شىن مانىندە, تۇتاس دۇنيە الماعايىپ كەزەڭدى باستان وتكەرىپ جاتقان قازىرگى تاڭدا ەل ىرگەسىن بەكەمدەۋ, ۇلتتىڭ جاڭا ساپاسىن قالىپتاستىرۋ جانە قوعامدا ادامگەرشىلىك, بىلىمپازدىق, ەڭبەكقورلىق سياقتى قاسيەتتەردى كەڭىنەن دارىپتەۋ ايرىقشا ماڭىزعا يە.
وسى ورايدا پرەزيدەنتىمىز مەملەكەتتىك نىشانداردى جەتىلدىرۋ, ۇلتىمىزدىڭ تاريحي سانا-سەزىمىن جاڭعىرتۋ, مادەني مۇرامىزدى جان-جاقتى دارىپتەۋ سەكىلدى باعىتتارعا ەرەكشە توقتالدى. سوعان سايكەس ءتول تاريحىمىزدىڭ كوپتومدىق جيناعىن كەلەسى جىلى اياقتاۋدى تاپسىردى. تاريحي تۇلعالارىمىزدىڭ بىرىڭعاي ءتىزىمىن جاساۋ جانە قولدانىستاعى كەيبىر وردەندەردى بايبارىس سۇلتان سياقتى حالقىمىزدىڭ ءبىرتۋار پەرزەنتتەرىنىڭ ەسىمدەرىمەن اتاۋ ماسەلەسىن دە كوتەردى.
مەملەكەت باسشىسى قۇرىلتايدا وسكەلەڭ ۇرپاقتىڭ تاربيەسىنە دە باسا نازار اۋداردى. بۇگىنگى بۋىن ۇلتىمىزدىڭ ەرتەڭگى كەلبەتى, بولاشاق بولمىسى ەكەنى انىق. سوندىقتان جاس ۇرپاقتىڭ پاتريوت, ءبىلىمدى, دەنى ساۋ تۇلعا بولىپ قالىپتاسۋى اسا ماڭىزدى. وسى جولدا اتا-انا, مەكتەپ جانە بۇكىل قوعام بولىپ جۇمىلۋىمىز قاجەت.
سونىمەن قاتار قاسىم-جومارت كەمەل ۇلى اقپارات ساياساتىنىڭ تيىمدىلىگىن ارتتىرۋ, كرەاتيۆتى يندۋستريانى دامىتۋ, مەملەكەتتىك ساياساتتا تالداۋ, ساراپتاما جاساۋ قىزمەتىن ساپالى جۇرگىزۋ جانە مەملەكەتتىك باسقارۋ جۇيەسىن ودان ءارى جاڭعىرتۋعا قاتىستى باسىمدىقتاردى دا اتاپ ءوتتى.
پرەزيدەنتىمىز كىتاپ باسىپ شىعارۋ ءىسى يدەولوگيا جۇمىسىنداعى نەگىزگى باعىتتىڭ ءبىرى ەكەنىن ايتىپ, «بالالار كىتاپحاناسى» اتتى جاڭا باعدارلامانى قولعا الۋدى تاپسىردى. سونداي-اق تاۋلىك بويى جۇمىس ىستەيتىن پرەزيدەنت كىتاپحاناسىن اشۋ تۋرالى ويىمەن ءبولىستى.
شەكارا ماڭىنداعى اۋىلداردىڭ احۋالى ەلدىڭ اماندىعىنا تىكەلەي ىقپال ەتەتىنى بەلگىلى. اتالعان ايماقتاردىڭ الەۋەتىن ارتتىرۋدىڭ ستراتەگيالىق ءمانى زور. سوندىقتان مەملەكەت باسشىسىنىڭ قاتون-قاراعاي, مارقاكول, ماقانشى اۋداندارىن قالپىنا كەلتىرۋ تۋرالى شەشىمى ۇلتتىڭ تۇتاستىعىن ودان ءارى نىعايتۋ تۇرعىسىنان جاسالعان ۇتىمدى قادام ەكەنى ءسوزسىز.
جالپى, وتىرىستا ەلىمىزدىڭ الداعى جاڭا يدەولوگيالىق تۇجىرىمى ايقىندالدى دەۋگە تولىق نەگىز بار. پرەزيدەنتىمىز وسى باعداردى ورنىقتىرۋ ءۇشىن مەملەكەتتىك اپپارات, ساراپشىلار, عالىمدار, تىلشىلەر, ازاماتتىق قوعام وكىلدەرى ءبىر كىسىدەي اتسالىسۋى قاجەت ەكەنىن اتاپ ءوتتى.
ەلدىك مۇددەنى كوزدەيتىن بۇل ىستەن پارلامەنت سەناتى دا قالىس قالمايدى. الداعى ۋاقىتتا قۇرىلتايدا ايتىلعان ويلار مەن ۇسىنىستار ءار قازاقستاندىقتىڭ ادال ازامات بولىپ قالىپتاسۋىنا, مەملەكەتتىلىگىمىزدى نىعايتۋعا جانە تاۋەلسىزدىگىمىزدىڭ تۇعىرىن بيىكتەتۋگە ءوز ۇلەسىن قوسادى دەپ سەنەمىز.
ماۋلەن اشىمباەۆ,
سەنات توراعاسى
