«سوڭعى جىلدارى ەلىمىزدە اۋقىمدى رەفورمالار جۇرگىزىلدى. جاڭا جوبالار جۇزەگە اسىرىلىپ جاتىر. بۇل جۇمىس تابىستى بولۋى ءۇشىن بۇكىل قوعام اتسالىسۋى كەرەك. مەملەكەت پەن قوعام اراسىنداعى سەنىمدى سەرىكتەستىك وتە ماڭىزدى. وسى ورايدا ۆولونتەرلەردىڭ ءرولى ەرەكشە. بۇگىندە ولار قوعامنىڭ ءتۇرلى سالالارىندا بەلسەندى قىزمەت ەتىپ جاتىر. قازاقستاندا 2020 جىل ەرىكتىلەر جىلى بولىپ جاريالاندى. قازىر ەلىمىزدە ۆولونتەرلىك ۇيىمداردىڭ سانى ءۇش ەسەگە, ياعني 680 ۇيىمعا ءوستى. ەرىكتىلەر سانى 200 مىڭعا جەتتى. بارلىق ايماقتاردا فرونت-وفيستەر اشىلدى, وندا مىڭداعان ەرىكتىلەر وقىتىلدى. Qazvolunteer.kz پلاتفورماسى قۇرىلدى», دەدى پرەزيدەنت.
سونداي-اق پرەزيدەنت بۇگىندە قازاقستاندا كەز كەلگەن ادام ەرىكتىلەر توبىنا مۇشە بولىپ, پايدالى ىستەرگە اتسالىسا الاتىنىن اتاپ ءوتتى.
«بۇل شىن مانىندە ۇلكەن مۇمكىندىك. سونداي-اق ەرىكتىلەرىمىز يوردانيا, كەنيا, تايلاند, تۇركيا ەلدەرىنە ارنايى بارىپ, تاجىريبە جيناقتادى. وسى ساتتە مەن قازاقستان ۆولونتەرلەرىنە قولداۋ كورسەتىپ جاتقان بۇۇ وكىلدەرىنە العىس ايتامىن. وتكەن جىلى ەلىمىزدە ورتالىق ازيا ۆولونتەرلەرىنىڭ ءبىرىنشى فورۋمى ءوتتى. ماڭىزدى شارالار الداعى ۋاقىتتا دا جالعاسىن تابادى. ويتكەنى ەرىكتىلەر قاتارىندا قوعامعا ادال قىزمەت ەتۋ ءبىر كۇندىك نەمەسە ۋاقىتشا جۇمىس ەمەس, بۇل ءاربىر ەرىكتى ءوز ەركىمەن تاڭدايتىن ومىرلىك ماقساتى. جالپى, ۆولونتەرلىك قىزمەت – ءپاتريوتيزمنىڭ جارقىن ۇلگىسى. بۇل ادامگەرشىلىك قۇندىلىقتاردى بارىنەن جوعارى قوياتىن ادامداردىڭ ءومىر سالتى. ەرىكتىلەر قوعامنىڭ دامۋىنا ۇلكەن ۇلەس قوسىپ جاتىر», دەپ قوستى قاسىم-جومارت توقاەۆ.
بۇعان دەيىن ەلوردادا ەرىكتىلەردىڭ حالىقارالىق فورۋمى باستالعانى حابارلانعان ەدى. وعان 34 ەلدەن 140-تان استام ەرىكتىلەر قاتىسىپ جاتىر. 50 شەتەلدىك سپيكەر كەلدى. قازاقستاننىڭ تۇكپىر-تۇكپىرىنەن ەرىكتىلەر دە جينالدى. بارلىعى 400-دەن استام قاتىسۋشى بولدى.
