ءشامشاديننىڭ شوقتىعى بيىك
اسا جەڭىل سالماقتا بەلدەسكەن 26 جاستاعى ماعجان شامشادين استاناداعى جارقىن جەڭىسىنەن كەيىن سەگىز ساتىعا جوعارىلاپ, قازىرگى كەزدە 13-ورىندى يەلەندى. ونىڭ قورجىنىندا 3238 ۇپاي بار. ەگەر دە سىر بويىنىڭ سايىپقىرانى تاعى ءبىر تۋرنيردە ەلەۋلى تابىسقا قول جەتكىزسە, وندا توپ-10-دىقتىڭ قاتارىنا ەنەتىنى انىق. ازىرگە بۇل – قازاقستاننىڭ ەرلەر قۇراما كومانداسى مۇشەلەرى اراسىنداعى ەڭ ۇزدىك كورسەتكىش.
ءدال وسى سالماق دارەجەسىندە كۇش سىناسىپ جۇرگەن ەلدوس سمەتوۆ (2158 ۇپاي) 23-ورىنعا تابان تىرەسە, نۇرقانات سەرىكباەۆ (1842) 25-ساتىعا جايعاستى. ەلوردا تورىندە وتكەن جارىسقا ەلدوس قاتىسقان جوق. ال نۇرقانات تۇساۋكەسەر كەزدەسۋىندە جەڭىلىستىڭ كەرمەك ءدامىن تاتتى. قازىرگى كەزدە وسى ءۇش بالۋاننىڭ قارقىنى جاقسى. وسىنداي مىقتىلاردىڭ ءبىر سالماقتا ءوزارا تارتىسقا ءتۇسۋى باسەكەلەستىكتى ارتتىرادى. ال باسەكەلەستىك بار جەردە ناتيجەنىڭ دە بولۋى زاڭدى. بىراق وليمپيا ويىندارىنىڭ ءجونى بولەك. بۇل جەردە ءبىر سالماق دارەجەسىندە ءبىر عانا بالۋاننىڭ باق سىنايتىنى بەلگىلى. ولاي بولسا, پاريج وليمپياداسىنا قاتىسۋدى ماقسات تۇتقان اپايتوستەر الداعى رەيتينگتىك جارىستاردا بارىنشا تابىستى ونەر كورسەتۋگە ءتيىس. وسى ۇشتىكتىڭ اراسىنان كىمنىڭ ايدارىنان جەل ەسەتىنىن ازىرگە ەشكىم ءدوپ باسىپ ايتا المايدى. سونداي-اق باۋىرجان نارباەۆ (1277 ۇپاي) پەن شەرزود داۆلاتوۆتى (917 ۇپاي) دا تىزىمنەن سىزىپ تاستاۋعا بولمايدى. IJF رەيتينگىندە باۋىرجان – 35, شەرزود 44-ورىندى ەنشىلەگەن.
66 كيلو سالماقتا كۇرەسەتىن عۇسمان قىرعىزباەۆتىڭ استانادا كۇمىس مەدالدى يەلەنگەنى ءمالىم. سونىڭ ارقاسىندا ول ءتورت ساتىعا جوعارىلاپ, بۇل كۇندەرى 19-ورىندى يەمدەنۋدە. عۇسماننىڭ ەنشىسىندە 2615 ۇپاي بار. 73 كيلو سالماقتا سىنعا تۇسكەن اسقار نارقۇلوۆ (814 ۇپاي) «Qazaqstan Barysy Grand Slam 2023» تۋرنيرىندەگى تابىسىنان كەيىن بىردەن 49 قارسىلاسىن ارتقا تاستاپ, بۇگىنگى تاڭدا 57-ورىنعا تۇراقتادى. بۇل – وتە تاماشا كورسەتكىش. دەسەك تە نارقۇلوۆقا دانيار شامشاەۆ پەن جانساي سماعۇلوۆقا جەتۋ ءۇشىن ءالى كوپ تەر توگۋ كەرەك. ويتكەنى ەلىشىلىك جارىستارداعى باستى قارسىلاستارى وعان قاراعاندا الدەقايدا جوعارى تۇر. جاس دارىن دانيار 15 (2816 ۇپاي) جانە ساقا سپورتشى جانساي (1754 ۇپاي) 25-ورىنداردى يەلەنۋدە.
