ءماجىلىس دەپۋتاتى, «اۋىل» پارتياسىنىڭ مۇشەسى قاراقات ابدەن دەپۋتاتتاردىڭ وڭىرلەرگە ساپار بارىسىندا اقمولا جانە قاراعاندى وبلىستارىنداعى اۋىلدارعا بارىپ, حالىقتىڭ جاي-كۇيىمەن تانىستى.
دەپۋتاتتىڭ ايتۋىنشا, جاۋىر بولعان جول جانە ينتەرنەت ماسەلەسى قاراعاندى وبلىسىنداعى نۇرا اۋدانىنداعى جانبوبەك اۋىلىن دا اينالىپ وتكەن جوق. سونىمەن قاتار دەپۋتات اتالعان اۋىل ينتەرنەتتەن دە تىس قالعانىن اتاپ ءوتىپ, جول تاۋقىمەتىنەن بولەك, ۇيالى بايلانىستىڭ جوقتىعى دا تۇرعىنداردى سارساڭعا سالاتىنىنا نازار اۋداردى. حالىقتىڭ تۇرمىس-تىرشىلىگىمەن ەتەنە تانىسقان دەپۋتات حالىقتى جارىق ماسەلەسى دە الاڭداتىپ وتىرعانىن جەتكىزدى.
دەپۋتات قاراعاندى وبلىسى نۇرا اۋدانىنداعى قۇلانوتپەس اۋىلىنىڭ تۇرعىندارىمەن كەزدەستى. «حالىقتى تولعاندىرعان نەگىزگى ماسەلە – تازا اۋىز سۋ, ساپالى جول, قولجەتىمدى بايلانىس. اسىرەسە سۋ ماسەلەسىن باستى نازارعا الدىم. سەبەبى بۇعان بيۋدجەتتەن قىرۋار قارجى بولىنگەن. «Life Story Invest» جشس مەردىگەرلىك ۇيىمىمەن, «كازاحستانسكيە تەحنولوگي» جشس قوسالقى مەردىگەرلىك ۇيىمىمەن شارت جاسالدى. تەندەرگە قاتىسۋعا كەلگەندە بىلەك سىبانا كىرىسكەن مەردىگەرلەر ىسكە كەلگەندە باياۋ قيمىلداپ, حالىقتىڭ اشۋىنا ءتيىپ وتىر», دەدى ق.ابدەن.
* * *
سەناتور اسەم راحمەتوۆا سولتۇستىك قازاقستان وبلىسىن ارالادى. دەپۋتات ەسىل اۋدانىنا ساپار بارىسىندا جەرگىلىكتى اۋرۋحانانىڭ ەمدەۋ كورپۋسىن جوندەۋ بارىسىمەن تانىستى.
مۇندا شاتىردى جوندەۋ جانە تەرەزە جاقتاۋلارىن اۋىستىرۋ جۇمىستارى ءجۇرىپ جاتىر. بۇل شارالارعا 97 ميلليون تەڭگەدەن استام قارجى بولىنگەن بولاتىن. جوندەۋ جۇمىستارى وسى جىلدىڭ قىركۇيەگىنە دەيىن اياقتالادى دەپ جوسپارلانعان. سەناتور اۋىل تۇرعىندارىمەن كەزدەسۋ بارىسىندا سۋمەن جابدىقتاۋ, جولداردى جوندەۋ جانە ينتەرنەتكە قولجەتىمدىلىكتى قامتاماسىز ەتۋگە قاتىستى وزەكتى ماسەلەلەردى تالقىلادى.
«بۇگىنگى كەزدەسۋدە «پەتروپاۆل – جەزقازعان» اۆتوجولىنىڭ جاعدايى ناشار ەكەنى اتاپ ءوتىلدى. سولتۇستىك قازاقستان وبلىسىنداعى ۇزىندىعى 359 شاقىرىم بولاتىن ماگيسترالدىڭ وسى ۋچاسكەسىندە شۇڭقىرلار جوندەلدى, بىراق جولدىڭ جاي-كۇيى ورتاشا جوندەۋدى قاجەت ەتەدى. بۇل شىنىمەن وزەكتى ماسەلە. ءبىز ونىڭ شەشىلۋىنە جاردەمدەسۋگە تىرىسامىز», دەدى سەناتور اسەم راحمەتوۆا.
ءوڭىر تۇرعىندارى كەزدەسۋ بارىسىندا سۇراقتار قويىپ, مەملەكەتتىك جاردەماقىلاردى ەسەپتەۋ ەرەكشەلىكتەرى مەن زەينەتاقى اۋدارىمدارىن تولەۋ ءتارتىبىن جانە باسقا دا ماسەلەلەردى ءتۇسىندىرۋدى ءوتىندى.
* * *
ءماجىلىس دەپۋتاتى سامات مۇساباەۆ ماڭعىستاۋ وبلىسىنداعى جاڭاوزەن قالاسىندا «Korkem Alem» ەت كومبيناتىنىڭ جۇمىسىمەن تانىستى. كەزدەسۋ بارىسىندا دەپۋتات كومبيناتتىڭ ادال ءونىم شىعارىپ, ساپالى قىزمەت كورسەتۋىنە نازار اۋداردى.
