قر ەڭبەك سىڭىرگەن ەنەرگەتيگى, ساتباەۆ قالاسىنىڭ قۇرمەتتى ازاماتى, «قۇرمەت» وردەنىنىڭ يەگەرى ياحيا جاقىپبەك ۇلى – سەكسەننىڭ بەلورتاسىنداعى كونەكوزدەردىڭ ءبىرى. كوپتى كورگەن قارتىمىز كوپتى بىلەدى. تابيعاتىنان اقىن بولىپ جاراتىلعان اعامىز ماماندىعى ەنەرگەتيكا سالاسى بولسا دا, مادەنيەتكە, ونەرگە وتە جاقىن ادام.
كوزىمىز اعانىڭ باسىنداعى تاقياسىنا ءتۇستى. «ەرەكشەلەۋ ەكەن» دەستىك.
– بۇل اتاقتى حاليفا التاي اقساقالدىڭ سىيلاعان تاقياسى عوي – دەگەن كەزدە «وۋ, بۇل ءسىزدىڭ قولعا قالاي ءتۇسىپ ءجۇر؟» دەپ, اڭگىمەنى تەرەڭدەتە تۇسكىمىز كەلدى.
– 1992 -ءنىڭ كۇزىندە دۇنيەجۇزى قازاقتارىنىڭ تۇڭعىش قۇرىلتايى ءوتتى ەمەس پە؟ شەتەلدەگى قانداستاردىڭ ۇلكەن توبى جەزقازعان – ۇلىتاۋ وڭىرىنە كەلدى. ولاردىڭ باسشىسى حاليفا التاي اقساقال بولدى.
قانداستارىمىز ۇلىتاۋعا بارىپ ءتاۋ ەتىپ كەلگەن سوڭ, ساتباەۆ قالاسىنا ات باسىن تىرەدى. قالاداعى «دوستىق» مەيرامحاناسىندا قوناقتاردى كۇتىپ, داستارقان جايىلدى. قالانىڭ باسشىسى ۆلاديمير نيكولاەۆيچ مالىشەۆتىڭ سوندا قازاقى شاپان كيىپ العانىن, العاش رەت قازاقشا سويلەگەنىن كوردىم. داستارقاندى اقىن, جىرشى, تەرمەشى شىنبولات دىلدەباەۆ باسقاردى. ونىڭ ونەرىنە ءتانتى بولىپ كەتكەن حاليفا التاي اقساقال: – اينالايىن, سەنى بۇرىن ۆيدەودان كورىپ ەدىم, ەندى, مىنە, كوزىممەن كورىپ تۇرمىن. مىناۋ مەنەن ساعان سىي-سياپات, ەستەلىك بولسىن دەدى دە, وسى تاقيانى تارتۋ ەتتى – دەپ, اڭگىمەسىن ءبىر شيىرىپ تاستاعان اعامىزعا «بۇل سوندا اۋەلگىدە شىنبولات اعامىزعا سىيلانعان تاقيا بولدى عوي» دەپ ناقتىلاي ءتۇسۋدى ءجون كوردىك.
– سولاي. ال شىنبولات – مەنىڭ كىشكەنتايىمنان بىرگە وسكەن جان دوسىم. تاقيا ونىڭ باسىنا تارلىق ەتتى. سوسىن ول ماعان سىيلادى. سودان بەرى ۇيدە تۇر. كەيدە وسىلايشا ارا-تۇرا كيىپ قويامىن.وتكەندى ەسكە سالادى, تاريحتى وياتادى, – دەگەن جاقاڭا مۇنى ۇيدە ساقتاي بەرمەي, قالا مۋزەيىنە تابىستاۋ تۋرالى ۇسىنىس ايتتىق. اعامىز بۇعان كەلىستى.
ۇلىتاۋ وبلىسى,
ساتباەۆ قالاسى
