ورتالىقتىڭ نەگىزگى مىندەتتەرىنىڭ ءبىرى – مەملەكەت پەن ازاماتتاردىڭ ءوزارا ءىس-قيمىلىنىڭ جاڭا ورتاسىن قالىپتاستىرۋ. ال ونىڭ جۇمىسىنىڭ نەگىزگى قاعيداتتارى – كليەنتكە باعدارلانۋ, ءوتىنىش بەرۋشىلەرگە كورسەتىلەتىن قىزمەت ساپاسىن ارتتىرۋ جانە جالپى وسى سالاعا جاڭا ستاندارتتاردى ەنگىزۋ. 
ورتالىق بازاسىندا كەلۋشىلەر وزدەرىنە ىڭعايلى جاعدايدا كەز كەلگەن مەملەكەتتىك ورگانعا ءوتىنىشىن بەرە الادى, سونداي-اق حقكو-عا ۇقساس ءتۇرلى ۆەدومستۆولار وكىلدەرىنەن, مەدياتورلار جانە زاڭ ماماندارىنان كەڭەس الا الادى. سونىمەن قاتار مۇندا ازاماتتار مەملەكەتتىك ورگانداردىڭ ءبىرىنشى باسشىلارىنىڭ جەكە قابىلداۋىنا جازىلۋ مۇمكىندىگىنە يە بولادى.
ورتالىق الاڭىندا اپتا سايىن 18 مينيسترلىكتىڭ وكىلدەرى ازاماتتاردى جەكە قابىلدايدى, كەستە ۇكىمەت سايتىندا الدىن الا جاريالاناتىن بولادى. بۇل رەتتە وڭىرلەردىڭ تۇرعىندارىنا ەلورداعا ارنايى كەلۋدىڭ قاجەتى جوق, ويتكەنى ولاردى ونلاين-فورماتتا دا قابىلداۋ جۇرگىزىلەدى.
ورتالىقتىڭ قۇرىلۋى ەل پرەزيدەنتى قاسىم-جومارت توقاەۆتىڭ باستاماسىمەن قولعا الىنعان «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ جونىندەگى اۋقىمدى جۇمىستىڭ جالعاسى ەكەنىن ايتا كەتكەن ءجون. بۇعان دەيىن بۇل ۇدەرىس شەڭبەرىندە ءوتىنىش بەرۋشىلەر قۇقىقتارىنىڭ باسىمدىعىن قامتاماسىز ەتەتىن جانە وتىنىشتەردى قاراۋ كەزىندە مەملەكەتتىك ورگانداردىڭ جاۋاپكەرشىلىگىن كۇشەيتۋدى كوزدەيتىن اكىمشىلىك راسىمدىك-پروتسەستىك كودەكسى قولدانىسقا ەنگىزىلگەن بولاتىن. ودان كەيىن وڭىرلەردە وتىنىشتەردىڭ قارالۋىن باقىلاۋ بويىنشا بولىمدەر جۇمىس ىستەي باستادى, اكىمشىلىك سوتتار جۇيەسى قۇرىلىپ, eOtinish بىرىڭعاي اقپاراتتىق جۇيەسى جانە ت. ب. ىسكە قوسىلدى.
جاڭا ورتالىقتىڭ بازاسىندا تسيفرلىق حقكو ىسكە قوسىلدى, ول ارقىلى ونلاين رەجيمىندە 1220 مەملەكەتتىك قىزمەت ءتۇرىن الۋعا بولادى.
ورتالىقتا قر اكىمشىلىك قۇقىق بۇزۋشىلىق تۋرالى زاڭناماسىندا, قىلمىستىق ءىس جۇرگىزۋ نەمەسە ازاماتتىق ءىس جۇرگىزۋ زاڭناماسىندا قاراۋ ءتارتىبى بەلگىلەنگەن وتىنىشتەر قابىلدانبايتىنىن اتاپ وتكەن ءجون. بۇل ماسەلەلەر بويىنشا ازاماتتار ءتيىستى قۇقىق قورعاۋ نەمەسە سوت ورگاندارىنىڭ فرونت-وفيستەرىنە جۇگىنۋى ءتيىس.
تۇتاستاي العاندا, كەشەندى ءتاسىل جاڭا ورتالىقتى مەملەكەتتىك ورگاندار مەن ۇكىمەتتىك ەمەس ۇيىمداردىڭ جانە جۇرتشىلىقتىڭ ەڭ وزەكتى ماسەلەلەر توڭىرەگىندەگى ءوزارا ءىس-قيمىلى جولعا قويىلعان ءارى سۇرانىسقا يە ديالوگ الاڭىنا اينالدىرادى دەپ كۇتىلۋدە.
