سوڭعى جيىرما جىل ارالىعىندا اقش پەن ۇلىبريتانيا عالىمدارىنىڭ زەرتتەۋلەرى ناتيجەسىندە جەردەگى مۇحيتتاردىڭ 56%-ىنىڭ ءتۇسى جاسىلدانعانى اڭعارىلعان. مۇنى ولار عارىشتان تۇسىرىلگەن سۋرەتتەر ارقىلى كورگەن. اسىرەسە تروپيكالىق ايماقتاردا انىق بايقالعان.
Nature عىلىمي جۋرنالىندا عالىمداردىڭ زەرتتەۋلەرى جارىق كوردى.
مۇحيت ءتۇسى بەتكى قاباتتاعى وزگەرىسكە قاراي قۇبىلادى. زاڭدىلىق بويىنشا, بۇل قاباتتا فيتوپلانكتون كوپ بولسا, مۇحيت بەتى جاسىل تارتا باستايدى. اتالعان قۇبىلىس نەگىزىندە الەمدى جاسىلداندىرۋ ساياساتىنا كەلەتىن سەكىلدى بولعانىمەن, ونىڭ كەرى اسەرى وتە قاۋىپتى, ەڭ الدىمەن بۇل مۇحيتتاعى ەكوجۇيەنى قۇرتادى, دەيدى عالىمدار.
عالىمداردىڭ بولجاۋىنشا, ەكوجۇيە بۇزىلعان سايىن ونداعى تىرشىلىك جويىلادى.
مۇحيت بەتى ءتۇسىنىڭ كوكتەن جاسىلعا قاراي وزگەرۋىن عالىمدار الەمدىك كليماتتاعى وزگەرىسپەن, سونىڭ ىشىندە جاپپاي جىلىنۋمەن بايلانىستىرادى.