كومبينات قىزمەتى بارلىق سانيتارلىق تالاپتارعا ساي جۇمىس ىستەپ, مال سويۋ, ەت وڭدەۋ تالاپتارى ساقتالىپ, اۆتوماتتاندىرىلعان جۇيە نەگىزىندە جۇمىس ىستەيدى. مۇندا اي سايىن 360 توننا ەت شىعارىلىپ, 100 توننا ەت ءونىمى وندىرىلەدى. ەتتەن جاسالاتىن جارتىلاي فابريكات ونىمدەرى, دەليكاتەستەر جانە اس ۇيگە قاجەت وزگە دە ونىمدەر بار.
«بۇگىن «Korkem Alem» كومبيناتى حالىققا ادال ءونىم ۇسىنىپ, ساپالى تاۋار وندىرۋگە قانشالىقتى ءمان بەرىپ وتىرعانىن, وزگە كاسىپكەرلەرمەن قانداي بايلانىس ورناتىپ جاتقانىن نازارعا الدىم. سونداي-اق كاسىپكەرلەردىڭ ەتتى قايدان الىپ جاتقانىنا, جەرگىلىكتى بيلىكتىڭ قولداۋ شارالارىنا زەر سالدىم», دەدى س.مۇساباەۆ.
* * *
سەناتورلار التىنبەك نۇح ۇلى مەن ەرنۇر ايتكەنوۆ پاۆلودار وبلىسىنا بارىپ, ءوڭىردىڭ الەۋمەتتىك-ەكونوميكالىق دامۋ كورسەتكىشتەرىمەن تانىسۋ ءۇشىن ايماق باسشىلىعىمەن كەزدەستى.
دەپۋتاتتار پاۆلودار قالاسىنداعى №2 جىلۋ ەنەرگەتيكالىق ورتالىعىنا دا باردى. قالانىڭ جەو 1961 جىلى پايدالانۋعا بەرىلگەن بولاتىن. ونىڭ جىلىتۋ ماۋسىمىنا دايىندىعى ماسەلەسى ەرەكشە باقىلاۋدا تۇر.
سەناتورلار جەو-داعى ءوندىرىس جۇمىسىمەن تانىستى جانە سالالىق تسەحتاردا بولىپ, ەكىباستۇزداعى وتكەن جىلعى توتەنشە جاعدايعا ۇقساس اۆاريالاردى بولدىرماۋ ءۇشىن جۇمىستاردى جانداندىرۋدىڭ ماڭىزدىلىعىن اتاپ ءوتتى.
كەزدەسۋ بارىسىندا سەناتورلارعا №2 پاۆلودار جەو-دا جىلىتۋ قازاندىقتارى مەن تۋربينالارعا جوسپارلى جوندەۋ جۇرگىزىلىپ جاتقانى جانە الداعى ماۋسىمعا بارلىق قىزمەتتەر قويىلعان مىندەتتەردى ۋاقتىلى ورىنداۋعا ءتيىس ەكەندىگى تۋرالى اقپارات ايتىلدى.
* * *
ءماجىلىس دەپۋتاتتارى باۋىرجان سماعۇلوۆ پەن ارمان قالىقوۆ بالقاش قالاسىنداعى «قازامىس ەنەردجي» جشس باردى. وندا الداعى جىلىتۋ ماۋسىمىنا دايىندىق جۇمىستارىن تالقىلادى. ەڭبەك ۇجىمىمەن كەزدەسۋدە ارمان قالىقوۆ جابدىقتى جاڭارتۋ ماسەلەسىن كوتەردى.
«وزدەرىڭىز بىلەتىندەي, قىستا بولعان توتەنشە جاعداي ەكىباستۇزدا جىلۋ جەلىلەرىنىڭ, ونىڭ ىشىندە جىلۋ ەلەكتر ورتالىقتارىنىڭ جابدىقتارىنىڭ توزعانىن كورسەتتى. بۇگىندە ەلىمىزدىڭ بارلىق جىلۋ ەلەكتر ورتالىقتارىنىڭ ەسكىرگەن جابدىقتارىن جاڭارتۋ قاجەت. مەنشىك يەلەرى ءۇشىن بۇل باعىتتاعى جۇمىستى جانداندىرۋى ماڭىزدى», دەدى دەپۋتات.
كەزدەسۋ بارىسىندا ۇجىم قىزمەتكەرلەرى وزدەرىن تولعاندىرعان سۇراقتاردى العا تارتىپ, ناقتى جاۋاپ الدى. ودان ءارى دەپۋتاتتار بالقاش مىس بالقىتۋ زاۋىتىنىڭ تىنىس-تىرشىلىگىمەن, قالانى اباتتاندىرۋ بارىسىمەن تانىسىپ, ازاماتتاردىڭ ءوتىنىشى بويىنشا قوعامدىق قابىلداۋ وتكىزەدى.
