«قازىر الەمدىك مەديادا پوست-شىندىق كەزەڭى, جاساندى ينتەللەكت ءداۋىرى باستالعانى بارىمىزگە بەلگىلى. پرەزيدەنت قاسىم-جومارت توقاەۆ ەلىمىز اقپارات سالاسىنىڭ جاڭا ءداۋىر تالاپتارىنا ساي, جاڭا ساپاعا ءوتۋى كەرەگىن اتاپ وتكەن. تمد ەلدەرى اراسىندا ءبىرىنشى رەت قابىلدانعان «ونلاين پلاتفورمالار جانە ونلاين جارناما تۋرالى» زاڭ وسى قاجەتتىلىكتى رەتتەپ, ولقىلىقتىڭ ورنىن تولتىرادى», دەدى مينيستر.
سونىمەن قاتار دارحان قىدىرالى قازاقستانداعى كرەاتيۆتى يندۋستريانى دامىتۋ ءۇشىن بىرقاتار ناقتى جۇمىستار اتقارىلىپ جاتقانىن اتاپ ءوتتى.
«قىركۇيەك ايىندا ءبىز Astana Media Week, New Media فورۋمى جانە «ۇركەر» تەلەۆيزيالىق سىيلىعىن بىرىكتىرىپ وتكىزۋدى جوسپارلاپ وتىرمىز. بيىل «ۇركەر» سىيلىعىندا «ۇزدىك YouTube ارناسى» جانە «ۇزدىك پودكاست» سىندى ەكى جاڭا اتالىم قوسىپ وتىرمىز. بۇل سالانىڭ دامۋىنا سەرپىن بەرىپ, تۇركى الەمىن جاقىنداستىرا تۇسەدى دەپ سانايمىز», دەدى مينيستر.
ايتا كەتەيىك, الداعى Astana Media Week, New Media فورۋمدارى, سونداي-اق «ۇركەر-2023» باسپا, راديو, ينتەرنەت جۋرناليستيكا سالاسىنداعى ۇلتتىق سىيلىعى كۇزدە استانا قالاسىندا وتەدى.
