ءىس-شاراعا اقپارات جانە قوعامدىق دامۋ مينيسترلىگىنىڭ وكىلدەرى, جۋرناليستيكا سالاسىنىڭ ارداگەرلەرى, گازەت, تەلەارنا مەن اقپاراتتىق اگەنتتىكتەردىڭ باسشىلارى, قوعامدىق بىرلەستىكتەردىڭ وكىلدەرى قاتىستى.
اسحات ايماعامبەتوۆ باسقوسۋدىڭ «ماسس-مەديا تۋرالى» زاڭ جوباسىنىڭ جاڭا تۇجىرىمدامالىق نەگىزدەرىن تانىستىرۋعا ارنالعانىن ايتتى. دەپۋتاتتار الدىندا بايانداما جاساعان اقپارات جانە قوعامدىق دامۋ ۆيتسە-ءمينيسترى قانات ىسقاقوۆ زاڭ جوباسىن ازىرلەۋ كەزىندە مينيسترلىك ەۋروپا ەلدەرىنىڭ وزىق تاجىريبەسى, بۇۇ مەن ەقىۇ ستراتەگيالىق قۇجاتتارى جان-جاقتى زەرتتەلگەنىن ايتتى.
«زاڭ جوباسى ءسوز بوستاندىعى قۇقىعىن نىعايتۋعا جانە قامتاماسىز ەتۋگە باعىتتالعان جاڭا قاعيداتتار مەن مەملەكەتتىك كەپىلدىكتەرگە نەگىزدەلگەن. جوبا جاڭالىقتارى بىرنەشە تاقىرىپتىق بلوك بويىنشا قالىپتاستىرىلعان. بىرىنشىدەن, جۋرناليست مارتەبەسىن كوتەرۋ. ەكىنشىدەن, مەملەكەتتىك اقپاراتتىق ساياساتتى قارجىلاندىرۋ تەتىكتەرىن رەفورمالاۋ. ۇشىنشىدەن, تەلەراديو حابارلارىن تاراتۋدى دامىتۋ», دەدى ق.ىسقاقوۆ.
سونداي-اق ۆيتسە-مينيستر جۋرناليستەرگە ارنالعان ءباسپاسوز كارتاسىن ەنگىزۋدى ۇسىندى. ونىڭ ايتۋىنشا, ءباسپاسوز كارتاسى جۋرناليستەردى اككرەديتتەۋ ۇدەرىسىن جەڭىلدەتۋگە ىقپال ەتىپ, اقپارات الۋىنا جانە تاراتۋىنا ەشقانداي كەدەرگى كەلتىرمەيدى. كەرىسىنشە, كارتا باق وكىلدەرىنىڭ جۇمىسىن ىنتالاندىرىپ, وڭتايلاندىرۋعا باعىتتالعان.
وتىرىستا زاڭ جوباسى بويىنشا قوعام قايراتكەرى, جۋرناليست سەرىك سارىباەۆ, «Media Net» حالىقارالىق جۋرناليستيكا ورتالىعى ديرەكتورىنىڭ ورىنباسارى دۋمان سماقوۆ, ء«ادىل ءسوز» قوعامدىق قورىنىڭ وكىلى قارلىعاش جامانقۇلوۆا, «سىرىم ەلى» ساياسي گازەتىنىڭ رەداكتورى باۋىرجان شيمەردەن ۇلى ءسوز سويلەپ, ءوز ۇسىنىستارىن ايتتى.
جيىن بارىسىندا ءماجىلىس دەپۋتاتى ەرمۇرات باپي, امانجول التاەۆ, جۇلدىز سۇلەيمەنوۆا, اناس باققوجاەۆ, تاڭساۋلە سەرىكوۆ, جارقىنبەك امانتاي ۇلى زاڭ جوباسىن ازىرلەۋشىلەرگە سۇراق قويىپ, پىكىرلەرىن ورتاعا سالدى. ءوز كەزەگىندە دەپۋتات ەلنۇر بەيسەنباەۆ باق وكىلدەرىنە مارتەبە بەرىپ, باسپانا ماسەلەسىن شەشۋ مۇمكىندىكتەرىن قاراستىرۋدى ۇسىندى.
«قازىرگى كۇننەن باستاپ وتباسى بانك, سونىمەن قاتار ەكىنشى دەڭگەيلى بانكتەرمەن تىكەلەي كەلىسىسسوزدەر جۇرگىزۋ قاجەت. قالاي جانە قانداي باعىتتا ەنگىزەمىز؟ ءۇيدى قانشا پايىزبەن الۋ مۇمكىندىگىنە يە بولادى؟ ويتكەنى جۋرناليستەردى كاتەگوريا رەتىندە تەك 2019 جىلى قابىلدانعان «الماتى جاستارى» سياقتى باعدارلامادا پىسىقتاعان بولاتىنبىز. قازىر بارلىق الەۋمەتتىك جەلىدە قاتىسىپ وتىرعان جۋرناليستەر ء«بىر كۇندە ءبىزدى كاتەگورياعا ەنگىزەدى» دەپ ويلاماۋى قاجەت. ويتكەنى ءاربىر ماماندىقتى كاتەگورياعا قوسۋ مۇمكىن ەمەس», دەدى ە.بەيسەنباەۆ.
سونداي-اق جيىندا زاڭ جوباسىن ازىرلەۋشىلەر مەملەكەتتىك باق-تا ەڭبەك ەتەتىن قىزمەتكەرلەردىڭ جالاقىسى 2023 جىلى – 30, 2024 جىلى – 30, 2025 جىلى 20 پايىزعا ارتاتىنىن ايتتى. جالپى العاندا, قولدانىستاعى «بۇقارالىق اقپارات قۇرالدارى تۋرالى» زاڭ 1999 جىلى قابىلدانعان, وعان 40-تان استام وزگەرتۋ مەن تولىقتىرۋ ەنگىزىلگەن. وسى زاڭ جوباسى ارقىلى باق زاڭناماسى 35 پايىزعا جاڭارتىلادى.
وتىرىستى قورىتىندىلاعان اسحات ايماعامبەتوۆ ءماجىلىس بۇل زاڭ جوبالارىن ەندى جۇمىسقا العانىن ايتىپ, الداعى ۋاقىتتا تالقىلاۋعا قۇزىرلى ورگان وكىلدەرىنىڭ بارلىعىن بەلسەندى قاتىسۋعا شاقىردى.
