تۇركىستاندا ازيا ويىندارىنا باراتىن تاەكۆوندوشىلار انىقتالدى

بيىل جاڭا فورماتتا وتكەن باسەكەدە 10 سالماقتا (ەرلەر 5, ايەلدەر 5) چەمپيون انىقتالدى. اۋەلى 2 كۇن بويى ءار سالماقتا چەمپيون انىقتالدى. سوسىن ولار تاعى بىرنەشە كۇن بويى ءوز سالماعىن ۇستاپ تۇرىپ, شەشۋشى كۇنى شيرەك فيناليستەر اراسىنان توپ جارعان سپورتشىمەن سۋپەرفينالدا ايقاستى. وسى جەكپە-جەكتە باسىم تۇسكەنى ەلىمىزدىڭ نامىسىن سارى قۇرلىق وليمپياداسىندا قورعاۋعا مۇمكىندىك الدى. بۇل جۇيە ارقىلى وسى سپورت ءتۇرى شىققان وڭتۇستىك كورەيادا بۇگىنگە دەيىن ءوزىنىڭ ۇلتتىق قۇراماسىن جاساقتاپ كەلەدى.

جەڭىمپازدار:

ايەلدەر:

49 كگ – بوتاكوز قاپانوۆا (قىزىلوردا)

53 كگ – ازيزا قاراجانوۆا (جامبىل وبلىسى)

57 كگ – ماريا سەۆوستيانوۆا (اتىراۋ)

67 كگ – نۇراي قۇسايىنوۆا (اتىراۋ وبلىسى)

+67 كگ – جانسەل دەنيز (الماتى قالاسى)

ەرلەر:

58 كگ – ەلدوس ىسقاق (جامبىل وبلىسى)

63 كگ – نۇربەك عازەز (الماتى قالاسى)

68 كگ – ەلدار ءبىرىمباي (ماڭعىستاۋ وبلىسى)

80 كگ – نۇرلان مىرزاباەۆ (تۇركىستان وبلىسى)

+80 كگ – سمايىل دۇيسەباي (تۇركىستان وبلىسى)

«كەشەلى بەرى باپكەرىم ەكەۋمىز سۋپەرفينالعا دايىندالدىق. ەلجان ەكەۋمىز ءبىر قالانىڭ سپورتشىسىمىز. جوسپار قارسىلاستىڭ كىم بولاتىنان قاراماي ەكى راۋندتا بار كۇشىمدى سالىپ, ايقاسۋ بولدى. تارازىنىڭ باسىندا ازيا ويىندارىنا بەرىلەتىن جولداما تۇرعاندىقتان ەشكىم ايانىپ جاتقان جوق. ونىڭ ۇستىنە ءبىزدىڭ سالماققا اۋىسقان باسقا تاەكۆوندوشىلار بار. ەندى حالىقارارالىق جارىسقا مىقتاپ دايىندالامىز», دەدى نۇربەك عازەز.

سونداي-اق كۇزدە ازيا ويىندارىنا قاتىسۋشى ءار مەملەكەتتەن ءبىر تورەشى شاقىرىلادى. بيىل قازاقستان اتىنان قۇرلىق دوداسىنا حالىقارالىق دارەجەدەگى تورەشى ءداۋرەن العاباەۆ بارماق.

«جاڭا فورماتتا وتكەن بيىلعى قازاقستان كۋبوگى تورەشىلەرگە قيىن, تاڭسىق بولدى دەي المايمىن. بىزگە ەمەس, سپورتشىلار ءۇشىن ءبارى جاڭادان باستالدى. وسى فورماتتىڭ ماقساتى – تاەكۆوندوشىلاردىڭ كوپ سالماق قۋىنىڭ الدىن الۋ. مۇنىڭ حالىقارالىق جارىستار كەزىندە كەرى اسەر ەتەتىنىن ءجيى ايتىپ ءجۇرمىز. مەنىڭشە, وسى تاجىريبەنى ەرەسەكتەرمەن قوسا جاستار اراسىنداعى جارىستاردا قولدانۋ كەرەك», دەپ ايتتى بيىلعى قازاقستان كۋبوگىنىڭ باس تورەشىسى ءداۋرەن العاباەۆ.

بيىلعى باسەكەدە جالپى ەسەپتە الماتى قالاسىنىڭ كومانداسى توپ جارسا, اتىراۋ وبلىسى ەكىنشى, جامبىل وبلىسى ءۇشىنشى ورىن الدى.