پرەزيدەنت جان اسسەلبورنعا ءىلتيپات بىلدىرە وتىرىپ, ونىڭ بۇل ساپارى كوپتەگەن سالا بويىنشا ەكىجاقتى ىنتىماقتاستىقتى ودان ءارى دامىتۋ ءۇشىن جاڭا مۇمكىندىكتەرگە جول اشاتىنىن اتاپ ءوتتى.
مەملەكەت باسشىسى ليۋكسەمبۋرگ پرەمەر-ءمينيسترى كساۆە بەتتەلمەن بۇۇ باس اسسامبلەياسىنىڭ 77-ءشى سەسسياسى الاڭىندا وتكەن كەلىسسوزدەرىن ەسكە الدى.
«سول كەزدە قازاقستان مەن ليۋكسەمبۋرگ اراسىنداعى ءوزارا ءتيىمدى سەرىكتەستىكتى دامىتۋدىڭ ۇزاقمەرزىمدى پەرسپەكتيۆالارى تۋرالى وتە تابىستى ءارى مازمۇندى اڭگىمە بولدى. قازاقستان ءسىزدىڭ ەلىڭىزدى جانە حالقىڭىزدى قۇرمەتتەيدى. ءبىز ءوزارا ىنتىماقتاستىعىمىزدىڭ بولاشاعىنا سەنەمىز», دەدى قاسىم-جومارت توقاەۆ.
كەزدەسۋ بارىسىندا ولار كولىك جانە لوگيستيكا, تسيفرلاندىرۋ, «جاسىل» ەنەرگەتيكا سالالارىنداعى, سونداي-اق استانا حالىقارالىق قارجى ورتالىعى اياسىنداعى ءوزارا ءىس-قيمىل پەرسپەكتيۆالارىن قاراستىردى.
جان اسسەلبورن ەكى ەل اراسىنداعى قارىم-قاتىناستاردىڭ قارقىندى دامىپ كەلە جاتقانىن اتاپ ءوتتى.
«بۇگىن تاڭەرتەڭ ءبىز ءوزارا تۇسىنىستىك تۋرالى ەكى مەموراندۋمعا قول قويدىق. قازىرگى ۋاقىتتا Cargolux قازاقستانعا اپتا سايىن 21 رەيس جاسايتىنىن بىلەسىز. سونداي-اق ليۋكسەمبۋرگ مۋلتيمودالدى حاب سانالادى. وسىعان بايلانىستى استانا اۋەجايى – ءبىز ءۇشىن وتە ماڭىزدى پۋنكت. ليۋكسەمبۋرگ كومپانياسى بىرلەسكەن وسى ءىرى جوبانى جۇزەگە اسىرا الاتىنىنا ريزاشىلىعىمدى بىلدىرەمىن. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترىمەن ءوزارا تۇسىنىستىك تۋرالى ەكىنشى مەموراندۋمعا قول قويدىق», دەدى مينيستر.
سونىمەن قاتار قاسىم-جومارت توقاەۆ پەن جان اسسەلبورن حالىقارالىق جانە وڭىرلىك كۇن تارتىبىندەگى وزەكتى ماسەلەلەر جونىندە پىكىر الماستى.
