كاسىبي مەرەكە قارساڭىندا ۇيىمداستىرىلعان سالتاناتتى شاراعا پرەزيدەنت اكىمشىلىگىنىڭ وكىلدەرى, اقپارات جانە قوعامدىق دامۋ ءمينيسترى, باق باسشىلارى مەن «دارا» پرەزيدەنتتىك باستامالار قورى مەن «حالىق» قايىرىمدىلىق قورىنىڭ وكىلدەرى, سونداي-اق باق قىزمەتكەرلەرى قاتىستى.
«جۋرناليستەر كۇنى تاماشا ءبىر تارتۋمەن باستالىپ جاتىر. ەڭ اۋەلى سىزدەردى كاسىبي مەرەكەلەرىڭىزبەن, باسپانالى بولۋلارىڭىزبەن شىن جۇرەكتەن قۇتتىقتايمىن. مەملەكەت باسشىسى, مينيسترلىكتىڭ اتىنان ۇلكەن العىس بىلدىرەمىن. مىرجاقىپ دۋلات ۇلى اتامىزدىڭ جاقسى ءبىر ءسوزى بار «كىمنىڭ ءباسپاسوزى مىقتى بولسا, سول ەل مىقتى» دەگەن, قازىرگى زاماننىڭ تىلىمەن ايتقاندا, كىمنىڭ ءجۋرناليسى مىقتى بولسا, سول وزار. ەندى قۇدايى كورشى بولىڭىزدار!», دەدى اقپارات جانە قوعامدىق دامۋ ءمينيسترى دارحان قىدىرالى.
اتالمىش تۇرعىن ءۇيدىڭ قۇرىلىسىنا «دارا» پرەزيدەنتتىك باستامالار قورى مەن «حالىق» قايىرىمدىلىق قورى اتسالىسقان.
«الەۋمەتتىك ماڭىزى بار تاقىرىپتاردى ءارى قوعام الدىندا تۇرعان وتكىر ماسەلەلەردى كوتەرىپ, العاشقى بولىپ دابىل قاعاتىن دا, ونىڭ وڭ شەشىمىن تابۋعا ىقپال ەتەتىن دە – باق وكىلدەرى. سىزدەردىڭ بۇگىنگى قۋانىشتارىڭىزعا ورتاقپىز, بۇل ءبىزدىڭ دە قۋانىشىمىز. وقىرمان مەن كورەرمەنگە جاۋاپكەرشىلىكپەن قارايتىن جۋرناليستەر قاشاندا قۇرمەت پەن قولداۋعا لايىقتى. سىزدەردى كاسىبي مەرەكەلەرىڭىزبەن شىن جۇرەكتەن قۇتتىقتايمىن!», دەدى «حالىق» قورىنىڭ باسقارۋشى ديرەكتورى ناريمان ابىلشايىقوۆ.
باسپاناعا يە بولعان باق وكىلدەرى بۇل كاسىبي مەرەكە قارساڭىندا شىن مانىندە كۇتپەگەن توسىنسىي بولعانىن ايتىپ, ريزالىعىن ءبىلدىرىپ جاتىر. قۋانىشتى حاباردى جاقىن-جۋىعىنا سۇيىنشىلەگەن ارىپتەستەردىڭ قۋانىشىندا شەك بولمادى.
كاسىبي مەرەكە كۇنى قارساڭىندا «Egemen Qazaqstan» گازەتىنىڭ ءجۋرناليسى جولدىباي بازاروۆ تا بۇل قۋانىشتىڭ كۇتپەگەن توسىنسىي بولعانىن ايتادى.
«مەن ءۇشىن دە, وتباسىم ءۇشىن دە كۇتپەگەن توسىنسىي بولدى. استانادان پاتەر الساق دەگەن تىلەگىمىزدىڭ وسىلاي ىسكە اسقانى قانشالىقتى وراسان قۋانىش ەكەنى ايتپاسام دا تۇسىنىكتى. مەملەكەت باسشىسىنا, «دارا» جانە «حالىق» قايىرىمدىلىق قورلارىنا, اقپارات جانە قوعامدىق دامۋ مينيسترىنە, مەنى وسى تىزىمگە قوسقان ءوز ۇجىمىما زور العىسىمدى ايتامىن. وسىنىڭ ءبارى, اينالىپ كەلگەندە, ەلىمىزدىڭ تىنىشتىعى مەن اماندىعىنىڭ ارقاسىندا بولىپ جاتىر عوي. سوندىقتان, ەڭبەگىمىز جەمىستى بولسىن, تابىستى بولايىق. مەنىڭ اللا بەرگەن التى بالام بار, سوندىقتان دا ءبىز ءۇشىن بۇل وتە قوماقتى سىي», دەيدى ول قۋانىشىن جاسىرا الماي.
