فورۋم جۇمىسىنا اۋعان سوعىسى ارداگەرلەرى ۇيىمدارىنىڭ «Qazaqstan ardagerleri» قاۋىمداستىعىنىڭ توراعاسى باقىتبەك سماعۇل, جازۋشى, كەڭەس وداعىنىڭ باتىرى باۋىرجان مومىش ۇلىنىڭ كەلىنى زەينەپ احمەتوۆا, جازۋشى, ابايتانۋشى ومار جالەل, اقىن, «دارىن» مەملەكەتتىك جاستار سىيلىعىنىڭ لاۋرەاتى مارالتاي رايىمبەك ۇلى سەكىلدى قوعام جانە مادەنيەت قايراتكەرلەرى قاتىسىپ, جاس مەملەكەتتىك قىزمەتشىلەرگە ەلگە ادال قىزمەت ەتۋ, ءبىلىم مەن عىلىمعا ۇمتىلۋ, ۇلتتىق ءداستۇر مەن سالتتى قاستەرلەۋ تۇرعىسىندا ماعىنالى دا ساليقالى اڭگىمە جۇرگىزدى.
فورۋم اياسىندا بەلسەندى جاستار ءىس-شارانىڭ قوناقتارىنا وزدەرىن تولعاندىرعان ساۋالدارىن قويىپ, تيىسىنشە جاۋاپ الدى. باقىتبەك سماعۇل وتانعا قىزمەت ەتۋ جولىنداعى ەلدىك, ەرلىك جايىندا تاعىلىمدى اڭگىمە وربىتسە, مارالتاي رايىمبەك ۇلى ۇلتتىق قۇندىلىقتار, ونەر مەن ادەبيەتتىڭ قاسيەتى تۋرالى تەبىرەندى. زەينەپ احمەتوۆا قازاقتىڭ وتباسى ءداستۇرى, ادامنىڭ مەيىرىمى مەن قايىرىمدىلىعى جايىندا ويىن ورتاعا سالىپ, باۋىرجان مومىش ۇلى اتاسىنىڭ ۇلتتىق تاربيەدەگى قادىر-قاسيەتىن ونەگە ەتىپ جەتكىزدى. ومار جالەل دە قازىرگى قوعامداعى ورىن الىپ جاتقان كەلەڭسىز جاعدايلاردان مىسالدار كەلتىرىپ, جاستاردى ۇلتتىق قۇندىلىقتارعا قاراي بۇرىلۋعا شاقىردى.
جيىن اياسىندا بىرنەشە بەلسەندى جاس «Gazaqstan ardagerleri» قاۋىمداستىعىنىڭ باۋىرجان مومىش ۇلى اتىنداعى «باتىر شاپاعاتى» توسبەلگىسىمەن ماراپاتتالدى. ولاردىڭ قاتارىندا جەكە برەند قالىپتاستىرۋشى مامان, «ەكىنشى بولما», «بىزگە ايتىلماعان قۇپيا» كىتاپتارىنىڭ رەداكتورى, «سەن جالعىز ەمەسسىڭ», «جان ۇياسى» كىتاپتارىنىڭ جوبا جەتەكشىسى ايىم جەكەنوۆا, جاپونيا ەلىندەگى قازاق مادەني ورتالىعىنىڭ ديرەكتورى جادىرا سەمباي, ۇلتتىق زاماناۋي شاپاندار تىگىپ, قازاق ۇلتتىق كيىمدەرىن زاماناۋي ستيلدە ناسيحاتتاپ جۇرگەن «Alkum» برەندىنىڭ نەگىزىن قالاۋشى تەمىرلان ايدار, جاس جازۋشى جۇلدىز قايراتقىزى, كۇيشى, ۇلىبريتانياداعى حالىقارالىق سايىستىڭ جەڭىمپازى مارتەبە باۋىرجانقىزى, دجيۋ-دجيتسۋدان الەم چەمپيونى مۇحاممەد بولسابەك بولدى.
سونىمەن قاتار اعا بۋىن وكىلدەرىنىڭ اقىل-پاراساتىن تىڭداپ, ورتاق ماسەلەلەردى تالقىعا سالىپ, ءوز سۇراقتارىن قويىپ, جىلى لەبىزدەرىن بىلدىرگەن فورۋم قاتىسۋشىلارى الماتى وبلىستىق ءماسليحاتىنىڭ دەپۋتاتى, «Sagadat Batyr-QTT» سپورت كلۋبىنىڭ باس جاتتىقتىرۋشىسى نۇرسۇلتان ورىنباساروۆ, تانىمال ديزاينەر, ستيليست, ديماش قۇدايبەرگەن, ميراس جۇگىنىسوۆ, «Ninety One» توبىنىڭ ساحنالىق وبرازدارىنىڭ اۆتورى اقبوتا باقىتجان, وراتور-موتيۆاتور اراي سەرىكقىزى, ماركەتينگ سالاسىنىڭ ساراپشىسى مارجان ابۋتاليپ ارنايى العىسحاتتارمەن ماراپپاتالدى.
جاستار مەن اعا بۋىن فورۋمنان كەيىن جامبىل, باۋىرجان اتالارىمىزدىڭ رۋحىنا قۇران باعىشتاپ, ەسكەرتكىشتەرگە گۇل شوقتارىن قويدى. ەڭ باستىسى, بۇل فورۋم جاستارعا جىگەر بەرگەنىن تۇيسىندىك.
عالىم قوجابەكوۆ,
جۋرناليست
