وتكەن اپتادا ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ قىزمەتكەرلەرى زاڭسىز اينالىمنان 1 940 كەلىدەن استام ەسىرتكىنى تاركىلەدى. ماسەلەن, اقمولا وبلىسىندا اۋماقتىق پوليتسيا دەپارتامەنتىمەن بىرلەسىپ, استانا, كوكشەتاۋ جانە قاراعاندىدا كاننابيس توبىنىڭ ەسىرتكىلەرىن ساتۋمەن اينالىسقان ۇيىمداسقان قىلمىستىق توپتىڭ قىزمەتى توقتاتىلدى. توپ 11 ادامنان تۇرعان, ولاردىڭ اراسىندا ءبىر كامەلەتكە تولماعان بالا دا بار.
ال قىزىلوردا وبلىسىنىڭ شيەلى اۋدانىندا اپيىن كوكنارىن ءوسىرۋدى ۇيىمداستىرعان جەرگىلىكتى تۇرعىن ۇستالدى. ءبىر گەكتار جەرگە قىلمىسكەر 2 377 كوكنار بۇتاسىن وتىرعىزعان. قۇرامىندا ەسىرتكى بار وسىمدىكتەردىڭ جالپى سالماعى شامامەن 300 كيلونى قۇرادى. ءتىنتۋ بارىسىندا پلانتاتسيادا ءۇش كەلى كەپتىرىلگەن ماريحۋانا تاركىلەندى.
سونداي-اق جامبىل وبلىسىندا دا قاراسورا ءوسىرۋ فاكتىسى انىقتالدى. پوليتسەيلەر اۋدانى 1 گا جەرگە قاراسورا ءوسىرۋ فاكتىسىنىڭ جولىن كەستى. قۇرامىندا ءبىر جارىم توننادان استام ەسىرتكى بار وسىمدىك زاڭسىز اينالىمعا جىبەرىلمەدى.
تارازدا ءبىزدىڭ ەلدە ۋاقىتشا تۇراتىن شەتەلدىك ازاماتتىڭ قاراسورا ءوسىرۋ ارەكەتىنىڭ جولى كەسىلدى. ونىڭ پايدالانۋعا دايىن ءتورت قاراسورا بۇتاسى مەن 100 گرامنان استام ماريحۋانا تاركىلەندى.
«قاراسورا» ارنايى وپەراتسياسى باستالعالى وتكەن ايدا پوليتسەيلەر 237 قىلمىستى انىقتادى, ونىڭ ىشىندە 88 وتكىزۋ فاكتىسى, 35 اسا ءىرى مولشەردە ەسىرتكىنى زاڭسىز ساقتاۋ فاكتىسى, قۇرامىندا ەسىرتكى بار وسىمدىكتەردى ءوسىرۋدىڭ 88 فاكتىسى تىركەلدى. بەس ەسىرتكى زەرتحاناسى جويىلدى. زاڭسىز اينالىمنان ءۇش توننادان استام ەسىرتكى تاركىلەنسە, ونىڭ ىشىندە ەكى توننادان استام ماريحۋانا, 300 كگ اپيىن كوكنارى, 29 كگ گاشيش, 4 كگ سينتەتيكا جانە شامامەن 1 كگ گەروين بار.
