پاتەر كىلتىن وبلىس اكىمى بەيبىت يساباەۆ پەن تالدىقورعان قالاسىنىڭ اكىمى ەرنات ءبازىل تابىستادى. جاڭا قونىسقا يە بولعانداردىڭ باسىم بولىگى – كوپبالالى وتباسىلار, اتا-انا قامقورلىعىنسىز قالعاندار, ارداگەرلەر مەن ءى-ءىى توپتاعى مۇگەدەكتەر.
«جىل باسىندا «بيىل 51 ءۇي بەرەمىز» دەپ ۋادە ەتكەنبىز. وسىعان دەيىنگى بەرگەندەرىمىزدى ەسەپكە الساق, ەندى 43 ءۇي قالدى. ەندى تالدىقورعاندا اي سايىن ءۇيدىڭ كىلتىن تابىستاۋ سالتاناتىنا جينالاپ تۇرامىز. جىل سوڭىنا دەيىن 51 ءۇيدى تولىق بەرەمىز. جىل باسىنان بەرى 280 ادام ءۇيلى بولسا, جىل سوڭىنا دەيىن تاعى 1 700 تۇرعان جاڭا پاتەرگە كوشەدى. نەگىزگى ماقسات – ءۇي كەزەگىندەگىلەردىڭ سانىن ازايتۋ. ءدال قازىرگى ساتتە تالدىقورعاندا 15 مىڭ ادام ءۇي كەزەگىندە تۇر. الداعى 4-6 جىل ىشىندە كەزەكتەگىلەر سانىن ەكى ەسە ازايتۋدى كوزدەپ وتىرمىز. وسىعان دەيىن كەزەككە بايلانىستى تۇسىنبەۋشىلىك, زاڭسىزدىقتار بولدى. ءبىز تۇرعىندار كەزەگىن تسيفرلىق جۇيەگە كوشىردىك. ەندى كەز كەلگەن ادام ءوز كەزەگىن ۇيىندە وتىرىپ-اق باقىلاي الادى», دەدى ب.يساباەۆ.
ارتىنشا وبلىس باسشىسى سالتاناتتى تۇردە بەرىلگەلى تۇرعان ءۇيدىڭ سالىنۋىنا اتسالىسىپ, قولداعان «شىمىر» جشس ديرەكتورى رۋسلان ۆاليشانوۆقا العىسىن ءبىلدىردى.
ەل الدىندا 50 ادامنىڭ ەسىمى اتالىپ, اكىمدەردىڭ قولىنان كىلت الدى. ءۇيدىڭ قۇرىلىسى 2020 جىلى باستالدى. ال ۇيدە 98 پاتەر بار: 1 بولمەلى – 42, 2 بولمەلى – 28, 3 بولمەلى – 28. كوپبالالى وتباسى ساناتىنان كامشات سايلاۋبايقىزى – قۋانىشقا كەنەلگەندەردىڭ ءبىرى. ول وسىنداي شاتتىققا بولەگەن جاندارعا العىسىن ايتىپ, ءوزى سياقتى پاتەر كىلتىن العاندارعا قۇتتىقتاۋىن جەتكىزدى. سالتاناتتى تۇردە كىلت تابىستاپ بولعان وبلىس باسشىسى ءۇيدى ارالاپ, كوپبالالى وتباسىنىڭ اتىنان كىلت العان اراي وماروۆانىڭ پاتەرىندە بولىپ, اق تىلەگىن ارنادى.
بۇعان قوسا جاركەنت قالاسىندا 60 پاتەرلى كوپقاباتتى ەكى ءۇي سالىنىپ جاتىر. سونداي-اق باسپانا كەزەگىندەگىلەر ءۇشىن تاعى 80 پاتەرلى تۇرعىن ءۇي قۇرىلىسى باستالدى.
العاشقى اتالعان ەكى تۇرعىن ءۇي قۇرىلىسىن «قۇرىلىس يندۋستريا كومپانياسى» جشس سالىپ, قازىر قۇرىلىستىڭ 65 پايىزى اياقتالدى. مۇندا 58 جۇمىسشى ەڭبەك ەتەدى, 3 تەحنيكا – قولدانىستا.
«جۇمىس ساپاسى قۇرىلىسشىلاردىڭ بىلىكتىلىگىنە بايلانىستى. بىزدە جالپى 12 تاس قالاۋشى بار, سولاردىڭ اراسىندا تاڭىربەرگەن الىمباەۆ, ساكەن سەيىتجانوۆ, ماقسات قاستەەۆ سىندى ەڭبەككەرلەر شەبەرلىگىمەن ەرەكشە قىرىنان تانىلىپ جاتىر», دەيدى پروراب ەرلان قارساقباەۆ.
بۇل ۇيلەردىڭ اينالاسىن كورىكتەندىرۋ مەن ينجەنەرلىك-كوممۋنيكاتسيالىق جۇيەسىن «گارانت ستروي گرۋپپ – 2016» جشس اتقارادى. قۇرىلىس زاتتارى باعاسىنىڭ كۇرت كوتەرىلۋىنە جانە الماتى وبلىسىنىڭ بولىنۋىنە بايلانىستى جىل باسىندا جۇمىس ءبىراز ۋاقىت توقتاپ, قۇرىلىس جوباسىنا قوسىمشا قارجى قاراستىرىلدى.
ەكىنشى نىسانداعى 80 پاتەرلى تۇرعىن ءۇي قۇرىلىسىن باستاۋعا كەلىسىمشارت جاسالىپ, قۇرىلىس-مونتاج جۇمىسى باستالماق. اۋدانداعى بارلىق قۇرىلىستىڭ ساپالى ءارى ۋاقىتىلى اتقارىلۋى – قۇزىرلى ورىنداردىڭ تۇراقتى باقىلاۋىندا. نىسان پايدالانۋعا بەرىلگەنگە دەيىن كەمشىلىكتەر تۇزەتىلەدى. كەيىنگى جىلدارى قۇرىلىسقا بولىنەتىن قارجى 300 ملن-نان 30 ملرد تەڭگەگە دەيىن كوبەيدى. ناتيجەسىندە, جاركەنت كوركەيىپ, جايناپ كەلەدى.
