كۇرەس زالىنىڭ اشىلۋ سالتاناتىنا قاتىسقان كەربۇلاق اۋدانىنىڭ اكىمى قانات ەسبولاتوۆ, وبلىستىق دەنە شىنىقتىرۋ جانە سپورت باسقارماسىنىڭ باسشىسى ۇلان رىسقۇل, گرەك-ريم كۇرەسىنەن ازيا چەمپيونى مارعۇلان اسەمبەكوۆ اۋىل تۇرعىندارىن قۇتتىقتاپ, جۇرەكجاردى تىلەكتەرىن ارنادى.
– قولدانىسقا بەرىلىپ وتىرعان كۇرەس زالىنىڭ قۇرىلىسىنا جەرگىلىكتى بيۋدجەتتەن 135 ملن 400 مىڭ تەڭگە ءبولىنىپ, «باۋىر قۇرىلىس كومپانياسى» جاۋاپكەرشىلىگى شەكتەۋلى سەرىكتەستىگى ەل يگىلىگىنە ۇسىندى. كەلەشەكتە وسى سپورت زالىنان قازاقتىڭ اتىن شىعاراتىن ايبىندى ۇلدار مەن ءور رۋحتى قىزدار كوپتەپ شىقسىن, – دەدى قانات ەسبولاتوۆ.
كۇرەس زالىنىڭ تۇساۋىن ۇلان رىسقۇل مەن باسشي اۋىلدىق وكرۋگىندەگى اقساقالدار القاسىنىڭ توراعاسى جاقىپبەك سامىلتىر ۇلى كەسىپ, جاس پالۋانداردىڭ شىنىعۋىنا ۇسىندى.
كۇرەس زالىنداعى ەركىن كۇرەس ۇيىرمەسىنىڭ جاتتىقتىرۋشىسى ازامات قويباعاروۆتىڭ ايتۋىنشا, باسشي اۋىلىندا كۇرەسكە قۇمار ۇل-قىزدار بارشىلىق. 30-35 بالا ەركىن كۇرەسپەن تۇراقتى اينالىسىپ كەلەدى. ولاردىڭ باسىم بولىگى اۋداندىق, وبلىستىق, رەسپۋبليكالىق بىرىنشىلىكتەردەن جۇلدەلى ورىن الىپ ءجۇر.
جەتىسۋ وبلىسى
