استانادا وتىرىپ وينايتىن ۆولەيبولدان ازيا چەمپيوناتى اياقتالدى. چەمپيونات 3-8 شىلدەدە ەلورداداعى ج. ۇشكەمپىروۆ اتىنداعى جەكپە-جەك سارايىندا ءوتتى. دوداعا 8 ەلدەن قازاقستان, جاپونيا, تايلاند, يران, يراك, وڭتۇستىك كورەيا, موڭعوليا جانە ءۇندىستاننان 200-دەن استام سپورتشى باق سىناستى.
قازاقستان قۇراماسى 6 شىلدەدە جارتىلاي فينالدا قىتاي كومانداسىن 3:2 ەسەبىمەن جەڭدى. ناتيجەسىندە, ازيا چەمپيوناتىنىڭ فينالىنا شىعىپ, 2024 جىلى پاريجدە وتەتىن پاراليمپيادا ويىندارىنىڭ ليتسەنزياسىن ۇتىپ الدى.
بۇگىن قازاقستان قۇراماسى يران كومانداسىمەن فينالدىق كەزدەسۋ وتكىزدى. ويىن وتە تارتىستى ءوتتى. ويتكەنى, ەكى كوماندا دا وسال ەمەس. يران قۇراماسى – چەمپيوناتتاعى بارلىق كەزدەسۋدە جەڭىلمەگەن جالعىز كوماندا. ال, قازاقستاننىڭ پاراۆولەيبولشىلارى الەمدىك رەيتينگتە 7-ءشى, ازيا رەيتينگىندە 2-ورىندا تۇر.
كەزدەسۋدىڭ ءبىرىنشى كەزەڭىندە يراندىقتار 25:21 ەسەبىمەن جەڭىسكە جەتتى. ال, قازاقستان قۇراماسى ەكىنشى كەزەڭدەگى العاشقى ۇپايدى يەلەنگەن ەدى. الايدا, قارسىلاستار باسىمدىعىنا تويتارىس بەرۋ وڭايعا تۇسپەدى. ەكىنشى كەزەڭنىڭ ناتيجەسى – 25:14 بولىپ, جەڭىس قارسىلاس كوماندانىڭ ۇلەسىنە جازىلدى.
شەشۋشى ءۇشىنشى كەزەڭدە دە قازاقستاندىق پاراۆولەيبولشىلار ۇپايدى كوبىرەك ەنشىلەۋگە تالپىندى. ەسەپ ايىرماسىن قىسقارتىپ, باسىمدىقتى يەلەنۋگە ۇمتىلعان قازاق ويىنشىلارى ءۇشىن بۇل كەزەڭ قارسىلاستار ەنشىسىندە كەتتى. ەسەپ – 25:17.
سونىمەن قازاقستاننىڭ پاراۆولەيبول كومانداسى ازيا چەمپيوناتىنىڭ كۇمىس جۇلدەگەرى اتاندى.
بۇل كەزدەسۋدە تورەشىلەر تاراپىنان ەكى كوماندانىڭ ويىنشىلارىنا بىرنەشە رەت سارى قاعاز كورسەتىلدى.
