تۇركىستان وبلىسىنىڭ سانيتارلىق-ەپيدەميولوگيالىق باقىلاۋ دەپارتامەنتى حابارلاعانداي, كەنتاۋ قالاسىنداعى «رىزىق-راۋانى» ءدامحاناسىندا كەلۋشىلەردىڭ تاماقتان ۋلانعانى تۋرالى اقپارات 27 ماۋسىمدا تۇسە باستاعان.
دارىگەرلەردىڭ ايتۋىنشا, ۋلانعاندار ءدامحانادا سۋشي, پيتستسا جانە تاۋىق ەتىن جەگەن.
«سودان بەرى اۋرۋحاناعا جاتقىزۋ سانى ساعات سايىن ارتىپ كەلەدى. بۇگىنگى جاعداي بويىنشا 92 ادام زارداپ شەكتى. ونىڭ ىشىندە 14 جاسقا دەيىنگى 36 بالا مەن 47 ەرەسەك ادام بار», دەپ حابارلادى دەپارتامەنت وكىلدەرى.
كەنتاۋ قالالىق پوليتسيا ءبولىمى سوتقا دەيىنگى تەرگەۋ ساتىسىندا قىلمىستىق ءىس قوزعاعانىن ايتا كەتۋ كەرەك.
تەرگەۋ بارىسىندا اتالعان نىساننىڭ 46 ورىندىق تاماقتانۋ ورنى رەتىندە اشىلعانى انىقتالدى. سونداي-اق دەنساۋلىق ساقتاۋ مينيسترلىگىنىڭ بۇيرىعىنا سايكەس, 2023 جىلدىڭ ءساۋىر ايىندا كەنتاۋ قالالىق دەپارتامەنتىنە قىزمەتتىڭ باستالۋى تۋرالى حابارلاما جىبەرىلگەن ەدى.
«تەرگەۋ بارىسىندا بىرقاتار كەمشىلىكتەر انىقتالدى. ماسەلەن, كاسىپورىندا وندىرىستىك باقىلاۋ باعدارلاماسى جوق. كاسىپورىن قىزمەتكەرلەرى, ياعني اسپازدار مەن داياشىلار تولىق الدىن الا پروفيلاكتيكالىق مەديتسينالىق تەكسەرۋدەن وتپەگەن. 20 قىزمەتكەردىڭ 12-سىندە عانا مەديتسينالىق كىتاپ بار. شيكىزات پەن ءونىمنىڭ قاۋىپسىزدىگىن كۋالاندىراتىن قۇجاتتاردىڭ تولىق ءتىزىمى دە جوق. ونىمدەردى ساقتاۋدا كوممەرتسيالىق كورشىلەستىك جاعدايلارى ساقتالماعان, ياعني ەت ونىمدەرى, قۇس ونىمدەرى, ءسۇت ونىمدەرى, كوكونىستەر مەن جەمىستەردىڭ بارلىعى ءبىر توڭازىتقىشتا ساقتالعان. قىزمەتكەرلەردىڭ جەكە جانە ارنايى كيىمدەرىن ساقتايتىن ورىن جوق. جۇمىرتقانى ساقتاۋعا جانە جۋعا ارنالعان ارنايى كونتەينەر جوق. سونداي-اق تەكسەرۋ بارىسىندا پايدالانۋ مەرزىمى بۇزىلعان ونىمدەر انىقتالدى. قازىرگى تاڭدا زەرتحانالىق زەرتتەۋگە الىنعان سىنامالار جۇرگىزىلىپ جاتىر», دەپ قوستى ۆەدومستۆو ماماندارى.
دەپارتامەنت وكىلدەرىنىڭ ايتۋىنشا, اتالعان تاماقتانۋ ورنىندا جاپپاي ۋلانۋ وقيعاسى وسىمەن ءۇشىنشى رەت تىركەلىپ وتىر.
