مەملەكەت باسشىسى استانادا ءوتىپ جاتقان قاۋىپسىزدىك جانە ىنتىماقتاستىق جونىندەگى ورتالىق ازيا فورۋمىنا قاتىسقانى ءۇشىن بىرىككەن ۇلتتار ۇيىمىنىڭ دەلەگاتسياسىنا العىس ايتتى.
«سىزدەر بۇل فورۋمعا قاتىسۋ ارقىلى اتالعان جيىنعا ماڭىزدى قولداۋ كورسەتىپ وتىرسىزدار. قازىرگى الەمدە بولىپ جاتقان وقيعالاردى ەسكەرسەك, كونفەرەنتسيانىڭ كۇن تارتىبىندەگى ماسەلەلەر وتە وزەكتى. ەلىمىز بىرىككەن ۇلتتار ۇيىمىنىڭ جارعىسىن تولىقتاي قولدايدى. مەن بۇل جونىندە بارلىق حالىقارالىق ءىس-شارالاردا ۇنەمى ايتىپ ءجۇرمىن. بۇۇ-عا مۇشە باسقا مەملەكەتتەردىڭ ءبارى ۇيىم جارعىسىندا بەكىتىلگەن قاعيداتتاردى مۇلتىكسىز ساقتاۋى كەرەك دەپ سانايمىن. بۇۇ – قازاقستان ءۇشىن بالاماسى جوق ءارى امبەباپ حالىقارالىق ۇيىم. ۇيىمعا مۇشە ەلدەردىڭ ارقايسىسى ونىڭ قىزمەتىن جەتىلدىرۋ ىسىنە بارىنشا ۇلەس قوسۋعا ءتيىس. ءبىز بۇۇ باس حاتشىسى انتونيۋ گۋتەرريشتىڭ قىزمەتىن جوعارى باعالايمىز. وسى مۇمكىندىكتى پايدالانا وتىرىپ, وعان ىزگى تىلەگىم مەن سالەمىمدى جولدايمىن. قازاقستانعا كەلەر بولساق, ءبىزدىڭ تاراپىمىزدان بۇۇ-نىڭ كەڭ اۋقىمدى قىزمەتىنە جان-جاقتى قولداۋ كورسەتىلەدى. بۇگىندە بۇۇ قاۋىپسىزدىك كەڭەسىن رەفورمالاۋ قاجەتتىگى تۋرالى كوپ ايتىلىپ ءجۇر. بۇل ماسەلە دەموكراتيا قاعيداتتارىنا ساي ەگجەي-تەگجەيلى تالقىلاۋعا لايىق دەپ سانايمىز. ءاربىر ەل بۇعان ءوز ۇلەسىن قوسىپ, پىكىرىن ايتا الادى», دەدى قاسىم-جومارت توقاەۆ.
كەزدەسۋ بارىسىندا ايماقتاعى قاۋىپسىزدىك پەن تۇراقتىلىقتى قامتاماسىز ەتۋ, سونداي-اق تەرروريستىك قاۋىپ-قاتەرلەرگە قارسى ءىس-قيمىل ماسەلەلەرى تالقىلاندى.
بۇۇ وكىلدەرى قازاقستاننىڭ بۇل سالاداعى كۇش-جىگەرىنە جوعارى باعا بەرىپ, ەلىمىز بۇۇ-نىڭ تەرروريزمگە قارسى كۇرەس ماسەلەسىندە كوشباسشىلاردىڭ ءبىرى ەكەنىنە نازار اۋداردى. ۆلاديمير ۆورونكوۆ استانادا قاۋىپسىزدىك جونىندە فورۋم وتكىزۋدىڭ ماڭىزدى ەكەنىن اتاپ ءوتىپ, بۇل جيىن ديالوگ پەن ءوزارا سەنىمدى قالپىنا كەلتىرۋگە, ورتاق شەشىمدەر ىزدەۋگە ارنالعان الاڭداردىڭ بىرىنە اينالعانىن جەتكىزدى.
