تۇركىستان وبلىسىندا «جايلى مەكتەپ» ۇلتتىق جوباسى اياسىندا 49 مىڭ وقۋشىنى قامتيتىن 63 مەكتەپ سالىنادى. ونىڭ 29-ىنىڭ قۇرىلىسى بيىل باستالىپ, 2024 جىلى اياقتالادى. ال قالعان 34 مەكتەپتىڭ قۇرىلىسى 2024 جىلى باستالادى. مەملەكەت باسشىسى قاسىم-جومارت توقاەۆتىڭ تىكەلەي تاپسىرماسىمەن سالىناتىن بۇل ءبىلىم ۇيالارى وڭىردەگى ءۇش اۋىسىمدى جانە اپاتتى مەكتەپتەر ماسەلەسىن تۇبەگەيلى شەشۋگە سەرپىن بەرەدى.
اتالعان اۋقىمدى قۇرىلىسقا بايلانىستى وبلىس اكىمى دارحان ساتىبالدىنىڭ تاپسىرماسىمەن ۇلتتىق جوبانى جۇزەگە اسىرۋ جونىندەگى الگوريتم ازىرلەندى. الگوريتمگە سايكەس وبلىس كولەمىندە ارنايى جۇمىس توبى قۇرىلىپ, قۇرامىنا وبلىس اكىمىنىڭ ورىنباسارلارى, اۋداندار مەن وبلىستىق ماڭىزى بار قالالاردىڭ اكىمدەرى, باسقارما باسشىلارى, دەپۋتاتتار, ءبىلىم سالاسى جانە ينفراقۇرىلىمعا قاتىستى مەكەمە وكىلدەرى ەنگىزىلدى. جۇمىسشى توپتىڭ وتىرىسى ايىنا كەمىندە 1 رەت وتكىزىلىپ, وزەكتى ماسەلەلەر تالقىلانىپ جاتىر. ءاربىر ءبىلىم ۇياسىنىڭ قۇرىلىسى قاتاڭ باقىلاۋعا الىنادى. ينفراقۇرىلىمى, ينجەنەرلىك جۇيەلەرى, جەرى, سۋى مەن گازى, ەلەكتر جۇيەسى, جالپى ءاربىر وزەكتى ماسەلەسىن شەشۋ جولدارى جوسپارلانىپ, ناقتى جۇمىس ءجۇرىپ جاتىر.
وقۋشىلاردىڭ سانى زەردەلەنىپ, قاۋىپسىزدىگى دە باستى نازارعا الىنعان. سونىمەن بىرگە مەكتەپتەردىڭ جوباسى, قولدانىلاتىن قۇرىلىس ماتەريالدارى مەن جيھازدارى بويىنشا دا ورتاق ستاندارت قابىلدانعان. ول مەردىگەرلەرگە ۇسىنىلدى.
جۇيەلى ءارى جەدەل جۇمىس ناتيجەسىندە 2023 جىلى قۇرىلىسى جوسپارلانعان 29 مەكتەپتىڭ 19-ىنىڭ جەر تەلىمدەرى ءبولىندى. قۇرىلىس-مونتاج جۇمىستارىن جۇرگىزەتىن مەردىگەر مەن جوبالاۋشى مەكەمەلەرى انىقتالدى. ال قالعان 10 مەكتەپ بويىنشا «Samruk-Kazyna Construction» اكتسيونەرلىك قوعامى تاراپىنان ساتىپ الۋ كونكۋرسىنىڭ اشىلۋى وتكىزىلۋدە.
