قازاقستان ستراتەگيالىق زەرتتەۋلەر ينستيتۋتىنىڭ (قسزي) مالىمەتىنشە, مۇرات لاۋمۋلين ۇزاققا سوزىلعان ناۋقاستان كەيىن قايتىس بولدى.
مۇرات لاۋمۋلين 1959 جىلى الماتىدا دۇنيەگە كەلگەن.
ءار جىلدارى ول قازمۋ-دە ساباق بەردى, ەلىمىزدىڭ جەتەكشى عىلىمي مەكەمەلەرىندە عىلىمي-زەرتتەۋ جۇمىستارىمەن اينالىستى, سىرتقى ىستەر مينيسترلىگىندە جۇمىس ىستەدى, ديپلوماتيالىق كورپۋستا كوپتەگەن جاۋاپتى قىزمەتتەردى اتقاردى. ونىڭ ىشىندە گەرمانيا مەن بەلارۋس ەلدەرىندە جۇمىس ىستەدى. 2018 جىلدان باستاپ «استانا» حالىقارالىق عىلىمي كەشەنىنىڭ ەۋروپا جانە امەريكانى زەرتتەۋ ورتالىعىنىڭ جەتەكشىسى قىزمەتىن اتقاردى.
سونىمەن قاتار مۇرات لاۋمۋلين - كوپتەگەن ماراپاتتاردىڭ يەگەرى جانە كوپتەگەن عىلىمي ەڭبەكتەردىڭ اۆتورى.
«لاۋمۋلين مۇرات تۇرار ۇلى بۇكىل سانالى ءومىرىن عىلىمعا ارناعان. ول - ۇلتتىق قاۋىپسىزدىك, سىرتقى ساياسات, ورتالىق ازيا گەوساياساتى, قازاقستاننىڭ باتىسپەن قارىم-قاتىناسى, اقش-تىڭ ورتالىق ازياداعى ستراتەگياسى تۋرالى ونداعان مونوگرافيالار مەن جۇزدەگەن ماقالالار جازعان عالىم. ونىڭ ىشىندە كاسىبي عىلىمي ورتادا مويىندالعان 4 تومدىق «دۇنيەجۇزىلىك شىعىستانۋداعى قازاقستان جانە ورتالىق ازيا تاريحى» ەڭبەگى بار. مۇرات تۇرار ۇلى عىلىمدا ەرەكشە باعىت – الەمدىك گەوساياساتتاعى ورتالىق ازيانى زەرتتەۋ مەكتەبىن قالىپتاستىردى جانە دامىتتى. مۇرات تۇرار ۇلىنىڭ قايتىس بولۋى قازاقستاننىڭ بۇكىل ساراپشىلار قاۋىمداستىعى ءۇشىن اۋىر قازا», دەپ جازدى قازسزي.
