بۇل تۋرالى «قازاق گازەتتەرى» باس ديرەكتورىنىڭ ورىنباسارى - الماتى قالاسى باسىلىمدارىنىڭ جەتەكشىسى دۋمان اناش الەۋمەتتىك جەلىدەگى پاراقشاسىندا جازدى.
«بۇگىن «قازاق گازەتتەرى» سەرىكتەستىگى الماتى قالاسىنداعى باسىلىمدارىنىڭ قىزمەتكەرلەرى قاسيەتتى قۇربان ايت پەن ءتول مەرەكەمىزگە وراي رەداكتسيامىزدا داستارقان جايىپ, قۇران وقىتتى. ء«ولى ريزا بولماي, ءتىرى بايىمايدى» دەيدى, دۇنيەدەن وتكەن جۇمابەك كەنجالين, امانحان ءالىم ۇلى, نۇرپەرزەنت دومباي جانە ت.ب. وسى شاڭىراقتىڭ قالىپتاسۋىنا قاجىرلى ەڭبەك ەتكەن قالامگەر اعالارىمىزدى ەسكە الدىق. رۋحتارى شات بولسىن!
سونداي-اق جارتى عاسىرعا جۋىق ەڭبەك جولىنان ءوتىپ, «اقيقات» جۋرنالىندا يىقتاسىپ قاتار زەينەت دەمالىسىنا شىعىپ جاتقان قوس قالامگەر اعامىز سەرىكقالي حاسان مەن قۇتماعامبەت قونىسبايعا قۇرمەت كورسەتىلىپ, «ەڭبەك ارداگەرى» مەدالى تاپسىرىلدى. ەڭبەكتەرىڭىزدىڭ زەينەتىن كورىڭىزدەر, اعالار!
كاسىبي مەرەكەمىزدە ەڭبەگى ەلەنىپ جاتقان ارىپتەستەرىمىزدىڭ قاتارىندا «بالدىرعان» جۋرنالىنىڭ سۋرەتشىسى ەرلان مومباەۆ پەن Kazgazeta ينتەرنەت-رەداكتسياسىنىڭ باسشىسى اينۇر مۇراتوۆا حانىم دا بار. قوس ارىپتەسىمىز «اقپارات سالاسىنىڭ ۇزدىگى» توسبەلگىسىمەن ماراپاتتالدى. ارىپتەستەرىمىز شىن مانىندە ۇزدىك. ويتكەنى بالالار باسىلىمىنىڭ جارتىسىنان استامى يلليۋستراتسيامەن, بەزەندىرۋمەن شىعاتىنى بەلگىلى. بۇل - وراسان ەڭبەك. سونىمەن بىرگە دەمالىس كۇنىندە دە, مەرەكەدە دە تولاسسىز اقپارات تاراتاتىن, بۇكىل گازەت-جۋرنالدارىمىزدىڭ سايتىنا يە بولىپ وتىرعان, بۇل ازداي الەۋمەتتىك جەلىدەگى پاراقشالاردى دا دامىتۋعا كۇش سالىپ جاتقان ينتەرنەت-رەداكتسيا قىزمەتى - ناعىز كرەاتيۆ. ونى تۇراقتى جۇرگىزىپ وتىرۋ وڭاي ەمەس. اينۇر اكىمبايقىزىنىڭ بۇل جولداعى ەڭبەگى ەرەن, قۇرمەتكە دە لايىق!
قىسقاسى, ۇجىمداعى ءاربىر ارىپتەسىمىز بيىك باعاعا يە.
ايتتان ايتقا امان-ەسەن, مەرەكەدەن مەرەكەگە بەرەكە-بىرلىكپەن جەتە بەرەيىك! ەڭبەك ەلەنە بەرسىن, قادىرلى ارىپتەستەر!», دەلىنگەن جازبادا.
