ۇلتتىق دومبىرا كۇنىنە وراي, قالانىڭ ورتالىق ستاديونىندا ارنايى ساحنا قۇرىلىپ, اق شاڭقان كيىز ۇيلەر تىگىلدى. ال قاتارىنان 7 كۇي ورىنداپ, قالا تۇرعىندارىنىڭ ىستىق ىقىلاسىنا بولەنگەن مىڭ جارىم دومبىراشىنىڭ ىشىندە ءار سالادا ەڭبەك ەتىپ جۇرگەن جۇمىسشىلار, ماماندار, ستۋدەنتتەر مەن مەكتەپ وقۋشىلارى بار.
مىڭ جارىم ادامدىق وركەستردىڭ ەڭ جاس مۇشەسى – 7 جاسار ايزەرە ساحان. ال ەڭ قارت دومبىراشى – بۇگىندە جاسى توقسانعا اياق باسقان ارقالىقتىڭ قۇرمەتتى ازاماتى كاكي اقان اقساقال. مەرەكەلىك وركەستردىڭ قۇرامىندا ءبىر عانا بولتىرىكوۆتەر اۋلەتىنەن وتىز ادام ونەر كورسەتكەنىن دە ايتا كەتۋ كەرەك.
ءىس-شارا بارىسىندا ونەرپازداردىڭ كيىمىن, اسپابىن الىپ بەرىپ, دەمەۋشىلىك جاساعان مەتسەناتتارعا قۇرمەت كورسەتىلدى.
ەڭ قىزىعى, مەرەكەدە ونەر كورسەتكەن 1500 دومبىراشىنىڭ 70 پايىزى بۇعان دەيىن دومبىرا تارتىپ كورمەگەن بولىپ شىقتى. ولار ۇلتتىق اسپاپتى دومبىرا كۇنىنە دايىندىق بارىسىندا ۇيرەنىپتى.
ارقالىق كەشىن كۇمبىرىمەن تەربەگەن كۇي كەرۋەنى تاياۋدا عانا وتكەن «دومبىرا – دۋمان» ايماقتىق دومبىراشىلار بايقاۋىنىڭ گالا-كونتسەرتىنە ۇلاستى. ءىس-شارانىڭ سوڭىندا ارقالىققا ارنايى شاقىرىلعان قۋاندىق راحىم, شاھاريزات سەيداحمەت, دينارا جاڭابەرگەنوۆا سىندى ەسترادا انشىلەرى ءان شىرقادى.
قوستاناي وبلىسى