81 كيلو سالماقتاعى ابىلايحان جۇبانازار استانادا العاشقى اينالىمنان اسا المادى. سول سەبەپتى جاعدايىن جاقسارتۋعا ەش مۇمكىندىگى بولمادى. قازىر ول 19-ورىندى (1905 ۇپاي) ەنشىلەپ وتىر. 90 كيلو سالماق دارەجەسىندەگى جاعدايىمىز تىپتەن مۇشكىل. ەڭ ۇزدىك ناتيجە ديدار حامزاعا تيەسىلى. ازيا ويىندارىنىڭ جەڭىمپازى 26-ورىندى يەلەنۋدە. 100 كيلو سالماقتا ەلىمىزدىڭ بىردە-ءبىر دزيۋدوشىسى نۇرلىحان شارحاندى قۋىپ جەتە الار ەمەس. ول 22-ورىنعا (2340) تابان تىرەدى. يسلام بوزباەۆ 43 (990 ۇپاي) پەن بەكارىس سادۋاقاس (803 ۇپاي) 49-ساتىعا جايعاستى.
الىپتارمەن ايقاسىپ جۇرگەن عالىمجان قىرىقباي مەن ءادىل ورازباەۆ وتكەن اپتانىڭ باسىندا الەمدىك رەيتينگتە قاتار تۇرعان ەدى. ەلوردا تورىندە عالىمجان قولا مەدالدى موينىندا جارقىراتتى. سونىڭ ارقاسىندا ول سەگىز ساتىعا جوعارىلاپ, 31-ورىندى (1590 ۇپاي) ەنشىلەدى. ءادىل ءا دەگەندە-اق ۇتىلىپ, 42-ورىندى (990 ۇپاي) قاناعات تۇتتى.
كوشباسشىلار جايىندا ايتار بولساق, تاياۋدا عانا گرۋزيانىڭ ءتورت دزيۋدوشىسى IJF رەيتينگىندە كوش باستاعان ەدى. قازىر سولاردىڭ ۇشەۋى ءوز ورىندارىن ساقتاپ قالدى. ولار – تاتو گريگالاشۆيلي (81 كيلو), لۋكا مايسۋرادزە (90 كيلو) جانە يليا سۋلامانيدزە (100 كيلو). ال لاشا شاۆداتۋاشۆيلي (73 كيلو) ازەربايجاندىق حيدايات گەيداروۆ پەن موڭعوليالىق تسەند-وچيرىن تسوگتبااتاردى العا جىبەرىپ, ءۇشىنشى ورىندى قاناعات تۇتتى. قالعان سالماق دارەجەلەرىندە تايپەيلىك يان يۋنۆەي (60 كيلو), مولدوۆالىق دەنيس ۆيەرۋ (66 كيلو) جانە تاجىكستاندىق تەمۋر راحيموۆ (+100 كيلو) جەكە-دارا كوش باستاپ تۇر.
توپ-10 دزيۋدوشىنىڭ ساناتىنا گرۋزيا مەن جاپونيانىڭ – 9, ازەربايجاننىڭ – 7, وزبەكستاننىڭ – 5, موڭعوليا, فرانتسيا, كانادانىڭ – 4, وڭتۇستىك كورەيا مەن نيدەرلاندتىڭ – 3, بەلگيا, يزرايل, يتاليا, برازيليا, كۋبانىڭ – 2, يسپانيا, تايپەي, مولدوۆا, ۋكراينا, شۆەيتساريا, اۋستريا, تۇركيا, ماجارستان, رەسەي, ءباا, چەحيا جانە تاجىكستاننىڭ 1 وكىلى ەندى. وكىنىشكە قاراي, ۇزدىكتەر ساناتىندا قازاقستاننىڭ بىردە-ءبىر بالۋانى جوق.
اقەركەنىڭ اياقالىسى ۇنادى
ايەلدەر اراسىنداعى جارىستاردا اۋىز تولتىرىپ ايتارلىقتاي تابىستارعا قول جەتكىزىپ جۇرگەن ءابيبا ابۋجاقىنوۆا جاراقاتىنا بايلانىستى استاناداعى «Qazaqstan Barysy Grand Slam 2023» تۋرنيرىنە قاتىسپادى. سوعان قاراماستان, وتاندىق ديۋدوشىلار اراسىندا ەڭ ۇزدىك كورسەتكىش ءدال سول سپورتشىعا تيەسىلى. ابۋجاقىنوۆا IJF رەيتينگىندەگى ءوزىنىڭ التىنشى ورنىن ساقتاپ قالدى. جانە دە جاراقاتىنان تولىقتاي ايىققاننان كەيىن ءابيبا بۇل ناتيجەسىن جاقسارتامىن دەپ قۇلشىنىپ وتىر. بيىلعى جىلعى ءابيبانىڭ باستى ماقساتى – قىركۇيەك ايىندا قىتايدا الاۋى تۇتاناتىن جازعى ازيا ويىندارىندا اتوي سالۋ.
