بۇل تۋرالى لاگەرگە اتتانعان وقۋشىنىڭ تۋىسى ينكا روكەروۆنا Facebook پاراقشاسىندا جازدى.
- «ارمان دالا» لاگەرىندە كەلەڭسىز جاعداي بولىپ جاتىر. حالىقتىڭ الەۋمەتتىك جاعىنان وسال توبى ساناتىنداعى وتباسىلاردىڭ بالالارى تەگىن دەمالىسقا جىبەرىلدى. ۇيىمداستىرۋشىلار بالالاردىڭ ۇيالى تەلەفوندارىن الىپ قويعان, اتا-انالار بالالارىمەن حابارلاسا الماعان. مۇلدە جەلدەتىلمەيتىن عيماراتتا 100 بالا جاتىر. بالالار ەدەندە ۇيىقتاپ جاتىر, دەپ جازدى ينكا روكەروۆنا.
بۇل وقيعاعا باسقا دا اتا-انالار كۋا بولعانىن جاسىرمادى.
الماتى قالالىق ءبىلىم باسقارماسى كەلەڭسىز جايتقا قاتىستى تۇسىنىكتەمە بەرىپ, ءتيىستى شارالار قابىلدانىپ جاتقانىن العا تارتتى.
ء«بىلىم باسقارماسىنىڭ قىزمەتكەرلەرى شۇعىل تۇردە «ارمان دالا» ساياجايىنا باردى. قازىر ءبىلىم باسقارماسى اتالعان ۇيىممەن كەلىسىمشارتتى بۇزۋ ماسەلەسىن قاراستىرىپ جاتىر. بالالار ۇيلەرىنە جىبەرىلدى. جاقىندا ولار بەكىتىلگەن ەرەجەلەردى قاتاڭ ساقتايتىن بالالار لاگەرىنە قايتا جىبەرىلەدى», دەلىنگەن قالالىق ءبىلىم باسقارماسى تاراتقان حابارلامادا.
حالىق نارازىلىعىنا سەبەپ بولعان وقيعا الماتى پروكۋراتۋراسىنىڭ نازارىنا دا ىلىكتى. ەندى بالالاردىڭ جازعى دەمالىسىن ۇيىمداستىرۋمەن اينالىسقان «بەلريچي» جشس قىزمەتى جان-جاقتى تەكسەرىلەدى.
وسى تۇستا قىلمىستىق ىستەردى تەرگەۋ الماتى قالالىق سىبايلاس جەمقورلىققا قارسى قىزمەتكە جۇكتەلدى.
ىستەردى تەرگەپ-تەكسەرۋ اياسىندا وقيعانىڭ بارلىق ءمان-جايى انىقتالىپ, جەرگىلىكتى اتقارۋشى ورگاننىڭ لاۋازىمدى تۇلعالارى مەن لاگەردى ۇيىمداستىرۋشىلاردىڭ ارەكەتىنە ءتيىستى باعا بەرىلەدى.
