشكەنى دە ەلدىڭ ەسىندە. ءبىراز ۋاقىتقا توتەنشە جاعداي جاريالانىپ, قازاندىقتى لەكەرلەپ الىپ, قىستان شىققان. سول ۇشىندە ەل الاڭداۋلى. بيىلعى قىستان قىسىلماي شىقساق ەكەن دەپ تىلەيدى.
«قىسىمىز – ۇزاق, ءارى قاتال. ونى ءبارى بىلەدى. وكىنىشتىسى سول, وتكەن قىستان توڭىپ شىقتىق. بالالار كۇرك-كۇرك جوتەلدى, اۋىردى. قازاندىقتىڭ نەشە رەت سىنىپ, نەشە رەت ورتەنگەنى ەستە جوق. ودان ءبىر ينۆەستور اقشا قۇيادى دەگەندى ەستىپ قۋاندىق. سويتسەك ول دا وتىرىك بولىپ شىقتى. ايتەۋىر, جان-جاقتان باقىلاۋعا الىپ جاتىر. وڭ شەشىمى تابىلاتىن شىعار» دەيدى كۇماندانا پىكىر بىلدىرگەن ريددەر تۇرعىنى مايرا دونەنباەۆا.
حالىقتىڭ سەنىمىنە قايتا كىرۋ قيىننىڭ قيىنى. قۇرعاق ۋادەدەن ابدەن شارشاعان. تىڭداۋعا دا ق ۇلىق تانىتپايدى. دەمەك سوزدەن ىسكە كوشىپ, شىن مانىندە جۇمىستىڭ جۇرگىزىلگەنىن كورسەتۋ كەرەك.