ەلوردا تورىندە ۇيىمداستىرىلعان تۋرنيردە +78 كيلو سالماقتا سىنعا ءتۇسىپ, قولا مەدالدى موينىندا جارقىراتقان اقەركە رامازانوۆا بىردەن 21-ساتىعا جوعارىلاپ, بۇل كۇندەرى 33-ورىندى يەلەندى. بۇل – ەلەۋلى تابىس. دەسەك تە اقەركە ءالى دە كاميلا بەرلىقاشقا جەتە الماي كەلەدى. تانىمال دزيۋدوشى 18-ورىندى ەنشىلەگەن. بەرلىقاش بىلتىر ۇلانباتىردا جانە بيىل باكۋدە ۇزدىك ۇشتىكتى تۇيىندەدى. تبيليسي, المادا جانە تاشكەنتتە بەسىنشى ورىنعا تابان تىرەدى. بۇل – رامازانوۆانىڭ «ۇلكەن دۋلىعا» ساناتىنداعى تۋرنيرلەردەگى تىرناقالدى تابىسى. شىنى كەرەك, اسا اۋىر سالماقتا ەكى مىقتى بالۋاننىڭ ءبىر-بىرىمەن باسەكەلەس بولۋى ءبىزدى قاتتى قۋانتىپ وتىر. ونىڭ ۇستىنە ەكەۋى دە جاس سپورتشىلار. اتاپ ايتساق, كاميلا – 23, ال اقەركە – 22 جاستا. كەلەشەكتە بۇل بالۋانداردىڭ ءبىراز بيىك بەلەستەردى باعىندىراتىنى انىق.
توپ-50-ءدىڭ قاتارىنا ەنگەن وزگە جەرلەستەرىمىزدىڭ ناتيجەلەرى مىناداي: عاليا تىنباەۆا (48 كيلو) – 31-ورىن, ارۋنا جانكەلدينا (70 كيلو) – 36, نازگۇل ماراتوۆا (+78 كيلو) – 43 جانە سەۆارا نىشانباەۆا (57 كيلو) – 44-ورىن. وكىنىشكە قاراي, وزگە بۇرىمدىلارىمىز سەنىم ۇدەسىنەن شىعا الماي ءجۇر.
الەمدىك رەيتينگتە ءار مەملەكەتتىڭ ءبىر-ءبىر عانا وكىلى كوش باستاپ تۇر. ولار – فرانتسيالىق شيرين بۋكلي (48 كيلو), كوسوۆولىق ديستريا كراسنيچي (52 كيلو), كانادالىق كريستا دەگۋچي (57 كيلو), ۇلىبريتانيالىق ليۋسي رەنشالل (63 كيلو), جاپونيالىق ساكي نيزوە (70 كيلو), يتاليالىق ەليس بەللاندي (78 كيلو) جانە يزرايلدىك راز گەرشكو (+78 كيلو). ال توپ-10 دزيۋدوشىنىڭ تىزىمىنە فرانتسيانىڭ 11 وكىلى ەنىپ وتىر. جاپونيا قۇراماسى دا ولاردان قالىساتىن ەمەس. كۇنشىعىس ەلىنىڭ 9 وكىلى ۇزدىكتەر ساناتىندا. ودان كەيىنگى ەڭ ءتاۋىر كورسەتكىش مىنا كوماندالارعا تيەسىلى: يزرايل مەن گەرمانيا – 5, برازيليا – 4, يتاليا, كوسوۆو, نيدەرلاند, كانادا – 3, موڭعوليا, يسپانيا, پورتۋگاليا, ۇلىبريتانيا, وڭتۇستىك كورەيا, حورۆاتيا, قىتاي – 2, سەربيا, قازاقستان, وزبەكستان, ماجارستان, گرۋزيا, پولشا, اۋستراليا, اۋستريا, گرەكيا جانە تۇركيا – 1.
