بيىل سوت شەشىمىمەن 5 بۋكمەكەرلىك كەڭسە جابىلدى. ولاردىڭ جۇمىسى قولدانىستاعى زاڭناما نورمالارىنا سايكەس كەلمەدى. قازىر تاعى 3 بۋكمەكەرلىك كەڭسەگە قاتىستى ليتسەنزيالاردىڭ كۇشىن جويۋ جۇمىسى ءجۇرىپ جاتىر.
مادەنيەت جانە سپورت مينيسترلىگىنىڭ مالىمەتىنە سۇيەنسەك, ۆەدومستۆو ءتۇسىندىرۋ ارقىلى جانە سوت تارتىبىمەن بۋكمەكەرلىك كەڭسەلەردىڭ سانىن ازايتۋ بويىنشا جۇمىس جۇرگىزەدى. مىسالى, كەيىنگى 3 جىلدا بۋكمەكەرلىك كەڭسەلەر 15 ليتسەنزيانى ءوز ەركىمەن تاپسىردى.
ايتا كەتسەك, قازاقستانداعى ويىن بيزنەسى سۋبەكتىلەرىنىڭ جالپى سانى دا كەمىپ جاتىر. كەيىنگى 5 جىلدا ولار 2,5 ەسە ازايدى. ەگەر 2018 جىلى 97 بولسا, بيىل ولاردىڭ سانى 38 بىرلىك بولدى.
«مادەنيەت جانە سپورت مينيسترلىگى بۋكمەكەرلىك كەڭسەلەر مەن ويىن بيزنەسىنىڭ باسقا دا نىساندارىنىڭ زاڭ نورمالارىن ساقتاۋىن مۇقيات قاداعالايدى. ماسەلەن, 2023 جىلدىڭ باسىنان مينيسترلىك سوت تارتىبىمەن ويىن بيزنەسى سالاسىنداعى 7 ليتسەنزيانىڭ قولدانىلۋىن توقتاتتى. وسىعان ۇقساس تاعى 7 ۇيىمعا قاتىستى جۇمىس اتقارىلىپ جاتىر. سونداي-اق ينتەرنەتتە دە مونيتورينگ جۇرگىزىلەدى. بيىل 3670 زاڭسىز ونلاين-كازينو بۇعاتتالدى», دەدى قر مادەنيەت جانە سپورت ۆيتسە-ءمينيسترى ەرجان ەركىنباەۆ.