سول قۋانىشتى لەكتىڭ ىشىندە ۇلتتىق تەلەارنادا 35 جىل بويى قىزمەت ەتىپ كەلە جاتقان راحيما بالتاباەۆا دا بار.
«بۇگىنگى كۇن مەن ءۇشىن ەڭ باقىتتى كۇن دەسەم بولادى. ءوزىم ەكى بالانىڭ اناسىمىن. جانە بۇل مەنىڭ الىپ وتىرعان العاشقى پاتەرىم. مۇنداي باستاما كوتەرگەن پرەزيدەنتكە, سول يگى ىسكە قولداۋ تانىتقان قورعا جانە تەلەارنا باسشىلىعىنا زور العىسىمدى ايتقىم كەلەدى. وسىدان بىرەر كۇن بۇرىن كادر ءبولىمى بىزدەن ءبىر-ەكى قۇجات سۇراتقان ەدى, ونى ءبىز الدەبىر بايقاۋعا تاپسىرىپ جاتقان شىعارمىز دەپ جورامالدادىق. تاپ سول ساتتە وسىنداي ۇلكەن قۋانىشقا كەنەلەمىن, ماعان پاتەر بۇيىرادى دەپ ءتىپتى دە ويلاماپپىن. مىنە, قازىر عانا باسپانالى بولعانىمدى ءبىلىپ, شىنى كەرەك, مۇنداي ۇلكەن توسىنسىيعا جۇرەگىم جارىلارداي قۋانىپ تۇرمىن», دەپ اعىنان جارىلدى راحيما بالتاباەۆا.
ەكى بولمەلى پاتەردىڭ كىلتىن الىپ تۇرىپ, قۋانىشىن جاسىرا الماي, كوز جاسىنا ەرىك بەرگەن BAQ.KZ اقپارات اگەنتتىگىنىڭ باس رەداكتورى ءمولدىر اسقار ويىن تولقىپ جەتكىزدى: «بۇل مەن ءۇشىن ۇلكەن قۋانىش! مەن ەڭبەگىم پرەزيدەنت تاراپىنان ەلەنىپ, وسىنداي سىي-قۇرمەتكە يە بولامىن دەپ ەشقاشان ويلاعان ەمەسپىن. بۇل رەتتە, وسى يگىلىكتى شارانى ۇيىمداستىرۋشى «دارا» پرەزيدەنتتىك باستامالار قورى مەن «حالىق» قايىرىمدىلىق قورىنا ايتار العىسىم شەكسىز».
«كەرەمەت كوڭىل كۇيدەمىن. باسپانا دەگەن كوپتەگەن زامانداستارىمىزدىڭ پروبلەماسى عوي. العاشقى جارناسىن جينايسىڭ, ءارى تارتاسىڭ, بەرى تارتاسىڭ – ءبارىبىر جەتكىزە المايسىڭ. ال بۇگىن كۇتپەگەن جەردەن پاتەر كىلتىن تاپسىرعاندا, قانداي كۇيدە بولعانىمدى سوزبەن ايتىپ جەتكىزە المايمىن. بارلىعىنا زور العىس. اسىرەسە «دارا» جانە «حالىق» قورلارىنا مىڭ مارتە راحمەت. بۇل – ەندى سىيلىقتىڭ تورەسى بولدى!», دەپ قۋانىشىمەن بولىسكەن Jibek joly تەلەارناسىنىڭ تەلەجۇرگىزۋشىسى انۋار قاربوزوۆ ءسۇيىنشى حاباردى الدىمەن اناسىنا جەتكىزىپ جاتتى.
«دارا» پرەزيدەنتتىك باستامالار قورىنىڭ ديرەكتورى اسەل شىلدەباەۆا اقپارات سالاسىنىڭ قىزمەتكەرلەرىن مەرەكەلەرىمەن قۇتتىقتاپ: «بۇگىن 65 وتباسى ۇلكەن قۋانىشقا كەنەلدى. باسپانالارىڭىز قۇتتى بولسىن! ارقاشان ارماندارىڭىز ورىندالا بەرسىن!», دەگەن اق تىلەگىن ايتتى.
ەندەشە, قۇتتى قونىسىنا كوشەتىن باقىتتى ارىپتەستەردى قۋانىشتارىمەن قۇتتىقتاي وتىرىپ, يگىلىكتى ءىستىڭ باسىنداعى ازاماتتاردىڭ قادامىنا ساتتىلىك تىلەيىك.
