الەۋەتتى جۇمىس بەرۋشىلەر قاتارىندا «قازپوشتا», «قازاقستان تەمىر جولى», «سامۇرىق-قازىنا», ERG, بانكتەر, مەدۇيىمدار, وقۋ ورتالىقتارى جانە باسقا دا مەكەمەلەر بار. جالپى, ءتۇرلى قىزمەت سالاسىندا 1300-دەن استام بوس جۇمىس ورنى ۇسىنىلعان. جارمەڭكەنى «Amanat» پارتياسى قالا اكىمدىگىمەن بىرلەسە ۇيىمداستىردى.
«قالامىزدا تۇرعىنداردى, ونىڭ ىشىندە تۇلەكتەر مەن جاستاردى جۇمىسقا ورنالاستىرۋعا ارنالعان بىرقاتار باعدارلامانى جۇزەگە اسىرىپ جاتىرمىز. ماسەلەن, بيىل بيزنەس, اكىمدىك جانە ءبىلىم بەرۋ ينستيتۋتتارىنىڭ ىنتىماقتاستىعىنىڭ ارقاسىندا 60 مىڭ جۇمىس ورنىن قۇرۋدى جوسپارلاپ وتىرمىز», دەدى استانا قالاسىنىڭ اكىمى جەڭىس قاسىمبەك.
ءىس-شاراعا قاتىسقان «Amanat» پارتياسىنىڭ توراعاسى ەرلان قوشانوۆ جاستاردى جۇمىسقا ورنالاستىرۋ – پرەزيدەنت پەن پارتيانىڭ سايلاۋالدى باعدارلاماسىنىڭ ماڭىزدى مىندەتى ەكەنىن ايتتى.
«ماقساتىمىز – 2029 جىلعا دەيىن 2,3 ميلليون جاستى جۇمىسقا ورنالاستىرۋ. سول ءۇشىن پارتيانىڭ «جاستار رۋحى» جاستار قاناتى «جاستارعا جۇمىس» جوباسىن جۇزەگە اسىرا باستادى. مۇنى جۇمىسقا ورنالاسۋدىڭ كەشەندى ءتاسىلى دەۋگە بولادى. بارلىق ءوڭىر بويىنشا بوس ورىندار جارمەڭكەلەرىن تۇراقتى وتكىزۋمەن بىرگە جىلدىق 2,5% نەسيە بەرۋ, تاۋ-كەن ءوندىرۋ ونەركاسىبىندە 2 مىڭ بوس جۇمىس ورنىن قۇرۋ, جاس مامانداردى IT-داعدىلارىنا ۇيرەتۋ ءۇشىن 3 مىڭ ۆاۋچەر ءبولۋ جانە تاعى باسقا دا كوپتەگەن مۇمكىندىك بەرىلدى. بۇگىن جاستار قاۋىمى كوپ جينالاتىن ەلوردالىق ارباتقا 70-تەن استام جۇمىس بەرۋشى كەلدى. 2000-نان استام ادام قاتىستى. بۇل جاستار ءۇشىن العاشقى ەڭبەك جولىن ءىرى دە سەنىمدى كومپانيالاردان باستاۋعا ۇلكەن مۇمكىندىك بەرەدى», دەدى ەرلان قوشانوۆ.
«Amanat» پارتياسى جانىنداعى «جاستار رۋحى» جاستار قاناتىنىڭ توراعاسى نۇرجان جەتپىسباەۆتىڭ ايتۋىنشا, جىل باسىنان بەرى 120-دان استام جارمەڭكە وتكىزىلگەن.
«بۇل تەك قانا وبلىس ورتالىقتارى عانا ەمەس, ەلىمىزدىڭ وبلىس ورتالىقتارىنا ۇزەڭگىلەس شاھارلار, باسقا دا كىشكەنتاي اۋىلدىق مەكەندەردە وتكىزدىك. جالپى, ءبىزدىڭ ەسەپتەۋىمىزشە, 90 مىڭنان استام ازامات ءبىزدىڭ جارمەڭكەلەرىمىزگە كەلىپ, 18,6 پايىزى جۇمىسقا ورنالاسقان. ءبىز الدىن الا انونس جاساعان كەزدە جانە الدىن الا حابارلاندىرۋ جاساعان كەزدە مۇعالىم, دەنساۋلىق ساقتاۋ سالاسىنداعى مامانداردىڭ جۇمىس تاپشىلىعىن سەزدىك. جارمەڭكە جاستاردىڭ كاسىبي, ەڭبەك جانە كاسىپكەرلىك الەۋەتىن ىسكە اسىرۋعا كومەكتەسۋدى كوزدەيدى. سايكەسىنشە, مەملەكەتتىك ورگانداردىڭ ماماندارى كەڭەس بەردى», دەدى ن.جەتپىسباەۆ.