* * *
ءماجىلىسى دەپۋتاتى, پالاتا توراعاسىنىڭ ورىنباسارى البەرت راۋ قوستاناي وبلىسىنداعى بەيىمبەت مايلين اۋدانىنىڭ اۋىلدارىنا بارىپ, تازا اۋىز سۋمەن قامتۋ جۇمىستارىمەن تانىستى.
مىڭنان استام تۇرعىنى بار اسەنكريتوۆكا اۋىلىندا اۋىز سۋ قۇبىرلارى جاڭارتىلىپ, كراسنوسەلسكوە اۋىلىنداعى سۋ قۇبىرىنىڭ قۇرىلىسى جۋىق ارادا اياقتالۋى جوسپارلانىپ وتىر. جوبانىڭ جالپى قۇنى 740 ملن تەڭگەنى قۇرايدى. اۋىل تۇرعىندارى سۋ تاپشىلىعى ماسەلەسىنەن ارىلىپ, ساپالى اۋىز سۋعا قول جەتكىزدەرىن ايتىپ, ريزاشىلىقتارىن ءبىلدىردى.
البەرت راۋ ودان ءارى «قوستاناي – قارابۇتاق» باعىتىنداعى رەسپۋبليكالىق ماڭىزى بار جولدىڭ جوندەۋ جۇمىستارىمەن تانىستى. دەپۋتاتتىڭ ايتۋىنشا, قازىرگى تاڭدا اۋىلدىڭ الەۋەتىن كوتەرۋ ماقساتىندا «اۋىل – ەل بەسىگى» جوباسى جۇزەگە اسىرىلىپ جاتىر.
«رەسپۋبليكالىق بيۋدجەتتەن قارجىلاندىرىلعان نىسانداردىڭ جۇمىسى ءاردايىم دەپۋتاتتار باقىلاۋىندا. اسىرەسە, اۋدانداردىڭ, شالعاي اۋىلداردىڭ الەۋمەتتىك احۋالى باستى نازاردا بولادى. ودان بولەك جاڭا جوبالار بويىنشا دا حالىق اراسىندا ءتۇسىندىرۋ جۇمىستارىن دا جۇرگىزىپ جاتىرمىز», دەدى ا.راۋ.
* * *
سەنات دەپۋتاتى سەرگەي ەرشوۆ قاراعاندى وبلىسىندا بولىپ, جەرگىلىكتى تۇرعىندارمەن, ءماسليحات دەپۋتاتتارىمەن جانە سايلاۋشىلارمەن كەزدەستى.
جۇزدەسۋ بارىسىندا سەناتورعا ورمان القاپتارىندا, ەلدى مەكەندەردە جانە وبلىستىڭ دالالىق ايماقتارىندا ورتكە قارسى قاۋىپسىزدىكتى ۇيىمداستىرۋ جونىندە جۇرگىزىلىپ جاتقان جۇمىستار تۋرالى جان-جاقتى باياندالدى. سونداي-اق ءورت ءسوندىرۋ بولىمدەرىنىڭ جاڭا پۋنكتتەرى مەن ولاردىڭ جابدىقتالۋ دەڭگەيى تانىستىرىلدى.
قاتىسۋشىلار كەزدەسۋ بارىسىندا قارقارالى ۇلتتىق تابيعي پاركىندەگى ءورت قاۋىپسىزدىگىنە قاتىستى وزەكتى ماسەلەلەردى تالقىلادى. ەڭ الدىمەن, ماتەريالدىق-تەحنيكالىق بازانى قارجىلاندىرۋ دەڭگەيىنىڭ تومەندىگى مەن ۇلتتىق پارك قىزمەتكەرلەرى جالاقىسىنىڭ ازدىعىنا بايلانىستى ماسەلەلەر ايتىلدى.
دەپۋتات سونىمەن قاتار قاراعاندى وبلىسى اكىمدىگى جانىنداعى اۋماقتىق قورعانىس جونىندەگى اسكەري بولىمدە دە بولدى. سەرگەي ەرشوۆ اسكەردىڭ ورنالاسقان جەرىن كورىپ, اسكەري قىزمەتشىلەرمەن اڭگىمەلەستى جانە وسى ءبولىمنىڭ قىزمەتىمەن تانىستى.
اسكەري ءبولىمنىڭ باسشىسى ءوز كەزەگىندە اۋماقتىق قورعانىستى ۇيىمداستىرۋ جونىندەگى جوسپارلار مەن الدا تۇرعان مىندەتتەر تۋرالى باياندادى. سەناتور وڭىرگە ساپاردىڭ سوڭىندا قاراعاندى وبلىستىق ءماسليحاتىنىڭ توراعاسىمەن كەزدەستى. تاراپتار وڭىردەگى وزەكتى ماسەلەلەردى جانە ولاردى زاڭ جۇزىندە شەشۋ جولدارىن تالقىلادى.
