ماسەلەن, شىبىننىڭ دەرناسىلى كەز كەلگەن قالدىقتىڭ 99 پايىزىن وڭدەيدى. دەرناسىل – جاندىكتىڭ شىبىنعا اينالعانعا دەيىنگى ءتۇرى. شامامەن ءۇش-ءتورت مىڭ قۇرت 300-400 كيلو قالدىقتى وڭدەي الادى. 45 كۇننىڭ ىشىندە جاندىك جۇمىرتقادان شىبىنعا اينالادى. وسى ۋاقىتتىڭ العاشقى ەكى اپتاسىندا دەرناسىل تاعام قالدىعى سالىنعان «باسسەينگە» سالىنادى. ولار سول «قوقىسپەن» قورەكتەنىپ, ءوسىپ شىعادى. قازىر قازاق ۇلتتىق ۋنيۆەرسيتەتىنەن شىعاتىن تاعام قالدىعىنىڭ ءبارى وسى تەحنولوگيا ارقىلى وڭدەلەدى.
ودان كەيىن ول قارا ءتۇستى قۇرتقا اينالىپ, شىبىن بولۋعا دايىندالادى. ال ءۇش اپتا وتكەن سوڭ شىبىنعا اينالادى. ەكى اپتادا شىبىن جۇمىرتقالايدى دا, تىرشىلىگىن توقتاتادى. وسى جۇيە ارقىلى تسيكل جالعاسادى. «شىبىن دەرناسىلى وڭدەپ شىققان قالدىقتىڭ ءارى قاراي پايدالانۋعا ابدەن بولادى. مىسالى, وڭدەلگەن قالدىقتان تابيعي تازا تىڭايتقىش وندىرىلەدى. مۇنى «زووگۋمۋس» دەپ اتايدى. بۇل زيانكەستەرمەن كۇرەسۋگە وتە ءتيىمدى», دەيدى سەرىكحان ايدارحان ۇلى.
وعان قوسا عالىم قۇرتتىڭ ءبىر بولىگىن ارنايى اپپاراتقا سالىپ كەپتىرىپ, دارۋمەنگە تولى ءونىم جاسايدى. بۇل ءونىمدى كوبىنە قۇس, بالىق شارۋاشىلىعىمەن اينالىساتىندار جەم رەتىندە ساتىپ الادى. شىبىننىڭ دەرناسىلىن ۇنتاقتاپ ارالاستىرىپ, ءىرى قارا مالعا ازىق رەتىندە دە بەرەدى. بۇل قورەك مالدىڭ دەرتكە شالدىعۋىن ازايتىپ, ءسۇتىن ارتتىرادى. عالىم شىبىننىڭ دەرناسىلىمەن قورەكتەنگەن مالدىڭ ەتى قۇنارلى بولاتىنىن ايتىپ وتىر. ويتكەنى قۇرتتاردىڭ دەنەسىندە بارلىق امينقىشقىل, سونىڭ ىشىندە ليزين جانە مەتيونين سياقتى بيولوگيالىق قۇندى زاتتار بار.
