بيىل ماگيستراتۋراعا تۇسۋگە ارنالعان كەشەندى تەستىلەۋگە 43 مىڭعا جۋىق ءوتىنىش قابىلداندى. ەڭ كوپ تاڭدالعان ءبىلىم بەرۋ باعىتتارى قاتارىندا «پەداگوگيكالىق عىلىمدار», «ينجەنەرلىك, وڭدەۋ جانە قۇرىلىس سالالارى», «بيزنەس, باسقارۋ جانە قۇقىق» بار.
«بارلىق قالاۋشىلار ءۇشىن تىركەۋ ءبىر جارىم اي جۇرگىزىلدى. تىركەلۋ بارىسىندا وقۋعا ءتۇسۋشى تەستىلەۋ ورنىن ءوزى تاڭدادى. ەمتيحان بۇگىن باستالىپ, 10 تامىزعا دەيىن جالعاسادى», دەدى قر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
شەتكى بالدار وزگەرىسسىز قالدى: عىلىمي-پەداگوگيكالىق ماگيستراتۋراعا ءتۇسۋ ءۇشىن 75 بالل, بەيىندىك ماگيستراتۋراعا ءتۇسۋ ءۇشىن 50 بالل جيناۋ قاجەت. گرانت كونكۋرسىنا قۇجاتتاردى قابىلداۋ 11-14 تامىز ارالىعىندا جۇزەگە اسىرىلادى, ال گرانت يەگەرلەرىنىڭ ءتىزىمى 26 تامىزعا دەيىن جاريالانادى. بولاشاق ماگيسترانتتاردىڭ ججوكبۇ-نا قابىلدانۋى 28 تامىزعا دەيىن اياقتالادى.
ماگيستراتۋراعا ءتۇسۋ فورماتىنا كەلcەك, بيىل ەشقانداي وزگەرىس جوق. تەستىلەۋ ناتيجەسىمەن كەلىسپەگەن جاعدايدا ونلاين-اپەللياتسيا بەرۋگە بولادى. تەستىلەنۋشى ەمتيحان اياقتالعاننان كەيىن 30 مينۋت ىشىندە اپەللياتسياعا ءوتىنىش بەرە الادى. اپەللياتسيا بەس كۇندە قاراستىرىلادى. ودان سوڭ سەرتيفيكات وقۋعا ءتۇسۋشىنىڭ جەكە كابينەتىندە قولجەتىمدى بولادى.
ەسكە سالا كەتسەك, ماگيستراتۋرادا وقۋ ءۇشىن 2023 جىلى 13 مىڭنان استام گرانت بولىنگەن. كادرلاردى دايارلاۋعا ارنالعان گرانتتار سۇرانىسقا يە باعىتتار بويىنشا بولىنەدى.
