ەستەرىڭىزگە سالا كەتەيىك, بۇعان دەيىن وبلىس اكىمىنىڭ پانفيلوۆ اۋدانىنداعى رەزيدەنتسياسى بالالاردىڭ ەمدەۋ-ساۋىقتىرۋ ورنى رەتىندە قايتا جابدىقتالعان ەدى. ەندى, مىنە, «جانسايا» كۇندىزگى وڭالتۋ ورتالىعى جازعى دەمالىس ءۇيى رەتىندە رەسمي جۇمىسقا كىرىستى.
دەمالىس ءۇيىنىڭ اۋماعى كەڭ, بارلىق قولايلى جاعداي جاسالعان, جاسىل جەلەككە بولەنگەن. اۋماعىندا ورنالاسقان عيماراتتىڭ جالپى كولەمى – 200,3 شارشى مەتر. جوبالىق قۋاتى 40 ورىنعا ارنالعان. جاز ايلارىنداعى ءار دەمالىس ماۋسىمى 5 كۇننەن تۇرادى. جازعى دەمالىس كەزىندەگى 5 ماۋسىمدا 200 بالا قامتۋدى جوسپارلانعان. دەمالۋشىلارعا جازعى كەزەڭدە 24 شتاتتىق بىرلىك قىزمەت كورسەتەدى.
دەمالىس ورنى بالالارعا ارنالعان جاتىن توسەكتەر, جەكە زاتتار, كيىمدەر سالىناتىن شكافتار, ءتۇرلى جۇمساق جيھازدارمەن تۇگەل قامتىلعان. اسحانا قاجەتتى قۇرال-جابدىقتارمەن تولىق جابدىقتالعان. سىرتقى اۋلاعا ويىن الاڭقايلارى مەن سۋ باسسەينى سالىنعان. سونىمەن قاتار جازعى كەزەڭدە دەمالۋشىلاردىڭ ءومىرى جانە دەنساۋلىق قاۋىپسىزدىگىنە بايلانىستى العاشقى مەديتسينالىق كومەك كورسەتۋگە جانە ورتكە قارسى دابىل بەرۋ, ءورت سوندىرۋگە قاجەتتى قۇرالدارىمەن قامتىلىپ, بەينەباقىلاۋ ورناتىلىپ, عيماراتتاردا مۇگەدەكتەردىڭ ءجۇرىپ-تۇرۋىنا قاجەتتى جاعداي جاسالىپتى.
دەمالىس ورنىنىڭ اشىلۋ سالتاناتىنا كەلگەن اۋدان اكىمى الماس ءابدىنوۆ: «وزدەرىڭىز بىلەتىندەي, ءبىزدىڭ ەلدە بالالار ەرەكشە قامقورلىقتا. مەملەكەت باسشىسىنىڭ ءوزى وسى باعىتتاعى جۇمىستاردى باقىلاۋعا العان. وسى ورايدا جەتىسۋ وبلىسىندا جەتكىنشەكتەرگە بارلىق جاعداي قاراستىرىلعانىن ايتا كەتكەن ءجون. وبلىس اكىمىنىڭ قولداۋىمەن ۇلكەن ىستەر اتقارىلىپ جاتىر. بەيبىت وكسىكباي ۇلى اۋدانىمىزعا كەلگەندە كول جاعالاۋىندا مۇگەدەك بالالارعا ارنالعان دەمالىس ورنىن اشۋ قاجەتتىگىن ايتقان ەدى. بۇگىن سول تاپسىرمانىڭ ورىندالعانىنا كۋا بولىپ وتىرسىزدار. سىرت كومەككە مۇقتاج جەتكىنشەكتەرىمىز وسىندا دەمالىپ, ەم الاتىن بولادى. الداعى كەزدەرى دە بالالارعا قامقورلىق, قولداۋ ىستەرى جالعاسادى», دەدى اكىم.
ودان كەيىن وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ مىندەتىن اتقارۋشى ەرمەك ميزامباەۆ دەمالۋشىلارعا تىلەگىن ارناپ, وسى باعىتتا اتقارىلىپ جاتقان جۇمىستارعا توقتالدى. اۋداندىق ارداگەرلەر كەڭەسىنىڭ توراعاسى ساتاي بەكبولاتوۆ اق باتاسىن بەرىپ, يگى ىستەرگە ىلگەرىلەۋ تىلەدى. دەمالىپ, ەم الۋعا كەلگەن بالالاردىڭ اتا-انالارى اتىنان ءسوز العان ءساليما تولەپبەرگەنوۆا جان جىلۋىنا مۇقتاج جەتكىنشەكتەرگە جاعداي جاساپ وتىرعان ازاماتتارعا جۇرتشىلىقتىڭ العىسىن جەتكىزدى.
ايدىن كولدىڭ جاعاسىنداعى دەمالىس ورنىنىڭ لەنتاسى قيىلىپ, شاشۋ شاشىلدى. قۇرمەتتى قوناقتار مەن دەمالۋشى بالالاردىڭ اتا-انالارى عيماراتتى, اۋلانى ارالاپ كورىپ, جەتكىنشەكتەرگە قاجەتتى جاعدايدىڭ ءبارى جاسالعانىنا كوز جەتكىزدى.
