قوعامدىق ۇيىم الدىندا تۇرعان نەگىزگى مىندەت – جاڭا تۋعان سابيلەر اراسىنداعى ءولىم كورسەتكىشىن ازايتۋ. ۇيىمنىڭ العاشقى ماجىلىسىندە وسى جىلدىڭ ءبىرىنشى جارتىجىلدىعىنداعى نارەستە ءولىمىن تومەندەتۋ بويىنشا اتقارىلعان جۇمىستار تالقىلاندى. م.وسپانوۆ اتىنداعى بقمۋ №2 بالالار اۋرۋلارى كافەدراسىنىڭ دوتسەنتى ارىستان دوسىموۆ بالالار ونكولوگيالىق اۋرۋلارىن ەرتە انىقتاۋ بويىنشا بايانداما جاسادى. ول كەز كەلگەن مەديتسينالىق مەكەمەنىڭ قىزمەتكەرى ونكولوگيالىق دەرتكە كۇدىك تۋدىرعان بەلگىلەردى بولدىرماۋعا باعىتتالعان جۇمىستاردى باستى نازاردا ۇستاۋ كەرەك ەكەنىن العا تارتتى.
قازىرگى ۋاقىتتا اقتوبە وبلىسى تۇرعىندارىنىڭ سانى 922 مىڭ 697 ادام بولسا, ونىڭ 35%-ىن 18 جاسقا دەيىنگى جەتكىنشەكتەر قۇرايدى. وبلىستىق دەنساۋلىق ساقتاۋ باسقارماسى باسشىسىنىڭ ورىنباسارى باقىتجان تۇلكىباەۆانىڭ حابارلاۋىنشا, ءتۇرلى سىرقاتپەن دارىگەرلەر ەسەبىندە تۇرعان سابيلەر وڭىردەگى بالالار سانىنىڭ 7,9%-ىن قۇرايدى. دالىرەك ايتقاندا, اقتوبە وبلىسىندا 6 مىڭعا جۋىق بالانىڭ دەنساۋلىعىندا كىنارات بار. ماسەلەن, 600 بالا اۋتيزم سىرقاتىنا شالدىقسا, 1 100 بالا تىرەك-بۋىن جۇيەسى كەسەلىمەن دۇنيەگە كەلگەن. كەيىنگى ۋاقىتتا اقىل-ەسى كەم, جۇيكە جۇيەسى كىناراتىمەن دۇنيەگە كەلگەن نارەستەلەر سانى دا ازايماي تۇر. ءتۋابىتتى كەمىستىگى بار سابيلەر كوبەيگەن سايىن بالالار دارىگەرىنىڭ جۇمىسى دا كۇردەلەنە تۇسەدى. ونىڭ ۇستىنە سابيلەرىنە ەكپە الۋعا ءۇزىلدى-كەسىلدى قارسى اتا-انالارمەن تۇسىنىك جۇمىستارىن جۇرگىزۋ ۋچاسكەلىك دارىگەر مەن مەدبيكەگە مىندەتتەلگەن جازىلماعان قاعيداعا اينالدى. اشىعىن ايتقاندا, بالالار دارىگەرىنىڭ مىندەتىن وتباسىلىق جالپى تاجىريبەدەگى دارىگەر الماستىرعالى بەرى ءسابي سىرقاتىن ەرتە انىقتاپ, ەمدەۋ ءىسى كۇردەلەنىپ كەتتى.
قازىرگى ۋاقىتتا اقتوبە وبلىسىندا 1 498 بالالار دارىگەرى بولعانىنا قاراماستان پەدياتر ماماننىڭ تاپشىلىعى سەزىلەدى, اسىرەسە, اۋداندىق ەمحانالاردا. كەيىنگى دەرەك بويىنشا وڭىردە 18 پەدياتر, 4 نەاناتولوگ مامان جەتىسپەيدى. وسى تاپشىلىقتىڭ ورنىن تولتىرۋ ماقساتىندا جىل سايىن جەرگىلىكتى بيۋدجەت قاراجاتى ەسەبىنەن ستۋدەنتتەردى وقىتۋ جۇمىسى قولعا الىنىپ كەلەدى. بيىل اقتوبەدەگى م.وسپانوۆ اتىنداعى باتىس قازاقستان مەديتسينا ۋنيۆەرسيتەتىن گرانت نەگىزىندە بالالار دارىگەرى ماماندىعىمەن بەس ستۋدەنت, نەاناتولوگ ماماندىعى بويىنشا ءۇش ستۋدەنت اياقتاپ, اۋداندىق اۋرۋحانالارعا ورنالاسىپ جاتىر.
بۇگىندە دەنساۋلىق ساقتاۋ باسقارماسىندا 36 شتاتتان تىس دارىگەر تىركەلگەن. ولاردىڭ قاتارىندا زەينەتكە شىققان تاجىريبەلى ماماندار دا بار. تاياۋدا «پەدياتر قوعامى» مۇشەلەرى 12 اۋداننىڭ ەلدى مەكەندەرىن ارالاپ, اۋىل تۇرعىندارىنا مەديتسينالىق كومەك كورسەتپەكشى. ولاردىڭ جوسپارىندا ەڭ شالعاي اۋىلدارداعى دارىگەرلىك باقىلاۋدان تىس قالعان سابيلەردى تەكسەرىستەن وتكىزۋ بار.
