اۆتوبۋسقا ارنالعان اۆتونەسيە

يندۋستريا جانە ينفرا­قۇرىلىمدىق دامۋ ءمينيسترى مارات قاراباەۆتىڭ ايتۋىنشا, وڭىرلەردەگى اۆتوبۋس پاركتەرى ابدەن توزعان. سوندىقتان قارا­جاتتى سولاي قاراي باعىتتاۋ تۋرالى شەشىم قابىلدانىپتى.

«بىرقاتار وڭىرلەردە, تالدى­قورعاندا, ورالدا بولدىق. جەر­گىلىكتى اتقارۋشى ورگان وكىلدەرى نەگىزىنەن اۆتوپاركتىڭ ەسكىرۋى ما­سەلەسىن كوتەرەدى. ەلىمىز بو­يىن­شا 10 525 اۆتوبۋس بولسا, سو­نىڭ 45 پايىزى – ەسكىرگەن كو­لىك­تەر. مىسالى, قوستانايدا ەس­كى­رۋ كولەمى 90 پايىزعا جەتسە, تال­دىقورعان مەن ورالدا – 70 پايىز. سوندىقتان قولدا بار قاراجاتتى مەيلىنشە ءتيىمدى پايدالانۋ كەرەك بولىپ تۇر. وسى­عان بايلانىستى قارجىنى قو­عامدىق كولىكتى نە­سيە­لەۋگە باعىتتاماقپىز. ەلىمىزدە قوعامدىق كولىكتى كۇن سايىن 9,3 ملن ادام پايدالانادى. بىزدەگى باستى باسىمدىق – سولاردىڭ قاجەتتىلىگىن قاناعاتتاندىرۋ», دەدى مينيستر.

باعدارلاما اياسىندا جەڭىل­دەتىلگەن اۆتونەسيە بەرۋدىڭ نەلىك­تەن توقتاتىلعانىن ۆيتسە-مينيستر ءىلياس وسپانوۆ تا ءتۇسىندىردى.

«بىزدە ەكى باعدارلاما بار. ونىڭ ءبىرىن – قازاقستان دامۋ بانكى, ەكىنشىسىن – ونەركاسىپتى دامىتۋ قورى دايىندايدى. ەندى ونەركاسىپتى دامىتۋ قورى ارقىلى جۇزەگە اسىرىلاتىن باعدارلاماعا وزگەرىس ەنەدى. ءبىزدىڭ الدىمىزدا قاراجاتتى ءتيىمدى پايدالانۋدىڭ جولىن تابۋ تۋرالى مىندەت تۇر­دى. اقشا بار, بىراق ول بارىنە جەت­پەيتىن ەدى. مىندەتىمىز – كۇن سايىن قوعامدىق كولىكتى پايدالاناتىن 9,2 ملن ادامدى ساپالى اۆتوبۋستارمەن قامتاماسىز ەتۋ. جەرگىلىكتى اتقارۋشى ورگان­دارمەن جينالىس وتكىزىپ, ۇسى­نىستاردى سارالادىق. قازىرگى ۋاقىتتا 2 مىڭ اۆتوبۋسقا ءوتىنىم بەردىك. سونىڭ تەڭ جارتىسى الما­تى اكىمدىگىنەن كەلدى», دەدى ءىلياس وسپانوۆ.

ونەركاسىپتى دامىتۋ قورىنىڭ حابارلاۋىنشا, ەلدە اۆتوبۋس سا­تىپ الۋعا ارنالعان نەسيە باع­دارلاماسى بۇرىننان بار. جۇمىس ىستەگەن بەس جىل ىشىندە 3,5 مىڭ­نان استام جاڭا اۆتوبۋس قو­سىل­عان. ەندى جەڭىلدەتىلگەن اۆتو­نەسيە باعدارلاماسىنان اۋىس­قان قوسىمشا قاراجات قوعام­دىق ترانسپورت ساتىپ الۋ جۇيەسىنە تىڭ سەرپىن بەرەدى.

«ەگەر جەڭىلدەتىلگەن اۆتونەسيە بەرۋ باعدارلاماسى بويىنشا اي سايىن 120 ادامدى ماشينا­مەن قامتاماسىز ەتۋگە بولاتىن بولسا, قاراجاتتى قايتا بولگەن جاعدايدا ءبىر ايدا 15 مىڭعا جۋىق جولاۋشى تاسىمالدايتىن 20 اۆتوبۋس ساتىپ الۋعا بولادى. جاڭا اۆتوبۋستار بەينەباقىلاۋ كامەرالارىمەن, بەينەجازبا جۇيەسى­مەن, كونديتسيونەرلەرمەن, مارشرۋت كورسەتكىشتەرىمەن, مۇگەدەكتەرگە ارنالعان مەحانيكالىق پاندۋس­تارمەن جابدىقتالعان جانە جولاۋشىلاردى قاۋىپسىز جانە جايلى تاسىمالداۋدىڭ بارلىق تالاپتارىنا لايىق جاسالعان. سونىمەن قاتار ساتىپ الىناتىن ەلەكتر اۆتوبۋستارى مەن سىعىمدالعان گازبەن جۇرەتىن اۆتوبۋستار ات­موس­فەراعا زياندى زاتتاردىڭ شى­عارىلماۋى ەسەبى­نەن قالالارداعى ەكولوگيالىق جاع­دايعا ءتيىمدى», دەلىنگەن قور­دىڭ رەسمي حابارلاماسىندا.

ونەركاسىپتى دامىتۋ قورى باس­­قارما توراعاسىنىڭ ورىنباسارى رينات عاپپاروۆتىڭ ايتۋىنشا, جاڭا قاراجاتتىڭ ءبولىنۋى ارقاسىندا جىلىنا 700 اۆتو­بۋس­تى جاڭارتۋ مۇمكىندىگى تۋادى.

قولدانىستاعى اۆتوبۋستاردى ليزينگتىك قارجىلاندىرۋ باع­دارلاماسىنىڭ شارتتارى: لي­زينگ­تىك قارجىلاندىرۋ مەرزىمى – 7 جىلعا دەيىن; ليزينگ بويىنشا باستاپقى جارنا – ليزينگ نىساناسى قۇنىنىڭ كەمىندە 15%-ى; جىلدىق سىياقى مولشەرلەمەسى –7%.

ەلىمىزدە جىلدىق 4 پايىز­­دىق جەڭىلدەتىلگەن اۆتونەسيە باع­­­دار­لاماسى 2022 جىلعى 16 مامىر­­دا باستالعان. الايدا باستالعا­لى نەسيەگە ءوتىنىم قابىلدايتىن پلاتفورما دۇرىس جۇمىس ىستەي العان جوق. 6 اقپاندا قاناتقاقتى جوبا ءوتىنىم قابىلداي باستادى, بىراق جاڭا پورتالدىڭ جۇمىس ىستەۋ ۇزاقتىعى 18 سەكۋندقا عانا سوزىلدى.