پرەزيدەنت قازاق ادەبيەتىن قولدايتىنىن جانە تۋىندىلاردىڭ وقىرمانعا قولجەتىمدى بولۋى كەرەگىن اتاپ ءوتتى. سونداي-اق كىتاپتىڭ تارالۋىنا جازۋشىلاردىڭ وزدەرى دە مۇددەلى بولۋى كەرەگىن ايتتى.
«جالپى, مەن مەملەكەت باسشىسى جانە ازامات رەتىندە قازاق ادەبيەتىن ءاردايىم قولدايمىن. تۋىندىلار وقىرماندارعا قولجەتىمدى بولۋى كەرەك دەپ ويلايمىن. ال, جازۋشىلارىمىزدىڭ شىعارمالارى حالىق اراسىندا, اسىرەسە, جاستار اراسىندا سۇرانىسقا يە بولۋى كەرەك. مۇنىڭ ءبارى – مەملەكەتتىڭ عانا ەمەس, جازۋشىلارىمىزدىڭ دا مىندەتى.
وقىرمان قاۋىم قالامگەرلەردەن حالىققا رۋحاني ازىق بولاتىن تىڭ دۇنيەلەر كۇتەدى. جازۋشىلار وداعى وسى جۇمىسقا ۇيىتقى بولادى دەپ سەنەمىن. وسىعان بايلانىستى, مەن مەرەكە قۇلكەنوۆتىڭ «قازاقستاننىڭ حالىق جازۋشىسى» اتاعىن قايتارۋ تۋرالى ۇسىنىسىن قولدايمىن. بۇل اتاق اتىنا – زاتى ساي, لايىقتى, تۋىندىلارى ارقىلى حالىق سۇيگەن جازۋشىلارعا عانا بەرىلۋى كەرەك دەپ سانايمىن», دەدى پرەزيدەنت.
سونىمەن قاتار پرەزيدەنت ۇلتتىق كينونىڭ دامۋىنا قاتىستى پىكىر ءبىلدىردى.
«قازىرگى زاماندا ەل بولامىز دەسەك, ەكراندى دا تۇزەۋىمىز كەرەك. سەبەبى كينو قوعامنىڭ سانا-سەزىمىنە ەرەكشە ىقپال ەتەدى. ەلىمىزدە كينو ءوندىرىسى جاقسى دامىعان دەپ ايتۋ قيىن. جاڭا عانا بەلگىلى ونەر قايراتكەرى ازامات ساتىبالدى كينو سالاسىن دامىتۋ تۋرالى تۇشىمدى وي ايتتى. مەن قولدايمىن. راسىندا, بۇگىندە كينو سالاسىندا داۋ-داماي كوبەيىپ كەتتى. بىرنەشە كەلەڭسىز مىسالدار بار», دەدى قاسىم-جومارت توقاەۆ.
