تۇركىستان وبلىسى پد ەكسترەميزمگە قارسى ءىس-قيمىل باسقارماسى مەن تۇركىستان وبلىسى بويىنشا ۇلتتىق قاۋىپسىزدىك كوميتەتىنىڭ قىزمەتكەرلەرى بىرلەسىپ, جەدەل ءىس-شارالار وتكىزۋ بارىسىندا, كامەلەتكە تولماعاندارعا زاڭسىز ءدىني ساباق بەرگەن ەر ادامدى انىقتادى.
«تۇركىستان قالاسىنىڭ تۇرعىنى ۇيىندە 5 جاستان 17 جاسقا دەيىنگى 68 بالاعا ساباق بەرىپ, ءدىني ۋاعىزداردى زاڭسىز وتكىزگەن, ال وقۋ اقىسى 100 مىڭ تەڭگەنى قۇراعان. كۇدىكتىنىڭ مەكەنجايى بويىنشا تەكسەرۋ جۇرگىزۋ كەزىندە 68 بالا ءدىني باعىت بويىنشا ساباق العانى راستالدى. سونداي-اق وقۋشىلار اراسىندا تۇركىستان عانا ەمەس, اباي, شىعىس قازاقستان, جامبىل وبلىستارى مەن وزبەكستان رەسپۋبليكاسىنىڭ بالالارى دا ءبىلىم العانى انىقتالدى. وعان قوسا پوليتسەيلەر جەرگىلىكتى تۇرعىننىڭ ۇيىنەن ساراپتاماعا باعىتتالعان 100-دەن استام ءدىني سيپاتتاعى كىتاپتاردى تاركىلەدى», دەلىنگەن ءىىم حابارلاماسىندا.
ەر ادامعا قاتىستى قر اقبتك-ءنىڭ 490-بابى 3-بولىگى (قازاقستان رەسپۋبليكاسىنىڭ ءدىني قىزمەت جانە ءدىني بىرلەستىكتەر تۋرالى زاڭناماسىن بۇزۋ) بويىنشا اكىمشىلىك حاتتاما تولتىرىلدى.
